Bilangen 13:1-33
13 Nina Jahwe ka man Musa,
2 “Pilihlah sada peminpin+ arah tiap suku Israel+ janah suruh kalak e jadi mata-mata ku negri Kanaan si nandangi Kubereken man kalak Israel.”
3 Emaka isuruh Musa kalak e lawes arah Taneh Mesawang* Paran,+ bagi si perentahken Jahwe. Kerina kalak e peminpin bas Israel.
4 Enda me gelar-gelar kalak e: Arah suku Ruben eme Sammua anak Sakur,
5 arah suku Simeon eme Sapat anak Hori,
6 arah suku Juda eme Kalep+ anak Jepune,
7 arah suku Isakar eme Igal anak Jusup,
8 arah suku Eperaim eme Hoshea+ anak Nun,
9 arah suku Benyamin eme Palti anak Rapu,
10 arah suku Sebulon eme Gaddiel anak Sodi,
11 arah suku Jusup+ eme suku Manase,+ Gaddi anak Susi,
12 arah suku Dan eme Amiel anak Gemalli,
13 arah suku Aser eme Setur anak Mikael,
14 arah suku Naptali eme Nahbi anak Wopsi,
15 arah suku Gat eme Geuel anak Maki.
16 Hoshea anak Nun igelari Musa ka Josua.*+ Enda ndai me gelar dilaki-dilaki si isuruh Musa lawes jadi mata-mata ku negri e.
17 Sanga isuruh Musa kalak e lawes ngenen negri Kanaan, nina man kalak e, “Laweslah kena ku Negep,* jenari nangkeng kena ku daerah pegunungen.+
18 Arus selidiki kena uga negri e,+ uga kalak si tading i je, megegeh ntah lemah, sitik ntah enterem.
19 Selidiki ka mejile ntah lang negri e, kota-kotana erbenteng ntah lang, ntah perkemahen saja ngenca.
20 Selidiki ka subur ntah lang tanehna,+ lit i je batang kayu ntah lang. Arus kena pang+ janah babalah deba buah-buahen arah negri e.” Paksa si e sangana mulai musim rani anggur.+
21 Emaka lawes kalak e janah mata-mataina negri e, mulai Taneh Mesawang* Sin+ nari, jenari ku Rehop+ deher Hamat.*+
22 Sanga kalak e erdalan ku Negep,* seh me kalak e i Hebron,+ ingan tading keturunen kalak Enak+ eme Ahiman, Sesai, ras Talmai.+ Pitu tahun leben Hebron ibangun asangken Soan si lit i Mesir.
23 Sanga kalak e seh i Lembah* Eskol,+ itektek kalak e sada dahan anggur si melala buahna, emaka arus dua dilaki si mabasa alu kayu, ibaba kalak e ka piga-piga buah delima ras buah ara.+
24 Igelari kalak e ingan e Lembah* Eskol*+ perban i je itektek kalak Israel dahan batang anggur ndai.
25 Kenca dung mata-matai kalak e negri e 40 wari dekahna,+ mulih me kalak e.
26 Jumpai kalak e Musa ras Harun bage pe kerina kalak Israel i Taneh Mesawang* Paran si lit i Kades.+ Ipeseh kalak e laporen man kerina kalak Israel janah cidahken kalak e buah si babana arah negri e.
27 Nina kalak e man Musa, “Enggo masuk kami ku negri si suruhndu dahi kami. Bas negri e melala kel susu ras madu+ janah enda buah-buahen arah negri e.+
28 Tapi kalak si tading bas negri e megegeh janah benteng kota-kotana pe paguh kel. Idah kami ka i je keturunen Enak.+
29 Si tading i daerah Negep*+ eme kalak Amalek.+ Si tading i daerah pegunungen eme kalak Het, kalak Jebusi,+ ras kalak Amori.+ Si tading i deher laut+ bage pe segedang Lau Jordan eme kalak Kanaan.”+
30 I lebe-lebe Musa, usahaken Kalep erban kalak Israel tenang janah nina, “Ota mis siserang negri e! Pasti sitaluken kalak e janah pasti sirebut negri e.”+
31 Tapi nina dilaki-dilaki si lawes ras Kalep ndai, “Lang, labo kita ngasup ngelawan kalak e, perban gegehen kalak e asangken kita.”+
32 Terus laporken kalak e si la mehuli+ man kalak Israel kerna negri si enggo mata-matai kalak e. Nina kalak e, “Negri si mata-matai kami e eme negri si pendudukna pe ipanna, janah kerina kalak si idah kami bas negri e luar biasa kel galangna.+
33 Idah kami ka i je keturunen Enak.+ Kalak e manusia raksasa.* Adi bandingken kita ras kalak e, kita bagi labang ngenca, emaka pasti bage kang anggap kalak e kita.”
Cataten i teruh
^ Taneh si mbelang si jarang iingani.
^ Ntah “Jehosua,” ertina “Jahwe kap Keselamaten.”
^ Ntah “Selatan.”
^ Taneh si mbelang si jarang iingani.
^ Ntah “dalan masuk ku Hamat.”
^ Ntah “Selatan.”
^ Ertina “Tandan Buah Anggur.”
^ Taneh si mbelang si jarang iingani.
^ Ntah “Selatan.”
^ As. “Nepilim.”
