Bilangen 3:1-51
3 Enda keturunen Harun ras Musa sanga ngerana Jahwe man Musa i Gunung Sinai.+
2 Enda gelar anak-anak Harun si dilaki: Nadap (anak sintua), Abihu,+ Eleasar,+ ras Itamar.+
3 Enda ndai me gelar anak-anak Harun si dilaki si enggo ipilih ras ilantik guna ngelayani jadi imam.+
4 Tapi Nadap ras Abihu mate i lebe-lebe Jahwe sanga iban kalak e persembahen* si la sah man Jahwe+ i Taneh Mesawang* Sinai. Sanga kalak e mate lenga lit anakna. Eleasar+ ras Itamar+ me si terus ngelayani jadi imam radu ras Harun bapak kalak e.
5 Kenca si e nina Jahwe man Musa,
6 “Suruhlah suku Lewi+ ngadap ku lebe-lebe Imam Harun janah kalak e me si ngelayani+ ia.
7 Arus dalanken kalak e tanggung jawapna man Harun bage pe man kalak Israel i lebe-lebe kemah perjumpan eme alu ngelayani i kemah ingan ersembah.
8 Arus urus kalak e kerina perlengkapen+ kemah perjumpan janah arus dalanken kalak e tanggung jawapna man kalak Israel alu ngelayani bas kemah ingan ersembah.+
9 Arus berekenndu kalak Lewi man Harun bage pe man anak-anakna. Arah kerina kalak Israel, kalak e si itugasken nampati Harun.+
10 Arus pilihndu Harun ras anak-anakna guna ndahiken tugas-tugas imam.+ Kalak si la iijinken* si ndeheri ingan si badia arus ibunuh.”+
11 Nina Jahwe ka man Musa,
12 “Kupilih kalak Lewi arah kalak Israel nari guna nggantiken kerina anak sintua bas Israel,+ janah jadi jangKu me kalak Lewi.
13 Sebap kerina anak sintua jangKu kap.+ Sanga Kubunuh kerina anak sintua si lit bas Mesir,+ Kupebadia man bangKu kerina anak sintua arah manusia ras anak si pertama arah binatang si lit bas Israel.+ Kerina e jadi jangKu. Aku kap Jahwe.”
14 Kenca si e ngerana ka Jahwe man Musa i Taneh Mesawang* Sinai,+ nina,
15 “Daftarkenlah anak dilaki arah keturunen Lewi menurut keluarga bapak ras suku kalak e. Arus daftarkenndu kerina dilaki si umurna sada bulan ku datas.”+
16 Emaka daftarken Musa me kalak e bali bagi si perentahken Jahwe.
17 Enda anak-anak Lewi si dilaki: Gerson, Kohat, ras Merari.+
18 Lipni ras Simei+ eme anak-anak Gerson si dilaki. Gelar kalak e si jadi penggelaren man keluargana.
19 Amram, Ishar, Hebron, ras Usiel+ eme anak-anak Kohat si dilaki. Gelar kalak e si jadi penggelaren man keluargana.
20 Mahli+ ras Musi+ eme anak-anak Merari si dilaki. Gelar kalak e si jadi penggelaren man keluargana.
Enda ndai me keluarga-keluarga suku Lewi menurut keluarga bapak kalak e.
21 Arah keturunen Gerson lit keluarga Lipni+ ras keluarga Simei. Enda ndai me keluarga arah keturunen Gerson.
22 Kerina dilaki si umurna sada bulan ku datas si enggo terdaftar lit 7.500 kalak.+
23 Kerina keluarga keturunen Gerson erkemah i pudi kemah ingan ersembah+ eme i sebelah barat.
24 Peminpin arah keluarga keturunen Gerson eme Eliasap anak Lael.
25 Dahin keturunen Gerson+ bas kemah ingan ersembah eme ngurus kemah ingan ersembah ras kain kemah,+ kerina penutupna,+ bage pe tirai+ guna pintu masuk ku kemah perjumpan,
26 tirai+ si jadi dingding halamen, tirai+ man gerbang halamen si lit i sekeliling kemah ingan ersembah ras ingan nutung* persembahen, nali-nali kemah, ras kai pe si lit hubungenna ras si e kerina.
