Bilangen 20:1-29
20 Bas bulan pertama, seh me kalak Israel bas Taneh Mesawang* Sin janah erkemah kalak e i Kades,+ i je Miriam+ mate ras ikuburken.
2 Bas sada waktu la lit lau man kalak Israel,+ emaka pulung kalak e guna ngelawan Musa ras Harun.
3 Jungut-jungut kalak e man Musa,+ nina, “Padin min ndai kami mate sanga teman-teman kami mate i lebe-lebe Jahwe!
4 Engkai maka baba kena umat Jahwe enda ku taneh mesawang* enda? Gelah mate nge ate kena kami ras asuh-asuhen kami i jenda?+
5 Engkai baba kena kami ndarat arah Mesir nari ku ingan si bahaya enda?+ I jenda la kami banci nuan-nuan, nuan benih ara, benih anggur, ntah pe benih delima. Lau pe la lit i jenda.”+
6 Kenca si e tadingken Musa ras Harun me kalak si pulung ndai janah lawes kalak e ku pintu kemah perjumpan, jenari sujud kalak e janah idah kalak e kemulian Jahwe.+
7 Kenca si e nina Jahwe man Musa,
8 “Buatlah tongkat e, kenca si e kam ras seninandu Harun arus ngelebuh kalak e gelah pulung. I lebe-lebe kalak e, suruhlah tebing batu e mpedarat lau. Arah tebing batu e kari pedaratndu lau janah berendu kalak e minem bage pe asuh-asuhen kalak e.”+
9 Emaka ibuat Musa tongkat e arah lebe-lebe Jahwe,+ bagi si iperentahken man bana.
10 Kenca si e ipepulung Musa ras Harun kalak ndai ku lebe-lebe tebing batu e, jenari nina, “O pemberontak, begikenlah! Arus kin pedarat kami lau man kena arah tebing batu enda?”+
11 Angkat Musa tanna janah pekpekna tebing batu e alu tongkatna dua kali. Jenari ndaraten melala lau arah batu e. Emaka minem kerina kalak e bage pe asuh-asuhenna.+
12 Dung e nina Jahwe man Musa ras Harun, “Perban la kena erkiniteken man bangKu janah la muliaken kena Aku i lebe-lebe kalak Israel, emaka labo kena si maba bangsa enda ku negri si nandangi Kubereken man kalak e.”+
13 Kejadin e terjadi i Mata Lau Meriba,*+ i je kalak Israel jungut-jungut man Jahwe janah i je ka cidahkenNa maka Ia badia.
14 Sanga i Kades, suruh Musa piga-piga utusen njumpai raja Edom+ guna ngataken, “Tuan, bagenda nina seninandu kalak Israel,+ ‘Enggo tehndu uga kesusahen si nanami kami.
15 Mbarenda, nini bulang kami lawes ku Mesir+ janah ndekah kami tading i je.+ Jahat kel perbahanen kalak Mesir man kami bage pe man nini bulang kami.+
16 Emaka nderkuh kami mindo penampat man Jahwe,+ begikenNa kami janah suruhNa sada malekatNa+ mabai kami ndarat arah Mesir. Gundari enggo seh kami i Kades eme kota si lit bas perbatasen daerahndu.
17 Berendu min kami lewat arah negrindu. Labo kari kami lewat arah jumandu ntah pe kebun anggurndu. Labo kari inem kami lau sumurndu si apai pe. Arah Dalan Raja* ngenca kari kami lewat, labo kami belok ku kanan ntah pe ku kiri seh ngasa lewati kami daerahndu e.’”+
18 Tapi nina raja Edom man bana, “La banci kena lewat arah negri kami. Adi lewat kena, pasti serang kami alu pedang.”
19 Nina kalak Israel ka man bana, “Arah pasar si galang ngenca kari kami lewat. Adi inem kami ntah pe inem asuh-asuhen kami laundu, pasti nge galari kami.+ Lewat saja nge ate kami.”+
20 Tapi nina raja Edom, “La banci kena lewat.”+ Jenari ndarat ia radu ras pasukenna si enterem ras megegeh guna nyerang kalak Israel.
21 La bere raja Edom kalak Israel ngelewati daerahna, emaka lawes kalak Israel arah dalan si deban.+
22 Berkat kerina kalak Israel arah Kades nari jenari seh ku Gunung Hor.+
23 Bas Gunung Hor e, eme si lit i perbatasen negri Edom, ngerana Jahwe man Musa ras Harun, nina,
24 “Mate kari Harun janah ikuburken ia bagi nini bulangna.+ Labo ia masuk ku negri si nandangi Kubereken man kalak Israel, perban kena duana enggo ngelawan perentahKu i Mata Lau Meriba.+
25 Babalah Harun ras anakna Eleasar nangkih ku Gunung Hor.
26 Tangtangilah baju imam jang Harun+ janah pakeken ku anakna Eleasar.+ Bas ingan e kari Harun mate.”
27 Emaka lakoken Musa bagi si perentahken Jahwe. Nangkih kalak e ku Gunung Hor janah kerina kalak Israel ngidahsa.
28 Kenca si e itangtangi Musa baju imam jang Harun janah pakekenna man Eleasar anak Harun. Dung e mate Harun i datas gunung e.+ Jenari nusur Musa ras Eleasar arah gunung e.
29 Sanga iteh kalak Israel maka Harun enggo mate, tangisi kalak e ia 30 wari dekahna.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Ertina “Ersoal; Sijawapen.”
^ Eme pasar galang.
