Bilangen 15:1-41
15 Kenca si e nina Jahwe man Musa,
2 “Bagendalah nindu man kalak Israel, ‘Seh kena pagi ku negri si nandangi Kubereken man ingan kena tading.+
3 Paksa si e pagi, arus persembahken kena lembu, biri-biri, ntah pe kambing jadi persembahen si itutung man Jahwe. Bau persembahen tutungen e merim* akap Jahwe.+ Sanga bereken kena persembahen tutungen,+ persembahen guna janji khusus, persembahen sukarela,+ ntah pe persembahen sanga perayan-perayan,+
4 arus ka bereken kena persembahen pangan* man Jahwe. Persembahen e arus iban arah tepung halus+ si buena sada kilo* janah icampur ras minak saitun si buena hampir sada liter.*
5 Arus ka persembahken kena anggur si buena hampir sada liter* jadi persembahen inemen sanga persembahken kena persembahen tutungen,+ ntah pe sanga persembahken kena sada biri-biri jantan si nguda denga.
6 Ntah sanga persembahken kena sada biri-biri jantan, arus ka bere kena persembahen pangan si iban arah tepung halus si buena dua kilo* janah icampur ras minak saitun si buena lebih sada liter.*
7 Arus ka persembahken kena anggur si buena lebih sada liter* jadi persembahen inemen si merim* akap Jahwe.
8 “‘Tapi adi bereken kena ate kena sada lembu jantan jadi persembahen tutungen,+ ntah jadi persembahen guna janji khusus,+ ntah jadi korban persadan man Jahwe,+
9 arus ka persembahken kena persembahen pangan+ si iban arah tepung halus si buena telu setengah kilo* janah icampur ras minak saitun si buena hampir dua liter.*
10 Selain si e, arus ka persembahken kena anggur si buena hampir dua liter* jadi persembahen inemen+ si itutung alu api, si merim akap Jahwe.
11 Bage me si arus iban man tiap lembu jantan, biri-biri jantan, biri-biri jantan si nguda denga, ntah pe kambing.
12 La soal piga jumlah binatang si persembahken kena, arus ka persembahken kena persembahen pangan ras persembahen inemen e radu ras binatang si ipersembahken e.
13 Alu cara si bage me kerina kalak Israel arus mereken persembahen si itutung alu api si merim* akap Jahwe.
14 “‘Adi kalak asing si tading ras kena ntah kalak si enggo ndekah kel tading ras kena mereken persembahen si itutung si merim akap Jahwe, arus seri peraturen si ikutkenna.+
15 Peraturen enda arus patuhi kena bage pe kalak asing si tading ras kena. Enda arus terus patuhi kena bage pe kerina keturunen kena. Penduduk asing arus seri ras kena i lebe-lebe Jahwe.+
16 Arus seri undang-undang ras peraturen man kena bage pe man kalak asing si tading ras kena.’”
17 Nina Jahwe ka man Musa,
18 “Bagendalah nindu man kalak Israel, ‘Adi masuk kena ku negri si nandangi Kubereken man kena,
19 janah pan kena pangan* kai pe si ihasilken negri e,+ berekenlah sumbangen man Jahwe.
20 Buatlah hasil si pertama arah biji-bijin*+ kena janah ban jadi roti si bentukna bagi gelang jenari sumbangken man bangKu. Sumbangen e arus ibereken bali bagi sumbangen si ibuat arah ingan ngerik.*
21 Kena bage pe keturunen kena arus mereken deba arah hasil pertama arah biji-bijin kena jadi sumbangen man Jahwe.
22 “‘Adi lakoken kena perbahanen si salah janah la dalanken kena kerina si enggo peseh Jahwe man Musa,
23 eme kerina si perentahken Jahwe man kena arah Musa si arus patuhi kena ras keturunen kena, mulai kin tangtangna ibereken Jahwe peraturen e seh ngasa seterusna,
24 janah adi kesalahan e la isengaja ras la iteh kerina kalak Israel, kerina kalak Israel arus mereken sada lembu jantan si nguda denga jadi persembahen tutungen si merim akap Jahwe. Arus ka bereken kalak e persembahen pangan ras persembahen inemen menurut peraturen si enggo itetapken,+ bage pe sada kambing si nguda denga jadi persembahen dosa.+
25 Arus iban imam pendamen guna kerina kalak Israel. Iampuni me kalak e perban kesalahen e+ la isengaja janah enggo ibereken kalak e persembahen si itutung alu api man Jahwe bage pe persembahen dosa i lebe-lebe Jahwe guna kesalahen kalak e.
26 Iampuni pagi kerina kalak Israel bage pe kalak asing si tading ras kalak e, perban kesalahen e labo isengaja.
27 “‘Adi lit si la sengaja erdosa, arus berekenna sada kambing beruna si umurna setahun ntah kurang jadi persembahen dosa.+
28 Arus iban imam pendamen i lebe-lebe Jahwe guna kalak si la sengaja erdosa e. Iampuni pagi dosana e perban enggo iban pendamen.+
29 Undang-undang kerna kalak si la sengaja erdosa arus ipatuhi kalak Israel bage pe kalak asing si tading ras kalak e.+
30 “‘Tapi adi lit si sengaja erdosa,+ la soal ia kalak Israel ntah pe penduduk asing, enggo ihinana kap Jahwe, emaka arus ia ibunuh.
31 Arus ia ibunuh perban la ergaina kata-kata Jahwe janah la patuhina perentahNa.+ Ia mate perban kesalahenna.’”+
32 Sanga kalak Israel i taneh mesawang,* lit sekalak dilaki si terdat sangana mpepulung ranting bas wari Sabat.+
33 Kenca si e ibaba kalak e dilaki ndai man Musa, Harun, ras kerina kalak Israel.
34 Itahan dilaki e+ perban lenga jelas kai si arus ilakoken man bana.
35 Nina Jahwe man Musa, “Dilaki e arus ibunuh+ janah kerina kalak Israel arus mbenteri ia alu batu i darat perkemahen.”+
36 Emaka ibaba kalak e dilaki ndai ku darat perkemahen janah benteri kalak e ia alu batu seh ngasa mate, bagi si perentahken Jahwe man Musa.
37 Nina Jahwe ka man Musa,
38 “Katakenlah man kalak Israel maka arus iban kalak e rumbai-rumbai* bas pinggiren bajuna si arah teruh janah arus banna ka benang biru i datas pinggiren baju e.+ Keturunenna pe pagi arus ka erban si bage.
39 ‘Arus pasang kena rumbai e gelah idah kena janah inget kena perentah Jahwe jenari ipatuhi kena.+ Ula ikutken kena kai nina pusuh kena ras mata kena gelah ula babaina kena la setia man bangKu.*+
40 Rumbai-rumbai e kari si nampati kena nginget kerina perentah-perentahKu, alu bage ipatuhi kena janah jadi badia kena man Dibata kena.+
41 Aku kap Jahwe Dibata kena si maba kena ndarat arah negri Mesir, guna mbuktiken maka Aku kap Dibata kena.+ Aku kap Jahwe Dibata kena.’”+
Cataten i teruh
^ Ntah “erban meriah.”
^ As. “si buena 1/4 hin.”
^ As. “si buena 1/3 hin.”
^ Ntah “erban meriah.”
^ As. “si buena 1/2 hin.”
^ Ntah “si erban meriah.”
^ As. “roti.”
^ Taneh si mbelang si jarang iingani.
^ Ntah “ambir-ambir.”
^ Ntah “kena erlua-lua secara rohani.”
