Bilangen 12:1-16
12 Jungut-jungut Miriam ras Harun man Musa perban empoi Musa diberu arah kalak Kus.+
2 Nina kalak e, “Arah Musa kin ngenca Jahwe ngerana? La kin arah kita pe ngerana nge Ia?”+ Begi Jahwe kalak e ngerana.+
3 Musa me dilaki si lembutna*+ i belang-belang doni janah la lit si bagi ia.
4 Rempet ngerana Jahwe man Musa ras Harun bage pe Miriam, “Laweslah kena teluna ku kemah perjumpan.” Emaka berkat kalak e teluna.
5 Kenca si e reh Jahwe i bas tiang embun,+ janah tedis Ia i pintu masuk kemah perjumpan jenari lebuhNa Harun ras Miriam. Emaka reh kalak e duana.
6 Kenca si e nina, “Begiken min kata-kataKu enda. Adi lit nabi Jahwe i tengah-tengah kena, Kupetandaken diriKu man bana arah pengenehenen*+ janah ngerana Aku man bana bas nipi.+
7 Tapi la bage Kuban man Musa budakKu e. Kerina umatKu enggo Kupercayaken man bana.+
8 Aku, Jahwe, langsung ngerana ras ia,+ alu jelas ras terus terang Aku ngerana man bana. Enggo Kucidahken diriKu man bana. Emaka, engkai maka pang kena ngataken Musa budakKu e la mehuli?”
9 Merawa kel Jahwe janah tadingkenNa kalak e.
10 Pindah embun e arah kemah e nari janah kena kusta Miriam, kustana e mbentar bagi salju.+ Tulihken Harun ku Miriam janah idahna enggo kena kusta Miriam.+
11 Mis nina Harun man Musa, “Salah aku, Tuan! Ula min pediatndu kami ihukum perban dosa kami e. Enggo bodoh kel perbahanen kami e.
12 Ula min pediatndu ia bagi bayi si mate sanga lahir, si dagingna enggo macik sanga ilahirken.”
13 Ertoto Musa man Jahwe, nina, “O Dibata, pepalem min ia! Pepalem min ia!”+
14 Nina Jahwe man Musa, “Adi ciduri bapakna ayona, la kin mela akapna pitu wari dekahna? Emaka pisahkenlah ia ku ingan si deban sada minggu dekahna,+ kenca si e banci ia ibaba mulihken ku perkemahen.”
15 Emaka Miriam ipisahken ku ingan si deban pitu wari dekahna,+ janah kalak Israel la lawes ku japa pe seh ngasa mulihken Miriam ku perkemahen.
16 Kenca si e berkat kalak Israel arah Haserot+ nari janah erkemah kalak e i Taneh Mesawang* Paran.+
Cataten i teruh
^ Ntah “si meterukna kel ukurna.”
^ Eme kerna kai pe si cidahken Dibata ku bas pikiren sekalak jelma.
^ Taneh si mbelang si jarang iingani.
