Bilangen 23:1-30
23 Kenca si e nina Bilham man Balak, “Banlah pitu ingan nutung* persembahen+ i jenda janah sikapken pitu lembu jantan ras pitu biri-biri jantan man bangku.”
2 Mis lakoken Balak bagi si kataken Bilham. Kenca si e persembahken Balak ras Bilham me sada lembu jantan ras sada biri-biri jantan bas tiap ingan nutung persembahen.+
3 Dung e nina Bilham man Balak, “Timailah i jenda, i deher persembahen tutungenndu. Lawes aku lebe. Mbera-mbera jumpai Jahwe kari aku. Kai pe kari si katakenNa man bangku pasti kukataken man bandu.” Emaka lawes ia ku datas sada bukit.
4 Kenca si e jumpai Dibata me Bilham+ jenari nina Bilham man baNa, “Enggo kuban pitu ingan nutung persembahen janah enggo kupersembahken sada lembu jantan ras sada biri-biri jantan bas tiap ingan nutung persembahen e.”
5 Kataken Jahwe kai si arus ikataken Bilham+ janah nina, “Dahilah Balak, janah e si arus ikatakenndu.”
6 Emaka mulih ia janah idahna Balak ras kerina pejabat-pejabat Moap sangana tedis deher persembahen tutungen.
7 Kenca si e katakenna puisi enda,+
“Balak raja Moap maba aku arah Aram nari,+Arah gunung-gunung si lit i timur.
Nina, ‘Rehlah, sumpahilah Jakup man bangku.
Rehlah, sumpahilah Israel.’+
8 Me la mungkin kusumpahi kalak si la isumpahi Dibata?
Me la mungkin kusumpahi kalak si la isumpahi Jahwe?+
9 Kuidah kalak e arah puncak gunung batu nari,Kunen kalak e arah bukit-bukit.
Selaku sada bangsa, serap inganna tading;+La akapna seri ia ras bangsa si deban.+
10 Ise si ngasup ngkira jumlah keturunen Jakup si bali bagi abu buena,+Ntah pe ngkira seperempat arah keturunen Israel?
Pediatlah aku mate selaku kalak si bujur,Pediatlah aku mate bagi kalak e.”
11 Kenca si e nina Balak man Bilham, “Kai si lakokenndu e? Kubaba kam ku jenda gelah sumpahindu musuh-musuhku, labo gelah pasu-pasundu.”+
12 Nina ngaloisa, “Arus kap kukataken kai si kataken Jahwe man bangku.”+
13 Nina Balak man bana, “Ota kita lawes ku ingan si deban. Jah nari kari, banci idahndu kalak Israel, tapi labo kerina. Sumpahi kalak e arah ingan e nari.”+
14 Emaka babana ia ku Mbalmbal Sopim, i puncak Pisga.+ Ban Balak pitu ingan nutung persembahen janah persembahkenna sada lembu jantan ras sada biri-biri jantan bas tiap ingan nutung persembahen.+
15 Nina Bilham man Balak, “Timai jenda i deher persembahen tutungenndu e. Ku jah lebe aku njumpai Dibata.”
16 Kataken Jahwe kai si arus ikataken Bilham janah nina,+ “Dahilah Balak, janah e si arus katakenndu.”
17 Emaka mulih ia janah idahna Balak ras kerina pejabat-pejabat Moap sangana tedis i deher persembahen tutungen. Isungkun Balak ia, nina, “Kai nina Jahwe man bandu?”
18 Kenca si e kataken Bilham puisi enda,+
“Tediskenlah Balak, janah begikenlah.
O anak Sipor, begikenlah aku.
19 Dibata labo bagi manusia si erbual+Ntah pe bagi manusia si berubah-ubah ukurna.*+
Kai si katakenNa pasti lakokenNa.
Kai pe nina pasti tepatiNa.+
20 Aku isuruh guna masu-masu,Dibata enggo masu-masu,+ janah la banci kuubah.+
21 Labo pediatNa ilmu sihir kai pe ngelawan Jakup,Janah labo bereNa kesusahen kai pe reh man kalak Israel.
Jahwe Dibatana kap ras kalak e,+Dibata pasti imuliaken selaku raja i tengah-tengah kalak e.
22 Enggo ibaba Dibata kalak e ndarat arah Mesir.+
Dibata bagi tanduk lembu jantan liar man kalak e.+
23 La lit guna-guna si banci ngelawan Jakup,+Ntah pe sumpah si banci ngelawan Israel.+
Gundari banci kataken kalak kerna Jakup ras Israel,
‘Nenlah kai si enggo ilakoken Dibata!’
24 Enda kap bangsa si tedis bagi singa,Tedis ia bagi singa.+
Labo ia gempang ope lenga ipanna mangsanaJanah inemna dareh binatang si terbunuh.”
25 Kenca si e nina Balak man Bilham, “Adi la kin banci sumpahindu kalak e, ula pasu-pasundu kalak e.”
26 Nina Bilham ngaloisa, “Me enggo kukataken man bandu, ‘Kai si kataken Jahwe ngenca si banci kukataken.’”+
27 Nina Balak ka man Bilham, “Ota kita ku ingan si deban. Banci saja arah ingan e kari pediat Dibata si benar sumpahindu bangsa e guna kepentingenku.”+
28 Emaka baba Balak me Bilham ku puncak Peor si pengalana ku Jesimon.*+
29 Kenca si e nina Bilham man Balak, “Banlah pitu ingan nutung persembahen i jenda janah sikapken pitu lembu jantan ras pitu biri-biri jantan man bangku.”+
30 Emaka lakoken Balak bagi si isuruh Bilham janah persembahkenna sada lembu jantan ras sada biri-biri jantan bas tiap ingan nutung persembahen e.