Bilangen 18:1-32
18 Kenca si e nina Jahwe man Harun, “Kam ras anak-anakndu si dilaki bage pe keturunenndu pagi si ertanggung jawap adi lit si ngelanggar aturen kerna ingan si badia.+ Adi lit si ngelanggar aturen kerna dahin imam,+ kam ras anak-anakndu si dilaki si ertanggung jawap.
2 Baba ka senina-seninandu arah suku Lewi guna nampati kam ras anak-anakndu. Suruh kalak e erdahin ras kam bage pe ngelayani kam+ ras ngelayani anak-anakndu i lebe-lebe kemah perjumpan.+
3 Arus dalanken kalak e tugas si berekenndu bage pe tugas kalak e i bas kemah.+ Tapi la banci deheri kalak e perlengkapen ingan si badia bage pe ingan nutung* persembahen, gelah kena bage pe kalak e la mate.+
4 Arus kalak e ikut ras kam janah dalanken kalak e tugasna bas kemah perjumpan bage pe tugasna ngelayani bas kemah e. Tapi kalak si la iijinken* la banci ndeheri kena.+
5 Arus dalanken kena tugas kena bas ingan si badia+ bage pe bas ingan nutung persembahen,+ gelah lanai Aku merawa+ man kalak Israel.
6 Enggo Kupisahken senina-senina kena kalak Lewi arah kalak Israel nari guna jadi pemere man kena.+ Kalak e enggo jadi jang Jahwe guna ngelayani i kemah perjumpan.+
7 Kam ras anak-anakndu si arus ndalanken tugas-tugas imam si lit hubungenna ras ingan nutung persembahen bage pe si lit i balik tirai.+ Kena kari si ndalanken tugas-tugas e.+ Enggo Kubereken tugas e jadi pemere man kena. Kalak si la iijinken* si ndeheri ingan si badia, arus ibunuh.”+
8 Kenca si e nina Jahwe man Harun, “Enggo Kulantik kam guna ngurus sumbangen si ibereken man bangKu.+ Arah kerina persembahen si badia si isumbangken kalak Israel, lit bagin si Kubereken man bandu ras anak-anakndu. Si e terus pagi jadi bagin kena.+
9 Arah persembahen si seh kel badiana si itutung alu api, si jadi bagin kena ibuat arah persembahen si ibereken kalak Israel, e termasuk arah persembahen pangan,*+ persembahen dosa,+ ras persembahen kesalahen.+ E seh kel badiana man bandu bage pe man anak-anakndu.
10 Enda arus pan kena bas ingan si seh kel badiana.+ Kerina dilaki banci manca. Enda arus badia kel iakap kena.+
11 Si termasuk ka jadi bagin kena eme persembahen si iayunken+ si ibereken kalak Israel.+ Enggo Kubereken kerina e man bandu bage pe man anak-anakndu si dilaki ras si diberu.+ Kerina keluargandu si la najis banci manca.+
12 “Kerina si mejilena si ibereken kalak e man Jahwe, Kubereken man kena+ eme hasil si pertama+ arah minak saitun, anggur mbaru, bage pe biji-bijin.*
13 Kerina hasil si pertama arah juma kalak e si berekenna man Jahwe, jadi bagin kena.+ Kerina keluargandu si la najis banci manca.
