Bilangen 26:1-65
-
Sensus si peduaken man suku-suku Israel (1-65)
26 Kenca ngadi wabah penakit e,+ nina Jahwe man Musa bage pe man Eleasar anak Imam Harun,
2 “Banlah sensus guna ngkira jumlah kalak Israel si umurna 20 tahun ku datas, menurut keluarga bapak kalak e. Kira kerina si banci jadi prajurit bas Israel.”+
3 Emaka Musa ras Imam Eleasar+ ngerana man kalak Israel i Gurun Pasir Moap,+ i pinggir Lau Jordan i deher Jeriho.+ Nina,
4 “Banlah sensus guna ngkira jumlah kalak si umurna 20 tahun ku datas, bagi si perentahken Jahwe man Musa.”+
Enda me kalak Israel si ndarat arah Mesir nari:
5 Suku Ruben.+ (Ruben e anak Israel sintua. Lit piga-piga anakna dilaki janah gelar anak-anakna e jadi gelar keluarga bas suku Ruben.) Lit piga-piga keluarga bas suku Ruben,+ eme keluarga Henoh, keluarga Pallu,
6 keluarga Hesron, ras keluarga Karmi.
7 Enda ndai me keluarga-keluarga arah suku Ruben janah jumlah kalak si idaftarken lit 43.730 kalak.+
8 Anak Pallu si dilaki eme Eliap.
9 Anak Eliap si dilaki eme Nemuel, Datan, ras Abiram. Datan ras Abiram si ipilih arah bangsa Israel nari, janah kalak e si ngelawan Musa+ ras Harun radu ras kelompok Korah+ sanga ilawan kalak e Jahwe.+
10 Kenca si e terbelah taneh janah bendutna kalak e. Korah pe mate ipan api radu ras 250 kalak si ndukung ia.+ Kai si terjadi man kalak e jadi sada persinget man kalak Israel.+
11 Tapi anak-anak Korah si dilaki la mate.+
12 Lit piga-piga anak Simeon si dilaki+ janah gelar anak-anakna e jadi gelar keluarga bas suku Simeon. Lit piga-piga keluarga bas suku Simeon, eme keluarga Nemuel, keluarga Jamin, keluarga Jakin,
13 keluarga Sera, ras keluarga Saul.
14 Enda ndai me keluarga-keluarga arah suku Simeon janah jumlah kalak si idaftarken lit 22.200 kalak.+
15 Lit piga-piga anak Gat si dilaki+ janah gelar anak-anakna e jadi gelar keluarga bas suku Gat. Lit piga-piga keluarga bas suku Gat, eme keluarga Sepon, keluarga Haggi, keluarga Suni,
16 keluarga Osni, keluarga Eri,
17 keluarga Arot, ras keluarga Areli.
18 Enda ndai me keluarga-keluarga arah suku Gat janah jumlah kalak si idaftarken lit 40.500 kalak.+
19 Anak-anak Juda si dilaki+ eme Er ras Onan.+ Tapi Er ras Onan mate i negri Kanaan.+
20 Lit piga-piga anak Juda si dilaki janah gelar anak-anakna e jadi gelar keluarga bas suku Juda. Lit piga-piga keluarga bas suku Juda, eme keluarga Selah,+ keluarga Peres,+ ras keluarga Sera.+
21 Lit piga-piga anak Peres si dilaki janah gelar anak-anakna e jadi gelar keluarga bas suku Peres, eme keluarga Hesron+ ras keluarga Hamul.+
22 Enda ndai me keluarga-keluarga arah suku Juda janah jumlah kalak si idaftarken lit 76.500 kalak.+
23 Lit piga-piga anak Isakar si dilaki+ janah gelar anak-anakna e jadi gelar keluarga bas suku Isakar. Lit piga-piga keluarga bas suku Isakar, eme keluarga Tola,+ keluarga Puah,
24 keluarga Jasup, ras keluarga Simron.
25 Enda ndai me keluarga-keluarga arah suku Isakar janah jumlah kalak si idaftarken lit 64.300 kalak.+
26 Lit piga-piga anak Sebulon si dilaki+ janah gelar anak-anakna e jadi gelar keluarga bas suku Sebulon. Lit piga-piga keluarga bas suku Sebulon, eme keluarga Sered, keluarga Elon, ras keluarga Jahleel.
27 Enda ndai me keluarga-keluarga arah suku Sebulon janah jumlah kalak si idaftarken lit 60.500 kalak.+
28 Anak-anak Jusup si dilaki+ eme Manase ras Eperaim.+
29 Anak Manase si dilaki+ eme Mahir.+ Lit sada keluarga bas suku Manase eme keluarga Mahir. Anak Mahir si dilaki eme Gileat.+ Lit sada keluarga bas keluarga Mahir eme keluarga Gileat.
30 Enda keluarga-keluarga bas keluarga Gileat: Keluarga Jeser, keluarga Helek,
31 keluarga Asriel, keluarga Sikem,
32 keluarga Semida, ras keluarga Heper.
33 Anak Heper si dilaki eme Selapehat. Tapi Selapehat e la lit anakna dilaki, diberu ngenca anakna.+ Gelar anak-anakna+ eme Mahlah, Nuah, Hogelah, Milka, ras Tirsa.
