Bilangen 14:1-45
14 Kenca si e, kerina kalak Israel nderkuh ras tangis gedang-gedang berngi.+
2 Jungut-jungut kerina kalak Israel man Musa bage pe man Harun+ janah kerina kalak Israel ngelawan kalak e, nina, “Pangen min ndai kami mate i Mesir ntah pe mate i taneh mesawang* enda!
3 Engkai baba Jahwe kami ku negri enda gelah ibunuh alu pedang?+ Itaban kari diberu kami ras anak-anak kami.+ Me pangen kami mulih saja ku Mesir?”+
4 Nina kalak e man sada ras si debanna, “Sipilih saja peminpinta janah mulih kita ku Mesir!”+
5 Megi ranan kalak Israel e, sujud Musa ras Harun i lebe-lebe kerina kalak Israel si pulung e.
6 Josua+ anak Nun ras Kalep+ anak Jepune eme kalak si ikut jadi mata-mata ku negri e, ngerigatken bajuna.
7 Jenari nina kalak e man kerina kalak Israel si pulung e, “Negri si mata-matai kami e seh kel jilena.+
8 Adi jadi ate Jahwe ngidah kita, pasti babaNa kita ku je janah berekenNa negri si melala kel susu ras madu man banta.+
9 Tapi ula silawan Jahwe janah ula kita mbiar man penduduk negri e.+ Pasti kita menang ngelawan kalak e perban la lit si ngelindungi kalak e, emaka ula kita mbiar man kalak e. Jahwe kap ras kita.”+
10 Amin pe bage, benteri kalak Israel atena kalak e.+ Tapi teridah kemulian Jahwe i kemah perjumpan janah kerina kalak Israel banci ngidahsa.+
11 Kenca si e nina Jahwe man Musa, “Asa kai nari dekahna kalak e la ngergai Aku?+ Asa kai nari dekahna kalak e la erkiniteken man bangKu, padahal enggo Kucidahken melala mukjizat man kalak e?+
12 Kuhukum pagi kalak e alu wabah penakit janah Kukernepken kalak e. Pangen keturunenndu saja si jadi bangsa si mbelin ras megegeh asangken kalak e.”+
13 Tapi nina Musa man Jahwe, “Enggo babaNdu kalak Israel ndarat arah Mesir nari alu kuasaNdu. Emaka adi bage kin banNdu, pasti begi kalak Mesir kerna si e,+
14 janah pasti ceritakenna man penduduk negri e. Enggo begi kalak e maka Kam, Jahwe, ras kami kap.+ Enggo langsung petandakenNdu diriNdu man bangsa enda.+ Kam kap Jahwe, si erdalan i lebe-lebe kalak e bas tiang embun sanga ciger janah bas tiang api sanga berngi.+
15 Adi sekali kerina bangsa enda bunuhNdu, bangsa-bangsa si megi kerna si e pasti ngataken,
16 ‘La kap ngasup Jahwe maba bangsa e ku negri si janjikenNa alu sumpah man kalak e, emaka bunuhNa kalak e i taneh mesawang.’*+
17 Emaka mindo kel aku Jahwe, mbera-mbera jelas teridah kuasaNdu si mbelin bagi janjiNdu mbarenda, sanga katakenNdu,
18 ‘Aku, Jahwe, la menukah merawa janah dem alu kekelengen si setia.+ Kuampuni kesalahen bage pe pelanggaren, tapi pasti Kuhukum kalak jahat. Adi lit kalak si ersalah, Kuban anakna, kempuna, bage pe ente kalak si ersalah e nanggung akibat kesalahenna.’+
19 Perban kekelengenNdu si setia, mindo kel aku gelah ampuniNdu min kesalahen bangsa enda bagi si lakokenNdu mulai arah Mesir nari seh asa gundari.”+
20 Kenca si e nina Jahwe, “Adi bage nindu, Kuampuni kalak e.+
21 Tapi, Aku, Jahwe, Dibata si nggeluh, ersumpah maka pasti pagi Kuban belang-belang doni dem alu kemulianKu.+
22 Bangsa enda enggo ngidah kemulianKu ras mukjizat+ si Kuban i Mesir ras i taneh mesawang.* Tapi lalap* uji kalak enda Aku+ janah la begiken kalak e kata-kataKu.+ E me sebapna la lit sekalak pe arah kalak e