27 Bas keturunen Kohat, lit keluarga Amram, keluarga Ishar, keluarga Hebron, ras keluarga Usiel. Enda ndai me keluarga-keluarga arah keturunen Kohat.+
28 Jumlah kerina dilaki si umurna sada bulan ku datas lit 8.600 kalak. Kalak e ertugas ngurus ingan si badia.+
29 Kerina keluarga keturunen Kohat erkemah i selatan kemah ingan ersembah.+
30 Peminpin keluarga keturunen Kohat eme Elisapan anak Usiel.+
31 Kalak e si ngurus Peti Perjanjin,*+ meja,+ ingan lampu,+ ingan nutung persembahen,+ perlengkapen+ si ipake bas ingan si badia, tirai,+ ras kai pe si lit hubungenna ras si e kerina.+
32 Peminpin kalak Lewi eme Eleasar+ anak Imam Harun. Eleasar si ngawasi kerina si ertugas bas ingan si badia.
33 Bas keturunen Merari, lit keluarga Mahli ras keluarga Musi. Enda ndai me keluarga arah keturunen Merari.+
34 Kerina dilaki si terdaftar si umurna sada bulan ku datas lit 6.200 kalak.+
35 Peminpin keluarga keturunen Merari eme Suriel anak Abihail. Kalak e erkemah i sebelah utara kemah ingan ersembah.+
36 Keturunen Merari si ertugas guna ngurus kerina rangka+ kemah ingan ersembah, beloti-belotina,+ tiang-tiangna,+ alas-alasna si erlubang, kerina perlengkapenna,+ ras kai pe si lit hubungenna ras si e kerina,+
37 bage pe tiang-tiang pembatas halamen ras alas-alasna si erlubang,+ pantuk-pantuk, ras nali-nali kemah.
38 Musa bage pe Harun ras anak-anakna erkemah i sebelah timur kemah ingan ersembah, eme i lebe-lebe kemah perjumpan janah pengalana ku arah matawari terbit. Kalak e si ertugas ngurus ingan si badia. Enda me tanggung jawap kalak e guna kalak Israel. Ise pe si ndeheri ingan si badia, adi la iijinken arus ibunuh.+
39 Bagi si perentahken Jahwe, daftarken Musa ras Harun kerina dilaki arah kalak Lewi si umurna sada bulan ku datas menurut keluargana. Jumlahna lit 22.000 kalak.
40 Kenca si e nina Jahwe man Musa, “Daftarkenlah kerina anak sintua si dilaki arah kalak Israel si umurna sada bulan ku datas,+ kira janah ban daftar gelar kalak e.
41 Arus pisahkenndu kalak Lewi man bangKu guna nggantiken kerina anak sintua kalak Israel.+ Pisahken ka kerina asuh-asuhen kalak Lewi guna nggantiken kerina anak binatang si pertama lahir arah asuh-asuhen kalak Israel.+ Aku kap Jahwe.”
42 Kenca si e, daftarken Musa kerina anak sintua kalak Israel bagi si perentahken Jahwe man bana.
43 Jumlah anak sintua si dilaki si umurna sada bulan ku datas si enggo idaftarken lit 22.273 kalak.
44 Kenca si e nina Jahwe ka man Musa,
45 “Pisahkenlah kalak Lewi man bangKu guna nggantiken kerina anak sintua kalak Israel. Pisahken ka kerina asuh-asuhen kalak Lewi guna nggantiken kerina anak binatang si pertama lahir arah asuh-asuhen kalak Israel. Kalak Lewi arus jadi jangKu. Aku kap Jahwe.
46 Perban anak sintua bangsa Israel buen 273 kalak asa kalak Lewi,+ emaka guna nebusi si lebih e,+
47 arus pepulungndu lima sekel* pirak arah tiap kalak,+ menurut timbangen si biasa ipake bas ingan si badia. Sada sekel seri ras 20 gera.*+
48 Arus berekenndu sen e man Harun ras anak-anakna guna nebusi kalak si lebih ndai.”
49 Emaka pepulung Musa sen guna nebusi kalak si teremen asangken kalak Lewi ndai.
50 Alokenna sen e arah anak-anak sintua kalak Israel. Jumlahna 1.365 sekel menurut timbangen si biasa ipake bas ingan si badia.
51 Kenca si e bereken Musa sen tebusen e man Harun ras man anak-anakna bagi si kataken Jahwe, bagi si perentahken Jahwe man bana.
Cataten i teruh
^ As. “api.”
^ Taneh si mbelang si jarang iingani.
^ As. “Kalak asing,” eme dilaki si labo arah keturunen Harun.
^ Taneh si mbelang si jarang iingani.
^ Ntah “Peti Perpadanen.”
^ 1 gera = 0,57 gram.
