Bilangen 25:1-18
25 Sanga kalak Israel tading i Sitim,+ lakoken kalak e perbahanen seks si salah ras diberu-diberu arah kalak Moap.+
2 Ajak diberu-diberu e kalak Israel mpersembahken korban man dibata-dibatana.+ Jenari man kalak e janah sujud ku dibata-dibata kalak Moap.+
3 Ikut kalak Israel nembah Baal Peor,+ emaka merawa kel Jahwe man kalak Israel.
4 Nina Jahwe man Musa, “Tangkap kerina peminpin e. Bunuh kalak e janah gantung mayatna i lebe-lebe Jahwe, i lebe-lebe jelma si enterem, gelah lanai Jahwe merawa man kalak Israel.”
5 Kenca si e nina Musa man hakim-hakim kalak Israel,+ “Ise pe si ikut nembah Baal Peor arus bunuh kena.”+
6 Sanga kalak Israel ngandung bas pintu kemah perjumpan, reh sekalak dilaki arah kalak Israel maba sekalak diberu arah kalak Midian.+ Babana diberu e ku perkemahen. Lakokenna e i lebe-lebe Musa ras i lebe-lebe kalak Israel.
7 Sanga Pinehas+ anak Eleasar kempu Harun ngidah si e, mis ia keke arah tengah-tengah kalak Israel, jenari buatna sada tombak.
8 Kenca si e masuk ia ku kemah dilaki e jenari tebakna kalak e duana. Tebakna beltek* diberu e. Alu bage ngadi penakit si enggo ngkenai kalak Israel.+
9 Si mate perban wabah penakit e lit 24.000 kalak.+
10 Kenca si e nina Jahwe man Musa,
11 “Pinehas+ anak Eleasar kempu Imam Harun si erban ngadi rawaKu man kalak Israel. La pediatna kalak Israel nembah dibata si deban selain Aku.+ E me sebapna maka la Kukernepken kalak Israel.+
12 Emaka kataken man bana, ‘Kuban pagi perjanjin dame ras ia.
13 Enda jadi perjanjin maka ia ras keturunenna lalap pagi jadi imam.+ Sebap la pediatna lit kalak Israel nembah dibata si deban selain Aku,+ janah enggo banna ka pendamen man kalak Israel.’”
14 Gelar dilaki arah kalak Israel si ibunuh ras diberu arah kalak Midian e eme Simri anak Salu. Ia peminpin bas keluarga bapakna arah suku Simeon.
15 Gelar diberu arah kalak Midian si ibunuh e eme Kosbi anak Sur.+ Sur e peminpin bas keluarga bapakna i Midian.+
16 Nina Jahwe ka man Musa,
17 “Seranglah kalak Midian janah bunuh kalak e,+
18 perban enggo serangna kena alu cara si licik, enggo banna kena erdosa sanga i Peor.+ Pakena Kosbi, anak peminpin kalak Midian e, eme diberu si ibunuh+ sanga reh wabah penakit ku tengah-tengah kena perban erdosa kena i Peor.”+
Cataten i teruh
^ Ntah “alat kelamin.”