Bilangen 30:1-16
30 Kenca si e ngerana Musa man peminpin-peminpin+ suku bas Israel, nina, “Enda perentah Jahwe:
2 Adi sekalak dilaki erjanji+ man Jahwe ntah pe ersumpah+ ia mantangken kai lah gia, la banci langgarna e.+ Kerina si janjikenna arus tepatina.+
3 “Adi sekalak singuda-nguda erjanji man Jahwe ntah pe ersumpah ia mantangken kai lah gia sanga tading denga ia bas rumah bapakna,
4 arus tepatina kerina si janjikenna e adi setuju bapakna sanga begi bapakna ia erjanji ntah pe ersumpah.
5 Tapi adi la setuju bapakna sanga begina ia erjanji ntah pe ersumpah, janji ntah pe sumpahna e batal. Ampuni Jahwe ia perban la setuju bapakna.+
6 “Tapi adi diberu e enggo lit dilakina janah erjanji ntah pe ersumpah ia mantangken kai lah gia tapi la ukurina lebe,
7 arus tepatina kerina si janjikenna e adi setuju dilakina sanga begi dilakina ia erjanji ntah pe ersumpah.
8 Tapi adi la setuju dilakina sanga begina ia erjanji ntah pe ersumpah, janji ntah pe sumpahna si la ukurina ndai banci batalken dilakina+ janah ampuni Jahwe diberu e.
9 “Tapi adi si erjanji e janda ntah pe diberu si iceraiken, arus tepatina kai pe si janjikenna e.
10 “Tapi adi sekalak diberu erjanji ntah pe ersumpah mantangken kai lah gia sanga tading denga ia bas rumah dilakina,
11 arus tepatina kerina si janjikenna e adi dilakina setuju ntah pe la ilarangna sanga begina ia erjanji ntah pe ersumpah.
12 Tapi adi tuhu-tuhu la setuju dilakina sanga begina ia erjanji ntah pe ersumpah, kerina janji ntah pe sumpahna ndai batal.+ Enggo batalken dilakina janji ras sumpahna e janah ampuni Jahwe diberu e.
13 Dilakina e si banci erban sah ntah pe mbatalken janji ntah sumpah si iban diberuna, guna mantangken kai lah gia ntah pe mpeteruk dirina.
14 Tapi adi kenca piga-piga wari tetap la ibatalken ntah pe larang dilakina, berarti setuju dilakina e man kerina janji ntah pe sumpahna. Setuju dilakina e man kerina janji ntah pe sumpah diberuna e perban la ia keberaten sanga begina sumpah diberuna e.
15 Adi batalken dilakina e janji ntah pe sumpahna e bas pudi wari, dilakina e si nanggung kesalahen diberuna.+
16 “Enda ndai me peraturen si perentahken Jahwe man Musa kerna dilaki ras diberuna, bage pe kerna bapak ras anakna si singuda-nguda denga si tading i rumahna.”
