Bilangen 16:1-50
16 Kenca si e ersada Korah ras Datan, Abiram, bage pe On guna ngelawan Musa. Korah+ e anak Ishar,+ Ishar e anak Kohat,+ Kohat e anak Lewi.+ Datan ras Abiram anak Eliap.+ On anak Pelet. Teluna kalak e arah suku Ruben.+
2 Ersada kalak e ras 250 kalak Israel nentang Musa. Janah si 250 kalak e eme dilaki-dilaki si ihamati, peminpin-peminpin kalak Israel, ras kalak si terpilih.
3 Pulung kalak e ngelawan+ Musa ras Harun janah nina, “Enggo bias! Kerina kalak si pulung enda badia,+ janah Jahwe ras kalak e.+ Jadi engkai maka ganjangen akap kena diri kena asangken umat Jahwe enda?”
4 Sanga begi Musa kerna si e, sujud ia.
5 Kenca si e nina Musa man Korah bage pe man kerina si ndukung ia, “Pagi sanga erpagi-pagi, tuduhken Jahwe ise si jadi jangNa,+ ise si badia, ras ise si arus ndeher ku Ia.+ Ise pe si ipilihNa+ banci ndeheri Ia.
6 O Korah ras kerina si ndukung kam,+ bagendalah ban kena: Buatlah ingan rara,+
7 pagi tamalah rara ku bas ingan e janah tutunglah kemenyan i lebe-lebe Jahwe. Ise si ipilih Jahwe,+ ia si badia. Enggo kelewatsa kena e kalak Lewi!”+
8 Kenca si e nina Musa man Korah, “O kalak Lewi, begikenlah aku.
9 Enggo pisahken Dibata Israel kena arah kerina kalak Israel janah bereNa kena ndeheri Ia.+ Enggo lantikNa kena ngelayani i kemah Jahwe eme kemah ingan ersembah bage pe ngelayani kalak Israel.+ Akap kena kin e sepele?
10 Enggo bere Dibata kena ndeheri Ia radu ras kerina senina kena si kalak Lewi. Akap kena kin e sepele? Arus ka kin kena pe jadi imam?+
11 Ise kin akap kena Harun e, maka jungut-jungut kena bana? Situhuna kam ras kerina si ndukung kam enggo jungut-jungut ngelawan Jahwe!”+
12 Kenca si e suruh Musa kalak ngelebuh anak-anak Eliap eme Datan ras Abiram.+ Tapi nina Datan ras Abiram, “La kami nggit reh!
13 Enggo babandu kami ndarat arah negri si melala kel i je susu ras madu guna munuh kami i taneh mesawang* enda.+ Akapndu kin e sepele? Nce gundari kam ka atendu si nguasai kami?
14 I ja dage negri si melala kel i je susu ras madu+ si katakenndu e? Nindu berendu atendu taneh ras kebun anggur jadi jang kami. La kin lah gelah bagi kalak pentang atendu kalak e ngikuti kam?* Labo kami nggit reh!”
15 Emaka merawa kel Musa janah nina man Jahwe, “Ula perdiateken persembahen pangan* kalak e. La pernah kubuat sada pe kelede kalak e janah la pernah kuban si jahat man kalak e.”+
16 Kenca si e nina Musa man Korah, “Pagi erpagi-pagi, rehlah kena kerina ku lebe-lebe Jahwe. Kam, si ndukung kam, bage pe Harun.
17 Masing-masing kena arus maba ingan rara, tama kemenyan ku bas, janah baba ku lebe-lebe Jahwe. Kerina ingan rara e 250 buena. Radu ras Harun pagi kam reh janah baba ingan rara kena.”
18 Emaka masing-masing kalak e maba ingan rarana, tamana rara api ras kemenyan ku bas, janah tedis kalak e i pintu kemah perjumpan radu ras Musa bage pe Harun.
19 Sanga pepulung Korah kerina si ndukung ia+ i lebe-lebe pintu kemah perjumpan, teridah kemulian Jahwe janah kerina kalak Israel banci ngidahsa.+
20 Nina Jahwe man Musa ras Harun,
21 “Pisahken diri kena arah kelompok e, gelah banci mis Kukernepken kalak e.”+
22 Megi si e sujud Musa ras Harun janah nina, “O Dibata, Dibata si mereken kegeluhen man kerina kalak,+ merawa nge Kam man kerina bangsa enda perban dosa sekalak jelma?”+
23 Kenca si e nina Jahwe man Musa,
24 “Bagendalah nindu man kalak Israel, ‘Pedauh diri kena arah sekeliling kemah Korah, Datan, ras Abiram!’”+
25 Kenca si e berkat Musa radu ras peminpin-peminpin+ Israel njumpai Datan ras Abiram.
26 Nina Musa man kalak Israel, “Pedauh diri kena arah kemah kalak jahat e janah ula kuit kena kadena pe, gelah la kena kernep perban dosa kalak e.”
