Bilangen 11:1-35
11 Jungut-jungut kalak Israel man Jahwe. Sanga ibegi Jahwe, merawa Ia. Emaka reh api arah Jahwe janah ipan api e piga-piga kalak si lit i pinggir perkemahen.
2 Sanga nderkuh kalak e mindo penampat man Musa, ertoto Musa man Jahwe,+ jenari mate api e.
3 Emaka iban gelar ingan e Tabera,* perban kalak e enggo ipan api arah Jahwe.+
4 Kalak asing si tading ras kalak Israel+ merhat kel man daging+ janah kalak Israel pe mulai ka tangis, nina, “Merhat kel kami man daging.+
5 Mbarenda, sanga kami bas Mesir, rate-ate kami man ikan, cimen, semangka, bawang pere, bawang merah, ras bawang putih!+
6 Tapi gundari lanai lit gegeh kami, manna ngenca man tatapen.”+
7 Manna+ e bentukna bali bagi ketumbar+ janah warnana bagi getah kayu.*
8 Biasana kalak Israel lawes muati manna e janah igiling kalak e bas penggilingen tan ntah pe itutuna bas lesung. Kenca si e ibelgang kalak e i belanga ntah pe iban kalak e jadi roti si bentukna kibul.+ Nanamna bagi roti si ntebu si icampur minak.
9 Paksa berngi, ndabuh manna e radu ras remang ku daerah perkemahen.+
10 Ibegi Musa kalak Israel tangis, tiap keluarga tangis i pintu kemahna masing-masing. Merawa kel Jahwe+ janah Musa pe nembeh kel atena ngidah kalak e.
11 Kenca si e nina Musa man Jahwe, “Engkai maka bage banNdu man budakNdu enda? Kai kin salahku maka la Kam senang man bangku, maka aku si arus maba baban bangsa enda?+
12 Bas beltekku nari kin bangsa e? Aku kin si ngelahirken kalak e, maka suruhNdu aku ngangkip kalak e bagi ngangkip anak-anak, guna maba kalak e ku negri si janjikenNdu alu sumpah man nini bulangna?+
13 I ja banci kudat daging man bangsa enda? Lalap kalak e tangis man bangku janah nina, ‘Bereken kami daging, man daging ate kami!’
14 Labo aku ngasup sisada maba bangsa enda, mberatsa dahin e man bangku.+
15 Adi bagenda kin perbahanenNdu man bangku, bunuh saja aku gundari.+ Adi jadi kin ateNdu aku, ula nai tambahiNdu kesusahenku.”
16 Emaka nina Jahwe man Musa, “Pilihlah 70 kalak arah peminpin-peminpin Israel nari, eme kalak si ihamati janah si cocok akapndu.+ Suruh kalak e reh ku kemah perjumpan janah tedis i je ras kam.
17 Nusur kari Aku+ janah ngerana ras kam i je.+ Kubuat deba kesah si badia+ si lit i bas kam janah Kubereken man kalak e. Kalak e kari si nampati kam ngurus bangsa enda, gelah lanai kam sisada si maba tanggung jawap e.+
18 Bagendalah nindu man bangsa enda, ‘Pagi, pebadialah diri kena,+ perban pasti kena man daging. Sebap enggo begi Jahwe kena jungut-jungut. Kataken kena+ maka merhat kel kena man daging. Tabehen akap kena pergeluh kena sanga i Mesir.+ Pasti bere Jahwe kena daging, janah man daging me kena.+
19 Pasti kena man daging, labo sada wari ngenca, labo 2 wari, labo 5 wari, labo 10 wari, ntah pe 20 wari,
20 tapi dem sada bulan, seh asa ndaraten daging e arah igung kena janah dungna ciga ate kena.+ Enggo itulak kena Jahwe si lit i tengah-tengah kena, janah tangis kena i lebe-lebeNa, ning kena, “Engkailah kami ndarat arah Mesir nari pe?”’”+
21 Kenca si e nina Musa, “Lit 600.000 prajurit+ bas bangsa enda, tapi nindu bereNdu ateNdu kalak e daging janah banci kalak e man daging sebulan dekahna.
22 Bicara igeleh gia kerina kambing, biri-biri, ras lembu, bias kin e man kalak e? Ntah adi itangkap gia kerina ikan si lit i laut, bias kin e man kalak e?”
23 Kenca si e nina Jahwe man Musa, “Akapndu kin Aku, Jahwe, la ngasup ngelakoken si e?+ Idahndu nge kari tuhu ntah lang si Kukataken e.”
24 Ndarat Musa janah pesehna kata-kata Jahwe man kalak Israel. Pilihna 70 dilaki arah peminpin-peminpin Israel janah suruhna kalak e tedis i sekeliling kemah perjumpan.+
25 Kenca si e nusur me Jahwe i bas embun+ janah ngerana man Musa.+ IbuatNa deba kesah si badia+ si lit bas Musa janah berekenNa man 70 dilaki e. Kenca lit kesah si badia bas kalak e, mulai perbahanen kalak e bagi nabi,+ tapi dung e kalak e lanai pernah bage.
26 Arah si 70 kalak e lit dua si tading bas perkemahen, gelarna Eldat ras Medat. Kalak e la lawes ku kemah perjumpan. Kesah si badia pe lit bas kalak e perban kalak e pe terpilih, emaka perbahanen kalak e bali bagi nabi bas perkemahen e.
27 Sekalak anak perana kiam ndahi Musa janah nina, “Bagi nabi kuidah perbahanen Eldat ras Medat i perkemahen!”
28 Kenca si e Josua+ anak Nun, si enggo ngelayani Musa mulai kin ngudana nari ngataken, “O Tuanku Musa, laranglah kalak e!”+
29 Tapi nina Musa man bana, “Mbiar kam isaingina kari aku? Ula bage, ateku min kerina umat Jahwe jadi nabi janah bere Jahwe kesahNa si badia man kalak e.”
30 Kenca si e mulihken Musa ku perkemahen radu ras kerina peminpin e.
31 Kenca si e iban Jahwe meter angin rembus arah laut nari. Ibaba angin e melala perik leto janah ndabuhen ku sekeliling perkemahen.+ Dungna ergun-gun perik-perik e i je seh asa kira-kira sada meter* ganjangna. Adi lit kalak si ndarat arah perkemahen janah erdalan ia sada wari dauhna, banci denga idahna perik ndai.
32 Emaka sada warin ras sada berngin bage pe sedekah sada wari berikutna, terus ipepulung kalak Israel perik e. Silang-langna tiap kalak mpepulung sepuluh homer* janah kerahken kalak e perik-perik ndai i sekeliling perkemahen.
33 Tapi sanga ingat-ngati kalak e denga daging ndai, merawa kel Jahwe man kalak e. Emaka ihukum Jahwe kalak e alu penakit si mekelek.+
34 Emaka iban kalak e gelar ingan e Kiberot Taawa,*+ perban i je me kalak si rangap ndai ikuburken kalak e.+
35 Dung e berkat kalak Israel arah Kiberot Taawa ku Haserot, janah tading kalak e i Haserot.+
Cataten i teruh
^ Ertina “Nutung,” eme api si gurlah kel.
^ As. “getah damar.”
^ Ertina “Kuburen Kalak si Rangap.”