34 Enda ndai me keluarga-keluarga arah suku Manase janah jumlah kalak si idaftarken lit 52.700 kalak.+
35 Lit piga-piga anak Eperaim si dilaki+ janah gelar anak-anakna e jadi gelar keluarga bas suku Eperaim. Lit piga-piga keluarga bas suku Eperaim, eme keluarga Sutela,+ keluarga Beker, ras keluarga Tahan.
36 Enda keluarga bas keluarga Sutela, eme keluarga Eran.
37 Enda ndai me keluarga-keluarga arah suku Eperaim janah jumlah kalak si idaftarken lit 32.500 kalak.+ Enda ndai me keturunen Jusup arah suku Manase ras suku Eperaim.
38 Lit piga-piga anak Benyamin si dilaki+ janah gelar anak-anakna e jadi gelar keluarga bas suku Benyamin. Lit piga-piga keluarga bas suku Benyamin, eme keluarga Bela,+ keluarga Asbel, keluarga Ahiram,
39 keluarga Sepupam, ras keluarga Hupam.
40 Anak-anak si dilaki arah Bela eme Ared ras Naaman.+ Keluarga-keluarga keturunen Bela eme keluarga Ared ras keluarga Naaman.
41 Enda ndai me keluarga-keluarga arah suku Benyamin janah jumlah kalak si idaftarken lit 45.600 kalak.+
42 Anak si dilaki arah Dan+ eme Husim. Lit sada keluarga bas suku Dan eme keluarga Husim.
43 Jumlah kalak si idaftarken arah keluarga Husim lit 64.400 kalak.+
44 Lit piga-piga anak Aser si dilaki+ janah gelar anak-anakna e jadi gelar keluarga bas suku Aser. Lit piga-piga keluarga bas suku Aser, eme keluarga Imnah, keluarga Iswi, ras keluarga Beria.
45 Lit piga-piga keluarga bas keluarga Beria, eme keluarga Heber ras keluarga Malkiel. Anak-anak Beria si dilaki eme Heber ras Malkiel.
46 Gelar anak Aser si diberu eme Serah.
47 Enda ndai me keluarga-keluarga arah suku Aser janah jumlah kalak si idaftarken lit 53.400 kalak.+
48 Lit piga-piga anak Naptali si dilaki+ janah gelar anak-anakna e jadi gelar keluarga bas suku Naptali. Lit piga-piga keluarga bas suku Naptali, eme keluarga Jahseel, keluarga Guni,
49 keluarga Jeser, ras keluarga Silem.
50 Enda ndai me keluarga-keluarga arah suku Naptali janah jumlah kalak si idaftarken lit 45.400 kalak.+
51 Jumlah kerina kalak Israel si idaftarken eme 601.730 kalak.+
52 Kenca si e nina Jahwe man Musa,
53 “Negri e arus ibagi-bagiken jadi warisen menurut gelar-gelar si enggo idaftar.+
54 Man suku si enterem jumlahna, arus tambahindu warisenna, man suku si sitik jumlahna, arus kurangindu warisenna.+ Warisen tiap suku arus ibereken sebanding ras jumlah kalak si terdaftar.
55 Tiap negri arus ibagi alu cara iundi.+ Arus aloken kalak e warisenna menurut suku nini bulangna.
56 Tiap warisen itentuken alu cara iundi jenari ibagiken man tiap suku si enterem bage pe si sitik jumlahna.”
57 Lit piga-piga keluarga si terdaftar arah suku Lewi+ eme keluarga Gerson, keluarga Kohat,+ ras keluarga Merari.
58 Keluarga-keluarga arah suku Lewi eme keluarga Lipni,+ keluarga Hebron,+ keluarga Mahli,+ keluarga Musi,+ ras keluarga Korah.+
Kohat eme bapak Amram.+
59 Gelar diberu Amram eme Johebet.+ Johebet e anak Lewi janah ia lahir i Mesir. Anak-anak Amram si ilahirken Johebet eme Harun, Musa, ras Miriam turang kalak e.+
60 Anak-anak Harun si dilaki eme Nadap, Abihu, Eleasar, ras Itamar.+
61 Tapi Nadap ras Abihu mate sanga mpersembahken api si la sah i lebe-lebe Jahwe.+
62 Jumlah kalak Lewi si idaftarken si umurna sada bulan ku datas lit 23.000 kalak.+ Kalak Lewi la idaftarken radu ras kalak Israel,+ perban kalak e la dat warisen bas Israel.+
63 Enda ndai me kalak si daftarken Musa ras Imam Eleasar sanga kalak Israel isensus bas Gurun Pasir Moap, si lit i pinggir Lau Jordan deher Jeriho.
64 Tapi kalak si isensus Musa ras Imam Harun i Taneh Mesawang* Sinai la termasuk bas kalak si idaftarken e.+
65 Perban enggo ikataken Jahwe, “Kalak e pasti mate i taneh mesawang.”*+ Emaka Kalep anak Jepune ras Josua anak Nun nari ngenca si nggeluh, si debanna enggo mate.+
