Bilangen 27:1-23
27 Kenca si e reh anak-anak Selapehat si diberu+ si gelarna Mahlah, Nuah, Hogelah, Milka, ras Tirsa. (Selapehat e arah suku Manase nari, ia anak Heper, Heper e anak Gileat, Gileat e anak Mahir, Mahir e anak Manase, janah Manase e anak Jusup.)
2 Tedis kalak e i lebe-lebe Musa, Imam Eleasar, peminpin-peminpin,+ ras kerina kalak Israel i pintu masuk kemah perjumpan, janah nina,
3 “Bapak kami mate i taneh mesawang,* tapi labo ia ikut bas kelompok si ndukung Korah ngelawan Jahwe.+ Perban dosana nge ia mate janah la lit anakna dilaki.
4 Engkai maka arus masap gelar bapak kami arah keluargana perban la lit anakna dilaki? Bere min kami taneh warisen bagi senina-senina bapak kami.”
5 Emaka peseh Musa masalah e man Jahwe.+
6 Kenca si e nina Jahwe man Musa,
7 “Payo si kataken anak-anak Selapehat e. Memang arus berendu taneh warisen man kalak e bali bagi man senina bapakna. Arus berekenndu man kalak e taneh warisen bapakna.+
8 Janah katakenlah man kalak Israel, ‘Adi lit sekalak dilaki mate janah la lit anakna dilaki, taneh warisenna arus ibereken man anakna si diberu.
9 Adi la lit anakna diberu, warisenna arus ibereken kena man seninana.
10 Adi la lit seninana, warisenna arus ibereken man senina bapakna.
11 Adi la lit senina bapakna, warisenna arus ibereken kena man keluargana si sada dareh ras ia. Man bana warisenna e. Enda me undang-undang si arus ipatuhi kalak Israel, bagi si perentahken Jahwe man Musa.’”
12 Kenca si e nina Jahwe man Musa, “Nangkihlah kam ku Gunung Abarim+ janah tataplah je nari negri si nandangi Kubereken man kalak Israel.+
13 Kenca enggo idahndu kari negri e, mate kam bagi seninandu Harun+ janah ikuburken kam bagi nini bulangndu.+
14 Sebap lawanndu perentahKu sanga jungut-jungut kalak Israel i Taneh Mesawang* Sin. La muliakenndu Aku i lebe-lebe kalak Israel sanga Kubereken lau+ man kalak e i Mata Lau Meriba,+ si ndeher ku Kades+ si lit i Taneh Mesawang Sin.”+
15 Kenca si e nina Musa man Jahwe,
16 “O Jahwe, Dibata si mereken kesah man kerina kalak, pilihlah sekalak dilaki jadi peminpin man bangsa enda,
17 gelah umat Jahwe la bagi biri-biri si la lit permakanna. Kalak si ipilih e kari si minpin kalak e, janah arus patuhi kalak e ia bas kai pe.”
18 Emaka nina Jahwe man Musa, “Lebuhlah Josua anak Nun, ia banci iandalken. Tamalah tanndu ku das takalna.+
19 Kenca si e suruh ia tedis i lebe-lebe Imam Eleasar bage pe i lebe-lebe kalak Israel, janah lantik ia jadi peminpin i lebe-lebe kalak e.+
20 Arus berekenndu deba kuasandu man bana+ gelah kerina kalak Israel nggit megiken ia.+
21 Arus ia tedis i lebe-lebe Imam Eleasar. Kenca si e ipake Imam Eleasar kari Urim*+ guna mindo petunjuk man Jahwe. Alu bage teh kena keputusenKu. Sanga ibere Josua kari perentah, kerina kalak Israel arus patuh man perentah e.”
22 Emaka lakoken Musa bagi si isuruh Jahwe. Babana Josua ku lebe-lebe Imam Eleasar bage pe kalak Israel.
23 Tamana tanna ku das takal Josua janah lantikna ia jadi peminpin,+ bagi si perentahken Jahwe man bana.+
