Bilangen 19:1-22
-
Lembu si megara ras lau guna mbersihken (1-22)
19 Nina Jahwe ka man Musa ras Harun,
2 “Enda undang-undang si itetapken Jahwe: ‘Suruhlah buat kalak Israel sada lembu si megara man bandu. Lembu e arus sehat, la lit cacatna,+ janah la pernah maba baban.
3 Arus berekenndu lembu e man Imam Eleasar, jenari babana ku darat perkemahen janah igeleh kari lembu e i lebe-lebe Eleasar.
4 Kenca si e ibuat Imam Eleasar kari deba dareh lembu e alu jari-jarina janah percikken pitu kali ku lebe-lebe kemah perjumpan.+
5 Tutung lembu e, termasuk kulitna, dagingna, darehna, ras kotorenna i lebe-lebe Imam Eleasar.+
6 Jenari buat imam e kayu aras, hisop,+ ras benang megara, janah benterkenna kerina e ku api eme ku ingan lembu e itutung.
7 Kenca si e cuci imam e bajuna janah ridi ia, dung e maka banci ia masuk ku bas perkemahen. Tapi imam e jadi najis seh ngasa terbenam matawari.
8 “‘Kalak si nutung lembu e arus cucina bajuna janah ridi ia. Najis ia seh ngasa terbenam matawari.
9 “‘Kenca si e kalak si la najis arus mpepulung abu arah lembu e,+ eme arah lembu si enggo ipersembahken jadi persembahen dosa. Arus tamakenna abu e ku ingan si bersih i darat perkemahen, gelah banci ipake kalak Israel sanga nikapken lau guna acara mbersihken diri.+
10 Arus icuci kalak si muat abu e bajuna janah jadi najis ia seh ngasa terbenam matawari.
“‘Enda me peraturen si arus terus ipatuhi kalak Israel bage pe kalak asing si tading ras kalak e.+
11 Ise pe si ngkuit kalak mate jadi najis pitu wari dekahna.+
12 Arus bersihkenna dirina alu lau e bas wari si peteluken, janah bas wari si pepituken lanai ia najis. Tapi adi la bersihkenna dirina bas wari si peteluken, bas wari si pepituken tetap denga ia najis.
13 Adi lit kalak si ngkuit mayat janah la bersihkenna dirina, kalak e enggo erban kemah ingan ersembah man Jahwe jadi najis,+ janah arus ia ibunuh.+ Ia najis janah tetap jadi najis perban lau guna mbersihken diri+ la ipercikken man bana.
14 “‘Adi lit kalak si mate bas kemah, enda me undang-undang si arus ipatuhi: Ise pe si masuk ku kemah e ntah pe si sangana bas kemah e, jadi najis pitu wari dekahna.
15 Kerina kudin-kudin si la itutupi jadi najis.+
16 Ise pe si ngkuit mayat kalak si ibunuh alu pedang, ntah pe si mate i darat kemah, ntah pe si ngkuit kuburen ntah tulan kalak mate, jadi najis pitu wari dekahna.+
17 Arus ibuat sitik abu arah persembahen dosa si itutung ndai guna kalak si najis e. Kenca si e amburken lau si bersih ku abu e i bas sada ingan.
18 Dung e sekalak si la najis+ arus muat batang hisop,+ jenari celupkenna ku lau ndai. Kenca si e percikkenna ku kemah e, ku kerina kudin-kudin, ku kalak si lit bas kemah, ku kalak si ngkuit tulan, ntah si ngkuit mayat, ntah si ngkuit kuburen, ntah pe si ngkuit kalak si mate ibunuh.
19 Bas wari si peteluken ras wari si pepituken arus percikken kalak si la najis ndai lau e ku kalak si najis. Janah bas wari si pepituken kalak si najis e ipebadia arah dosana.+ Kenca si e arus icuci kalak si najis e bajuna janah ridi ia, jenari sanga terbenam matawari lanai ia najis.
20 “‘Tapi kalak si najis si la ipebadiana dirina arus ibunuh, perban enggo banna ingan Jahwe si badia jadi najis.+ Lau guna mbersihken diri la ipercikken man bana, emaka najis ia.
21 “‘Enda peraturen si arus terus ipatuhi kalak Israel: Kalak si mercikken lau guna mbersihken diri+ arus cucina bajuna, janah kalak si ngkuit lau e jadi najis seh ngasa terbenam matawari.
22 Kai pe si ikuit kalak si najis jadi najis, janah kalak si ngkuit kai pe si ikuit kalak si najis ndai jadi najis ka seh asa terbenam matawari.’”+
