Bilangen 10:1-36
10 Kenca si e nina Jahwe man Musa,
2 “Banlah dua trompet+ si iban arah pirak si itempah. Pakelah e guna ngelebuh kalak Israel gelah pulung bage pe guna nuruh kalak e berkat.
3 Adi duana trompet e iembus, kerina kalak Israel arus pulung guna njumpai kam i pintu masuk kemah perjumpan.+
4 Adi sada ngenca trompet iembus, peminpin-peminpin si minpin ribun kalak Israel ngenca si reh njumpai kam.+
5 “Adi berubah-ubah sora trompet e sanga iembus, si arus berkat eme kelompok suku si lit i sebelah timur.+
6 Adi iembus ka trompet e peduakaliken janah berubah-ubah ka sorana, si arus berkat eme kelompok suku si lit i sebelah selatan.+ Bage me carana trompet e iembus tiap lit kelompok si arus berkat.
7 “Guna ngelebuh kalak Israel gelah pulung, arus iembus trompet e,+ tapi sorana la berubah-ubah.
8 Si ngembus trompet+ e eme anak-anak Harun si ngelayani jadi imam, janah enda me peraturen si arus terus ipatuhi kalak e ras keturunenna.
9 “Adi erperang kena ras musuh si nyerang negri kena, embuslah trompet e guna jadi tanda erperang.+ Alu bage pasti kena inget Jahwe Dibata kena janah selamatkenNa kena arah musuh-musuh kena.
10 “Bage ka pe sanga kena ermeriah ukur,+ la soal sanga erban perayan+ bage pe sanga awal bulan, arus embus kena trompet kena i lebe-lebe persembahen tutungen+ ras korban persadan kena.+ Enda erban kena inget Dibata kena. Aku kap Jahwe Dibata kena.”+
11 Bas wari si pe-20-ken bulan si peduaken bas tahun si peduaken,+ nangkih me tiang embun arah datas kemah ingan ersembah,+ si isina lit Peti Perjanjin.*
12 Emaka berkat kalak Israel arah Taneh Mesawang* Sinai ngikutken uruten si enggo itentuken.+ Kenca si e ngadi tiang embun e i Taneh Mesawang Paran.+
13 Enda tangtangna kalak Israel berkat ngikutken perentah si bereken Jahwe arah Musa.+
14 Si pertama berkat eme kelompok telu suku si ipinpin suku Juda menurut pasukenna. Nahesson+ anak Aminadap si minpin kelompok e.
15 Peminpin suku Isakar eme Netanel+ anak Suar.
16 Peminpin suku Sebulon eme Eliap+ anak Helon.
17 Kenca kemah ingan ersembah ibongkar,+ berkat me keturunen Gerson+ ras keturunen Merari+ si maba kemah ingan ersembah.
18 Kenca si e berkat kelompok telu suku si ipinpin suku Ruben menurut pasukenna. Elisur+ anak Sedeur si minpin kelompok e.
19 Si minpin suku Simeon eme Selumiel+ anak Surisaddai.
20 Si minpin suku Gat eme Eliasap+ anak Deuel.
21 Kenca si e berkat ka keturunen Kohat si maba barang-barang si badia.+ Adi enggo seh kalak e, kemah ingan ersembah arus ipasang.
22 Kenca si e berkat ka kelompok telu suku si ipinpin suku Eperaim menurut pasukenna. Elisama+ anak Amihut si minpin kelompok e.
23 Si minpin suku Manase eme Gamaliel+ anak Pedasur.
24 Si minpin suku Benyamin eme Abidan+ anak Gideoni.
25 Kenca si e berkat ka kelompok telu suku si ipinpin suku Dan menurut pasukenna. Kalak e me si arah pudina kel arah kerina kelompok. Ahieser+ anak Ammisaddai si minpin kelompok e.
26 Si minpin suku Aser eme Pagiel+ anak Ohran.
27 Si minpin suku Naptali eme Ahira+ anak Enan.
28 Enda ndai me uruten si ikutken kalak Israel ras pasukenna sanga kalak e berkat.+
29 Kenca si e ngerana Musa man Hobap anak Jetero.*+ Jetero eme mama Musa, ia kalak Midian. Nina Musa man Hobap, “Berkat ate kami ku negri si enggo ijanjiken Jahwe man kami.+ Ikut min kam ras kami.+ Mehuli nge pagi iban kami man bandu, perban enggo erjanji Jahwe mereken si mehuli man kalak Israel.”+
30 Tapi nina man Musa, “Aku la ikut. Mulih ateku ku negriku ras ku keluargaku.”
31 Nina Musa ka, “Ula min tadingkenndu kami, sebap kam si meteh i ja kami banci erkemah i taneh mesawang.* Kam si banci mabai dalan man kami.
32 Adi ikut kam,+ kai pe si mehuli si bereken Jahwe man kami, pasti bereken kami ka man bandu.”
33 Emaka berkat kalak e arah gunung Jahwe+ janah erdalan kalak e telu wari dekahna ndarami ingan ngadi.+ Sanga kalak e erdalan, Peti Perjanjin+ Jahwe lit i lebe-lebe kalak e.
34 Tiang embun+ arah Jahwe terus mabai kalak e sanga kalak e erdalan paksa ciger wari.
35 Adi iangkat Peti Perjanjin e, nina Musa, “O Jahwe,+ tediskenlah, banlah musuh-musuhNdu merap janah banlah kalak si rate segat man baNdu kiamen arah lebe-lebeNdu.”
36 Janah sanga Peti e ipenusur, nina Musa, “O Jahwe, mulihkenlah ku kalak Israel si la terkira buena.”*+
Cataten i teruh
^ Ntah “Peti Perpadanen.”
^ Taneh si mbelang si jarang iingani.
^ Gelar si deban arah Rehuel.
^ Taneh si mbelang si jarang iingani.
^ As. “si ribun buena.”
