Bilangen 22:1-41
22 Kenca si e berkat kalak Israel janah erkemah i Gurun Pasir Moap, i deher Lau Jordan si pengalana ku Jeriho.+
2 Balak+ anak Sipor enggo megi kerina si lakoken kalak Israel man kalak Amori.
3 Mbiar kel kalak Moap man kalak Israel perban kalak e seh kel teremna. Ban biarna enggo latih kel akap kalak e rukur.+
4 Emaka nina kalak Moap man peminpin-peminpin kalak Midian,+ “Pasti rebut bangsa e kari kerina daerah si lit i sekelilingta, bali bagi lembu si nggagati dukut i mbalmbal.”
Paksa si e Balak anak Sipor si jadi raja Moap.
5 Suruhna piga-piga kalak ngelebuh Bilham anak Beor i Petor,+ negri asalna si lit i deher Lau Eprat. Bagenda nina Balak, “Lit bangsa si ndarat arah Mesir nari, janah enggo dem banna negri enda,+ pas kel i lebe-lebeku kalak e erkemah.
6 Reh min kam janah sumpahi kalak e guna kepentingenku,+ sebap gegehen kalak e asangken aku. Alu bage ntah banci kari kutaluken kalak e janah kupelawes arah negri enda nari. Sebap kuteh ise pe si ipasu-pasundu pasti dat pasu-pasu janah ise pe si isumpahindu pasti kena sumpah.”
7 Emaka lawes peminpin-peminpin Moap ras Midian njumpai Bilham.+ Baba kalak e upah gelah isumpahi Bilham kalak Israel. Peseh kalak e pesan Balak man Bilham.
8 Megi si e nina Bilham man kalak e, “Erberngilah i jenda. Kai kari si kataken Jahwe man bangku kukataken man kena.” Emaka erberngi peminpin-peminpin Moap e bas ingan Bilham.
9 Kenca si e jumpai Dibata me Bilham janah nina,+ “Ise nge si ras kam e?”
10 Nina Bilham man Dibata si benar, “Balak raja Moap eme anak Sipor enggo ngirim pesan man bangku, nina,
11 ‘Lit bangsa si ndarat arah Mesir nari, janah enggo dem banna negri enda. Reh min kam janah sumpahi kalak e.+ Alu bage ntah banci kari kutaluken kalak e janah kupelawes arah negri enda nari.’”
12 Tapi nina Dibata man Bilham, “Ula kam lawes ras kalak e janah ula sumpahindu bangsa e, perban bangsa e enggo ipasu-pasu.”+
13 Paginna, medak Bilham janah nina man pejabat-pejabat Balak, “Mulihlah kena ku negri kena, perban la bere Jahwe aku lawes ras kena.”
14 Emaka mulih pejabat-pejabat Moap ndahi Balak janah nina, “La nggit Bilham ikut ras kami.”
15 Emaka suruh Balak ka terbuen pejabat si lebih ihamati asangken si pertama.
16 Dahi kalak e Bilham janah nina man bana, “Enda si kataken Balak anak Sipor: ‘Ula pediat kai pe si ngambati kam reh ndahi aku.
17 Pasti galang kuban upahndu janah pasti kulakoken kai pe si pindondu. Emaka reh min kam janah sumpahi bangsa e guna kepentingenku.’”
18 Tapi nina Bilham man pelayan-pelayan Balak e, “Bicara bere Balak pe aku rumahna si dem pirak ras emas, la banci kulanggar perentah Jahwe Dibataku, la soal e kitik ntah pe galang.+
19 Tapi erberngilah kena i jenda, ntah lit denga kari si deban si kataken Jahwe man bangku.”+
20 Paksa berngi, jumpai Dibata me Bilham janah nina man bana, “Adi reh kalak e ngelebuh kam, ikutkenlah kalak e. Tapi si Kukataken ngenca si banci katakenndu.”+
21 Paginna, medak Bilham janah sikapkenna keledena,* jenari lawes ia radu ras pejabat Moap e.+
22 Tapi merawa Dibata perban lawes ia, emaka halangi malekat Jahwe ia bas dalan. Bilham sangana nangkih keledena ras dua pelayanna nemani ia.
