Bilangen 21:1-35
21 Sanga begi raja negri Arat+ maka kalak Israel reh arah Atarim, serangna kalak Israel janah lit ka si itabanna. Raja negri Arat e kalak Kanaan si tading i daerah Negep.*
2 Emaka erjanji kalak Israel man Jahwe, nina, “Adi berekenNdu taluken kami bangsa e, pasti hancurken kami kota-kota kalak e.”
3 Begiken Jahwe pemindon kalak Israel janah bereNa taluken kalak e kalak Kanaan. Kernepken kalak e kalak Kanaan janah hancurken kalak e kota-kotana. Emaka igelari kalak e ingan e Horma.*+
4 Arah Gunung Hor,+ lawes kalak e arah dalan ku Laut Merah gelah la ngelewati negri Edom.+ Latih akap kalak e bas perdalanen e.
5 Emaka terus ilawan kalak e Dibata ras Musa,+ nina, “Engkai maka babandu kami ndarat arah Mesir gelah mate bas taneh mesawang* enda? I jenda la lit pangan, la lit lau.+ Enggo mutah ate kami man roti si enggo ciga ate kami.”+
6 Emaka isuruh Jahwe melala nipe si erbisa reh ku tengah-tengah kalak Israel, tagutina kalak e. Enterem kalak Israel mate perban itagut nipe e.+
7 Emaka dahi kalak e Musa janah nina, “Enggo erdosa kami perban ilawan kami Jahwe bage pe kam.+ Ertotolah kam man Jahwe gelah pedauhNa kerina nipe enda arah kami.” Emaka ertoto Musa guna bangsa e.+
8 Kenca si e, nina Jahwe man Musa, “Banlah patung nipe si erbisa janah tamaken bas sada tiang. Adi lit si itagut nipe, arus nenna patung e gelah ula ia mate.”
9 Mis iban Musa nipe arah tembaga+ janah tamakenna bas sada tiang.+ Ise pe si tagut nipe, labo mate adi nenna nipe tembaga e.+
10 Kenca si e pindah kalak Israel janah erkemah i Obot.+
11 Jenari pindah ka kalak e arah Obot janah erkemah i Abarim,+ eme taneh mesawang* i sebelah timur, si pengalana ku Moap.
12 Dung e pindah ka kalak e janah erkemah i Lembah* Seret.+
13 I je nari berkat ka kalak e, janah erkemah i daerah Lembah Arnon.+ Lembah Arnon e lit i taneh mesawang* si daerahna mulai arah perbatasen daerah kalak Amori. Lembah Arnon e perbatasen antara Moap ras daerah kalak Amori.
14 E me sebapna maka lit tertulis bas buku Peperangen Jahwe, “Wahep i Supa, ras lembah-lembah* i Arnon.
15 Lereng* lembah-lembah* e seh ku Ar ras ku perbatasen Moap.”
16 Jenari berkat kalak e ku sumur Beer. Kerna sumur e pernah kataken Jahwe man Musa, “Pepulunglah bangsa e, maka Kubereken lau man kalak e.”
17 Paksa si e endeken kalak Israel lagu enda,
“O sumur, mbue min laundu! Rendelah man bana!
18 Sumur si iban pejabat-pejabat, si ikurak bangsawan-bangsawan,Alu tongkat kalak e, alu tongkat kekuasanna.”
Kenca si e, berkat kalak e taneh mesawang* nari ku Matana,
19 Matana nari ku Nahaliel, janah arah Nahaliel ku Bamot.+
20 Bamot nari berkat kalak e ku lembah si lit i daerah Moap,+ i teruh puncak Pisga+ si pengalana ku arah Jesimon.*+
21 Kenca si e suruh kalak Israel utusen ndahi Sihon raja kalak Amori, nina kalak e,+
22 “Berendu min kami lewat arah negrindu, Tuan. Labo kari kami erdalan arah jumandu ntah pe arah kebun anggurndu. Labo kari inem kami lau sumurndu si apai pe. Arah Dalan Raja* ngenca kami kari lewat seh ngasa lewati kami daerahndu.”+
23 Tapi la bere Raja Sihon kalak Israel lewat arah daerahna. Pepulungna prajuritna janah serangna kalak Israel i taneh mesawang.* Sanga seh i Jahas, erperang kalak e ras kalak Israel.+
24 Tapi taluken kalak Israel ia alu pedang+ janah irebut kalak Israel negrina,+ mulai arah Arnon+ seh ku Jabok+ si lit i deher daerah kalak Ammon. Tapi seh ngasa Jaser+ ngenca daerah si irebut kalak Israel, perban e perbatasen daerah kalak Ammon.+
25 Emaka rebut kalak Israel kerina kota-kota kalak e, janah tading kalak e bas kerina kota-kota kalak Amori,+ termasuk i Hesbon ras kerina kota si lit i sekelilingna.
26 Hesbon e kota ingan tading Sihon raja kalak Amori. Raja e pernah erperang ngelawan raja Moap janah rebutna kerina daerahna seh ku Arnon.
27 E me sebapna maka belasken kalak puisi guna nokohi enda,
“Rehlah ku Hesbon.
Pediatlah kota Sihon ibangun alu paguh.
28 Sebap enggo reh api arah Hesbon nari, api si gurlah arah kota Sihon nari.
Enggo keri itutung api e Ar i Moap, eme penguasa-penguasa si lit bas ingan-ingan si meganjang i Arnon.
29 Cilaka kena kalak Moap! Pasti kena ikernepken, o kalak si nembah Kemos!+
Banna anak kena si dilaki jadi pengungsi janah anak kena si diberu jadi tabanen Sihon raja kalak Amori.
30 Ota sipanah kalak e;Ikernepken pagi Hesbon seh ku Dibon;+Ota sihancurken ia seh ku Nopa;Pediatlah api engkernepken kerinana seh ku Medeba.”+
31 Emaka tading kalak Israel i daerah kalak Amori.
32 Kenca si e isuruh Musa piga-piga dilaki jadi mata-mata ku Jaser.+ Irebut kalak e kota-kotana janah pelawesna kalak Amori si tading i je.
33 Kenca si e mutar balik kalak e janah lawes kalak e arah Dalan Basan. Jenari reh Og+ raja Basan ras kerina prajuritna njumpai kalak e guna erperang i Edrei.+
34 Nina Jahwe man Musa, “Ula mbiar man bana,+ sebap Kubereken pagi ia ras kerina rakyatna bage pe negrina ku tanndu.+ Lakokenndu pagi man bana bagi si lakokenndu man Sihon raja kalak Amori si tading i Hesbon.”+
35 Emaka taluken kalak e ia ras anak-anakna bage pe kerina prajuritna, sada pe la lit si selamat+ janah rebut kalak e negrina.+
Cataten i teruh
^ Ntah “Selatan.”
^ Ertina “Ikhususken guna Ikernepken.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Ntah “Reben-reben.”
^ Taneh si mbelang si jarang iingani.
^ Ntah banci saja “gurun; taneh mesawang.”
^ Eme pasar galang.
^ Taneh si mbelang si jarang iingani.