23 si banci ngidah negri si Kujanjiken alu sumpah man nini bulang kalak e. Ise pe si la ngergai Aku la banci ngidah negri e.+
24 Perban budakKu Kalep+ la seri ras kalak e janah patuhina perentahKu alu bulat ukur, pasti Kubaba ia ku negri si enggo mata-mataina e janah negri e jadi jang keturunenna.+
25 Kalak Amalek ras kalak Kanaan+ tading i daerah lembah, emaka arus kena mulihken ku taneh mesawang* arah dalan ku Laut Merah.”+
26 Kenca si e nina Jahwe man Musa ras Harun,
27 “Asa kai nari dekahna bangsa si jahat enda jungut-jungut man bangKu?+ Enggo Kubegi kalak Israel jungut-jungut man bangKu.+
28 Kataken man kalak e, ‘Aku, Jahwe, Dibata si nggeluh ersumpah, “Pasti pagi Kulakoken bagi si Kubegi arah kena!+
29 Kerina si umurna 20 tahun ku datas si enggo jungut-jungut man bangKu,+ pasti pagi amparen mayatna i taneh mesawang.*+
30 La lit sekalak pe arah kena si banci masuk ku negri si Kujanjiken alu sumpah+ selain Kalep anak Jepune ras Josua anak Nun.+
31 “‘“Kataken kena maka itaban pagi anak-anak kena,+ tapi Kubaba pagi kalak e ku negri si itulak kena e.+ Kalak e pagi si ngidah negri e,
32 tapi mayat kena amparen pagi i taneh mesawang.*
33 Perban la kena setia, jadi permakan pagi anak-anak kena 40 tahun dekahna+ i taneh mesawang,* seh ngasa kerina kena maten i taneh mesawang.+
34 Enggo mata-matai kena negri e 40 wari dekahna,+ emaka arus tanggung kena akibat dosa kena e 40 tahun dekahna,+ sada tahun guna sada wari. Alu bage iteh kena kai akibatna adi lawan kena Aku.*
35 “‘“Aku, Jahwe, enda me kataKu janah enda si nandangi Kulakoken man bangsa si jahat enda, si enggo ersada ngelawan Aku: Keri pagi kalak e maten i taneh mesawang* janah i je kalak e maten.+
36 Dilaki-dilaki si isuruh Musa jadi mata-mata ku negri e ras si erban laporen si la mehuli kerna negri e janah erban bangsa e jungut-jungut man bangKu,+
37 pasti mate. Kuhukum kalak si mereken laporen si la mehuli kerna negri e janah mate kalak e i lebe-lebe Jahwe.+
38 Tapi Josua anak Nun ras Kalep anak Jepune si ikut jadi mata-mata ku negri e, pasti tetap nggeluh.”’”+
39 Sanga peseh Musa kata-kata e man kerina kalak Israel, ceda kel ate kalak e.
40 Dung e, lampas kalak e medak janah ersikap kalak e lawes ku datas gunung, jenari nina, “Kami enggo erdosa. Tapi gundari enggo ersikap kami guna lawes ku ingan si ikataken Jahwe.”+
41 Tapi nina Musa, “Engkai maka ilanggar kena perentah Jahwe? Labo kena banci berhasil.
42 Ula kena lawes, perban Jahwe labo ras kena. Pasti kena italuken musuh-musuh kena.+
43 Sebap iadapi kena kari kalak Amalek ras kalak Kanaan i je.+ Pasti kena ibunuh alu pedang. Perban la ikutken kena Jahwe, pasti la kena itemani Jahwe.”+
44 Amin pe bage, pang denga kalak e nangkih ku datas gunung,+ tapi Peti Perjanjin* Jahwe bage pe Musa tetap i tengah-tengah perkemahen, la miser ku japa pe.+
45 Kenca si e kalak Amalek ras kalak Kanaan si tading i daerah pegunungen nyerang kalak e janah ibanna kalak e kiamen seh ku daerah Horma.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ As. “enggo sepuluh kali.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Ntah “adi kena jadi musuhKu.”
^ Taneh si mbelang si jarang iingani.
^ Ntah “Peti Perpadanen.”