Bilangen 28:1-31
28 Kenca si e nina Jahwe man Musa,
2 “Peseh perentah enda man kalak Israel, ‘Arus bereken kena persembahen man bangKu, eme roti si man bangKu. Tutunglah e alu api i bas waktu si enggo itetapken gelah jadi persembahen si merim* Kuakap.’+
3 “Kataken man kalak e, ‘Persembahen si itutung alu api si arus ibereken man Jahwe eme dua biri-biri jantan si sehat si nguda denga janah umurna sada tahun. E me persembahen tutungen si ipersembahken alu ratur tiap wari.+
4 Sada biri-biri arus ipersembahken paksa erpagi-pagi, janah sada nari paksa karaben.*+
5 Persembahken ka persembahen pangan* radu ras biri-biri e, eme tepung halus si buena sada kilo* janah icampur ras minak saitun si buena hampir sada liter.*+
6 Enda ndai me persembahen tutungen si arus ipersembahken alu ratur,+ si enggo itetapken sanga i Gunung Sinai. E me persembahen si itutung alu api man Jahwe, si merim* akapNa.
7 Persembahken ka persembahen inemen eme inemen si lit alkoholna si buena hampir sada liter* guna tiap biri-biri.+ Curcurken e bas ingan si badia jadi persembahen inemen man Jahwe.
8 Biri-biri si sada nari arus ipersembahken paksa karaben. Bali bagi paksa erpagi-pagi, arus ka persembahken kena persembahen pangan ras persembahen inemen jadi persembahen si itutung alu api, si merim* akap Jahwe.+
9 “‘Tapi bas wari Sabat,+ arus persembahken kena dua biri-biri jantan si nguda denga janah sehat si umurna setahun ras tepung halus si buena dua kilo* janah icampur ras minak jadi persembahen pangan radu ras persembahen inemenna.
10 E me persembahen tutungen man wari Sabat, selain persembahen tutungen ras persembahen inemen si ratur ipersembahken.+
11 “‘Tiap awal bulan arus bereken kena dua lembu jantan si nguda denga, sada biri-biri jantan, ras pitu biri-biri jantan si nguda denga janah sehat si umurna sada tahun jadi persembahen tutungen man Jahwe.+
12 Persembahken ka persembahen pangan,+ eme tepung halus si buena telu setengah kilo* janah icampur ras minak man tiap lembu jantan, tepung halus si buena dua kilo* janah icampur ras minak man biri-biri jantan,+
13 ras tepung halus si buena sada kilo* janah icampur ras minak man tiap biri-biri jantan si nguda denga. Kerinana e persembahen tutungen, persembahen si itutung alu api si merim*+ akap Jahwe.
14 Persembahken ka persembahen inemen eme anggur si buena hampir dua liter* man tiap lembu jantan,+ sada liter lebih* man biri-biri jantan,+ ras hampir sada liter* man tiap biri-biri jantan si nguda denga.+ Enda ndai me persembahen tutungen si ipersembahken tiap bulan bas gedang-gedang tahun.
15 Persembahken ka sada kambing si nguda denga jadi persembahen dosa man Jahwe, selain persembahen tutungen ras persembahen inemen si alu ratur ipersembahken.
16 “‘Bas wari si pe-14-ken bas bulan pertama, lit Paskah man Jahwe.+
17 Bas wari si pe-15-ken bas bulan e lit perayan. Arus pan kena roti si la itama ragi pitu wari dekahna.+
18 Bas wari si pertama lit perpulungen si badia. La banci lakoken kena pendahin si mberat.
19 Arus ipersembahken kena dua lembu jantan si nguda denga, sada biri-biri jantan, ras pitu biri-biri jantan si nguda denga si umurna sada tahun jadi persembahen si itutung alu api man Jahwe. Binatang-binatang si ipersembahken e arus sehat.+
20 Kerina e arus ipersembahken radu ras persembahen pangan eme tepung halus si icampur minak.+ Persembahken tepung si buena telu setengah kilo* man tiap lembu jantan, janah dua kilo* man biri-biri jantan,
21 ras sada kilo* tepung man tiap biri-biri jantan si nguda denga.
22 Arus ka persembahken kena sada kambing jadi persembahen dosa guna erban pendamen man kena.
23 Kerina e arus ipersembahken kena selain persembahen tutungen si arus ipersembahken kena tiap erpagi-pagi.
24 Tiap wari arus persembahken kena e jadi pangan alu cara si seri pitu wari dekahna. E me persembahen si itutung alu api si merim* akap Jahwe. E arus ipersembahken radu ras persembahen tutungen ras persembahen inemen si alu ratur ipersembahken.
25 Bas wari si pepituken, arus ban kena perpulungen si badia.+ La banci lakoken kena pendahin si mberat.+
26 “‘Arus ban kena perpulungen si badia i bas Perayan Peranin+ eme bas wari rani si pertama+ sanga persembahken kena persembahen pangan si mbaru man Jahwe.+ La banci lakoken kena pendahin si mberat.+
27 Arus persembahken kena dua lembu jantan si nguda denga, sada biri-biri jantan, ras pitu biri-biri jantan si nguda denga si umurna setahun jadi persembahen tutungen, si merim* akap Jahwe.+
28 Arus ka persembahken kena persembahen pangan eme tepung halus si icampur minak, telu setengah kilo* tepung man tiap lembu jantan, janah dua kilo* tepung man biri-biri jantan,
29 ras sada kilo* tepung man tiap biri-biri jantan si nguda denga arah pitu biri-biri jantan ndai.
30 Persembahken ka sada kambing si nguda denga guna erban pendamen man kena.+
31 Kerina e arus ipersembahken radu ras persembahen tutungen, persembahen pangan, ras persembahen inemen si alu ratur ipersembahken. Kerina binatang si ipersembahken e arus sehat.+
Cataten i teruh
^ Ntah “si erban meriah.”
^ Maksudna, kenca terbenam matawari.
^ As. “si buena 1/4 hin.”
^ Ntah “si erban meriah.”
^ Ntah “si erban meriah.”
^ Ntah “2/10 epa.”
^ Ntah “si erban meriah.”
^ As. “ras 1/4 hin.”
^ As. “1/3 hin.”
^ Ntah “2/10 epa.”
^ Ntah “si erban meriah.”
^ Ntah “si erban meriah.”
^ Ntah “2/10 epa.”