23 Sanga idah kelede e malekat Jahwe si maba pedang tedis bas dalan, cubaken kelede e ndarat arah dalan janah nilah ku juma-juma. Tapi pekpeki Bilham kelede e gelah mulihken ku dalan.
24 Kenca si e tedis malekat Jahwe i dalan si sempit si lit i antara dua kebun anggur janah lit tembok batu arah kanan ras kiri dalan e.
25 Sanga idah kelede e malekat Jahwe, rapatkenna bana ku tembok batu e, kicat nahe Bilham. Emaka pekpeki Bilham ka mulihi kelede e.
26 Kenca si e, mundur malekat Jahwe, jenari tedis ia bas ingan si sempit si la lit dalan guna nilah ku kiri ntah pe ku kanan.
27 Gempang kelede e sanga idahna malekat Jahwe. Merawa kel Bilham janah lalap pekpekina keledena e alu tongkatna.
28 Dungna iban Jahwe kelede e banci ngerana+ janah nina kelede e man Bilham, “Kai kin salahku man bandu maka enggo telu kali aku pekpekindu?”+
29 Nina Bilham man kelede e, “Perban enggo tokohim aku. Adi lit min ndai pedangku enggo kubunuh ko!”
30 Kenca si e nina kelede e man Bilham, “Aku kap kelede si nangkihindu sedekah geluhndu seh ngasa gundari. Pernah kin bagenda kuban man bandu?” Nina Bilham ngaloi, “Lang!”
31 Kenca si e, iban Jahwe banci idah Bilham+ malekat Jahwe si sangana tedis bas dalan janahna njemak pedang. Ngidah si e mis ia sujud.
32 Kenca si e nina malekat Jahwe man bana, “Engkai maka pekpekindu keledendu seh ngasa telu kali? Aku nge si reh ngambati kam sebap si lakokenndu e la cocok ras sura-suraku.+
33 Enggo telu kali idah kelede e aku janah cubakenna nilah.+ Adi la min ndai nilah kelede e pasti enggo kubunuh kam gundari. Tapi kelede e kupediat nggeluh.”
34 Nina Bilham man malekat Jahwe, “Enggo erdosa aku, perban la kuteh kepeken kam tedis bas dalan guna njumpai aku. Gundari adi la kin akapndu mehuli si kulakoken e, mulih dage aku.”
35 Tapi nina malekat Jahwe man Bilham, “Laweslah kam ras pejabat-pejabat e. Tapi kai si kukataken ngenca si banci katakenndu.” Emaka terusken Bilham perdalanenna ras pejabat-pejabat Balak.
36 Sanga begi Balak maka Bilham enggo reh, mis ia lawes njumpaisa i kota Moap i pinggir Lembah Arnon si lit bas perbatasen daerah e.
37 Nina Balak man Bilham, “Enggo kusuruh kalak ngelegi kam, tapi engkai maka la kam nggit reh? Akapndu kin la banci kubereken man bandu hadiah si merga?”+
38 Nina Bilham ngaloi Balak, “Gundari enggo reh aku, tapi la pediat Dibata aku ngataken kai pe. Kai si katakenNa man bangku ngenca si banci kukataken.”+
39 Emaka lawes Bilham ras Balak, janah seh kalak e i Kiryat Husot.
40 Igeleh* Balak lembu ras biri-biri, jenari kirimna deba dagingna man Bilham bage pe man pejabat-pejabat si ras ia.
41 Sanga erpagi-pagi, legi Balak me Bilham janah babana ia ku Bamot Baal. Bas ingan e nari banci idahna bangsa Israel.+