14 “Kerina si lit bas Israel si enggo ikhususken* man Dibata jadi bagin kena.+
15 “Kerina anak si pertama lahir+ si ibereken kalak e man Jahwe jadi baginndu, la soal e anak manusia ntah pe anak binatang. Tapi arus tebusindu anak si pertama arah manusia+ bage pe anak si pertama arah binatang si ipantangken.+
16 Arus tebusindu tiap anak sintua arah manusia sanga umurna sebulan ku datas. Erga si arus galarindu guna nebusisa eme lima sekel*+ pirak menurut timbangen si biasa ipake bas ingan si badia. Sada sekel seri ras 20 gera.*
17 Anak lembu si pertama si jantan, biri-biri jantan, ras kambing ngenca si la banci itebusi.+ Kerina e badia. Darehna arus ipercikken ku ingan nutung persembahen,+ janah lemakna arus itutung jadi persembahen si itutung alu api, si merim* akap Jahwe.+
18 Dagingna jadi jangndu bali bagi dada ras nahe kanan si jadi persembahen si iayunken.+
19 Kerina sumbangen si badia si ibereken kalak Israel man Jahwe,+ Kubereken man bandu bage pe man anak-anakndu si dilaki ras si diberu, kerina e lalap jadi bagin kena.+ Enda perjanjin sira* i lebe-lebe Jahwe man bandu bage pe man keturunenndu seh rasa lalap.”
20 Kenca si e nina Jahwe man Harun, “La pagi lit warisenndu bas Israel janah la pagi lit taneh si jadi baginndu.+ Aku pagi si njaga ras si mereken keperlunndu* i tengah-tengah kalak Israel.+
21 “Kerina sepersepuluhen+ si bereken kalak Israel man bangKu enggo Kubereken man kalak Lewi jadi warisen. Enda si jadi imbalen man kalak e perban kalak e ngelayani bas kemah perjumpan.
22 Kalak Israel la banci ndeheri kemah perjumpan. Ise pe si ndeherisa pasti erdosa janah mate.
23 Kalak Lewi ngenca si banci ndalanken tugas bas kemah perjumpan janah kalak e si ertanggung jawap nandangi kesalahen kalak Israel.+ La lit warisen man kalak Lewi bas tengah-tengah kalak Israel.+ Peraturen enda arus terus patuhi kena bage pe keturunen kena.
24 Sumbangen sepersepuluhen si bereken kalak Israel man Jahwe enggo Kubereken man kalak Lewi jadi warisen kalak e. E me sebapna Kukataken man kalak Lewi maka la banci kalak e dat warisen i tengah-tengah kalak Israel.”+
25 Kenca si e nina Jahwe man Musa,
26 “Bagendalah nindu man kalak Lewi, ‘Aloken kena pagi sepersepuluhen arah kalak Israel janah e me si jadi warisen kena.+ Arah bagin e arus sumbangken kena sepersepuluh man Jahwe.+
27 Sumbangen e pagi si ianggap jadi sumbangen kena. E ianggap bali bagi biji-bijin si ibuat arah ingan ngerik* nari,+ bagi minak, ntah pe bagi lau anggur si seh kel buena arah ingan meras anggur nari.
28 Alu bage, kena pe banci mereken sumbangen man Jahwe. Aloken kena sepersepuluhen arah kalak Israel janah arah sepersepuluhen e bereken kena ka sumbangen man Jahwe ku Imam Harun.
29 Arah kerina sumbangen si badia si ibereken man kena, arus sumbangken kena si mehulina+ man Jahwe.’
30 “Kataken man kalak e, ‘Kenca enggo bere kena si mehulina arah bagin kena e, sisana jadi jang kena, kalak Lewi. E ianggap hasil arah ingan ngerik ras ingan meras anggur bage pe minak.
31 Sisana e banci ipan kena ras keluarga kena i japa pe, perban e upah kena bas ngelayani i kemah perjumpan.+
32 Labo kena ersalah ngelakoken si e adi terus bereken kena si mehulina arah kai si ibereken man kena. Ula ban kena jadi najis kai si badia si ibereken kalak Israel. Adi najis ban kena, pasti kena mate.’”+
Cataten i teruh
^ As. “kalak asing,” eme dilaki si labo arah keturunen Harun.
^ As. “kalak asing,” eme dilaki si labo arah keturunen Harun.
^ Eme kerina si ipersembahken man Dibata, si la banci ibatalken ntah pe itebusi.
^ 1 gera = 0,57 gram.
^ Ntah “si erban meriah.”
^ Eme perjanjin rasa lalap janah la banci iubah.
^ As. “Aku kap baginndu ras warisenndu.”