27 Emaka mis ipedauh kalak e dirina arah sekeliling kemah Korah, Datan, ras Abiram. Ndarat Datan ras Abiram arah kemahna janah tedis i pintu kemahna radu ras diberuna, anakna, bage pe anakna si kitik denga.
28 Kenca si e nina Musa, “Arah kai si nandangi terjadi enda iteh kena kari maka Jahwe kap si nuruh aku ngelakoken kerina e, labo sura-suraku* si kulakoken enda.
29 Adi bagi biasa kari perpate kalak e kerina, janah adi nanami kalak e hukumen bagi si biasana nanami kerina kalak, arah e teridah maka labo Jahwe si nuruh aku.+
30 Tapi adi ban Jahwe kari terjadi man kalak e kai si lenga pernah terjadi janah terbelah taneh ras ibendutna kalak e bage pe kerina si lit bas kalak e, janah nggeluh-nggeluh kalak e masuk ku Kuburen,* iteh kena kari maka kalak e kerina la ngergai Jahwe.”
31 Dung kenca Musa ngerana, terbelah taneh si idedeh Datan ras Abiram.+
32 Jenari ibendut taneh kerina kalak e bage pe keluargana ras kerina si ndukung Korah+ bage pe kerina barang-barangna.
33 Emaka nusur me kalak e kerina nggeluh-nggeluh ku Kuburen* bage pe kerina barang kalak e. Kenca si e tertutup taneh janah bene kalak ndai kerina.+
34 Sanga megi sora nderkuh kalak ndai, kiamen me kalak Israel janah serko, nina, “Ula kari bendut taneh ka kita!”
35 Kenca si e nusur api arah Jahwe+ janah meseng 250 kalak si sangana mpersembahken kemenyan e.+
36 Nina Jahwe man Musa,
37 “Suruhlah Eleasar anak Harun muat kerina ingan rara+ arah api e, perban ingan-ingan rara e badia. Suruhlah amburkenna rarana ku ingan si ndauh.
38 Ingan-ingan rara kalak si mate perban dosana e arus ibuat janah iban jadi lempengen si menipes guna ngelapisi ingan nutung* persembahen.+ E kerina enggo ipersembahken i lebe-lebe Jahwe, emaka e enggo badia. E arus jadi tanda man kalak Israel.”+
39 Emaka ibuat Imam Eleasar kerina ingan rara si iban arah tembaga si enggo ipersembahken kalak si mate tertutung ndai, jenari tempahna jadi lempengen guna ngelapisi ingan nutung persembahen,
40 bagi si ikataken Jahwe arah Musa. E jadi persinget man kalak Israel maka la lit si banci nutung kemenyan i lebe-lebe Jahwe+ selain keturunen Harun, janah gelah la lit si bagi Korah bage pe kerina si ndukung ia.+
41 Paginna, kerina kalak Israel jungut-jungut man Musa ras Harun,+ janah nina, “Enggo bunuh kena umat Jahwe.”
42 Sanga kalak e pulung ngelawan Musa ras Harun, itulihken kalak e ku kemah perjumpan janah idah kalak e embun nutupi kemah e. Teridah kemulian Jahwe i je.+
43 Lawes Musa ras Harun ku lebe-lebe kemah perjumpan.+
44 Jenari nina Jahwe man Musa,
45 “Pedauhlah diri kena arah bangsa e, mis ateKu Kukernepken kalak e.”+ Megi si e sujud kalak e ku taneh.+
46 Kenca si e nina Musa man Harun, “Buatlah ingan rara janah tama rara arah ingan nutung persembahen+ ku bas, jenari tutunglah kemenyan. Meter kam lawes ku bangsa e janah ban pendamen guna kalak e,+ perban enggo merawa Jahwe. Penakit enggo ngkenai enterem jelma!”
47 Mis ibuat Harun ingan rara bagi si perentahken Musa. Kenca si e kiam ia ku tengah-tengah kalak Israel. Kepeken, penakit enggo ngkenai enterem jelma. Emaka tamana kemenyan ku bas ingan rara e janah banna pendamen guna bangsa e.
48 Terus ia tedis i antara kalak si mate ras si nggeluh, dungna ngadi penakit ndai.
49 Lit 14.700 kalak si mate perban wabah penakit e. Enda lenga termasuk si mate gara-gara Korah.
50 Kenca enggo ngadi penakit e, mulih Harun ndahi Musa ku pintu kemah perjumpan.
Cataten i teruh
^ Taneh si mbelang si jarang iingani.
^ As. “La kin lah cungkilndu atendu mata kalak e?”
^ Ntah “labo arah ukurku.”
