Bilangen 31:1-54
31 Kenca si e nina Jahwe man Musa,
2 “Banlah pembalasen+ man kalak Midian guna kalak Israel.+ Kenca si e, mate kari kam.”+
3 Emaka nina Musa man kalak Israel, “Dilaki-dilaki arus ersikap guna erperang ngelawan kalak Midian ras ngelakoken pembalasen Jahwe man kalak e.
4 Arah tiap suku Israel, kirimlah 1.000 prajurit guna erperang.”
5 Emaka arah ribun kalak Israel,+ 1.000 kalak itugasken arah tiap suku. Lit 12.000 kalak si ersikap guna erperang.
6 Kenca si e, suruh Musa kalak e lawes erperang, 1.000 kalak arah tiap suku radu ras Pinehas+ anak Imam Eleasar. Pinehas si maba perlengkapen si badia bage pe trompet-trompet+ guna mereken tanda.
7 Erperang kalak e ngelawan kalak Midian bagi si perentahken Jahwe man Musa, janah bunuh kalak e kerina dilaki.
8 Bunuh kalak e ka lima raja Midian si gelarna Epi, Rekem, Sur, Hur, ras Reba janah bunuhna ka Bilham+ anak Beor alu pedang.
9 Tapi kerina diberu ras anak-anak kalak Midian itaban kalak Israel. Buatina ka lembu, kambing, biri-biri ras kerina asuh-asuhen, bage pe erta kalak Midian.
10 Tutung kalak e kerina kota ras perkemahen* kalak Midian.
11 Buat kalak e kerina hasil jarahen e la soal manusia ntah pe binatang.
12 Kenca si e baba kalak e kerina tabanen ras hasil jarahen man Musa, man Imam Eleasar, bage pe man kerina kalak Israel si erkemah i Gurun Pasir Moap+ i deher Lau Jordan si lit i Jeriho.
13 Kenca si e ndarat Musa, Imam Eleasar, ras kerina peminpin bangsa Israel arah perkemahen nari njumpai kalak e.
14 Merawa kel Musa man peminpin pasuken perang e, eme man si minpin seribu prajurit ras si minpin seratus prajurit si mulih arah peperangen* nari.
15 Nina Musa man kalak e, “Engkai maka pediat kena kerina si diberu nggeluh?
16 Diberu-diberu e kap si isuruh Bilham nggoda kalak Israel. Kalak e si erban kalak Israel la setia+ man Jahwe sanga kejadin bas Peor,+ akibatna kerina umat Jahwe kena wabah penakit.+
17 Gundari, bunuh kerina anak-anak si dilaki ras kerina diberu si pernah erhubungen seks ras dilaki.
18 Tapi kerina diberu si nguda denga si lenga pernah erhubungen seks ras dilaki pediat nggeluh.+
19 Arus kena erkemah i darat perkemahen pitu wari dekahna. Ise pe si enggo munuh kalak ntah pe si ngkuit mayat kalak si terbunuh+ arus pebadiana dirina+ bas wari si peteluken ras wari si pepituken. Kena bage pe kalak si itaban kena arus ngelakoken si e.
20 Kerina baju, barang si iban arah kulit, barang si iban arah kayu, ras barang si iban arah mbulu kambing arus ipebadia kena arah dosa.”
21 Kenca si e nina Imam Eleasar man prajurit si ikut erperang e, “Enda undang-undang si bereken Jahwe arah Musa:
22 ‘Emas, pirak, tembaga, besi, timah putih, timah hitam,
23 kerina si tahan api arus itutung gelah jadi murni. Janah kerina e arus ipebadia alu lau si ipake guna mpebadiaken.+ Kerina si la tahan api arus icuci alu lau.
24 Arus cuci kena baju kena i bas wari si pepituken gelah lanai kena najis. Kenca si e maka banci kena masuk ku bas perkemahen.’”+
25 Dung e nina Jahwe man Musa,
26 “Daftarken kerina hasil jarahen kena janah kira kerina si itaban kena la soal e manusia ntah pe binatang, janah lakoken bage radu ras Imam Eleasar bage pe ras peminpin-peminpin keluarga bapak arah suku Israel.
27 Bagi dua hasil jarahen kena e, sada bagin bere man prajurit-prajurit si erperang janah sada nari bere man kerina kalak Israel si debanna.+
28 Arus buat kena bagin man Jahwe arah bagin si ibereken man prajurit si erperang, eme sada arah tiap 500 tabanen, la soal e jelma, lembu, kelede, biri-biri, ntah pe kambing.
29 Buatlah e janah bereken man Imam Eleasar jadi sumbangen man Jahwe.+
30 Arah bagin si ibereken man kalak Israel buatlah sada tabanen arah tiap 50 tabanen, la soal e jelma, lembu, kelede, biri-biri, ntah pe kambing bage pe asuh-asuhen. Bereken kerina e man kalak Lewi+ si ertugas bas kemah Jahwe eme kemah ingan ersembah.”+
31 Emaka lakoken Musa ras Imam Eleasar bagi si perentahken Jahwe man Musa.
32 Enda hasil jarahen si ibuat kalak si erperang ndai: 675.000 biri-biri ras kambing,
33 72.000 lembu,
34 ras 61.000 kelede.
35 Diberu si lenga pernah erhubungen seks ras dilaki+ buena lit 32.000 kalak.
36 Bagin si ibereken man prajurit si ikut erperang eme 337.500 biri-biri ras kambing.
37 Lit 675 kambing ras biri-biri si isumbangken man Jahwe.
38 Lembu lit 36.000 buena janah 72 si isumbangken man Jahwe.
39 Kelede 30.500 buena janah 61 si isumbangken man Jahwe.
40 Jumlah jelma lit 16.000 kalak janah 32 kalak si isumbangken man Jahwe.
41 Kenca si e baba Musa kerina si isumbangken man Jahwe ku Imam Eleasar,+ bagi si perentahken Jahwe man bana.
42 Kenca si e bereken Musa setengah arah hasil jarahen e man kalak Israel eme,
43 kambing ras biri-biri 337.500 buena,
44 lembu 36.000,
45 kelede 30.500,
46 ras jelma 16.000 kalak.
47 Kenca si e bagi si perentahken Jahwe man Musa, ibuat Musa sada arah 50 hasil jarahen e la soal jelma ntah pe binatang, jenari berekenna kerina man kalak Lewi+ si ertugas bas kemah Jahwe eme kemah ingan ersembah.+
48 Kenca si e, dilaki si ipilih jadi peminpin-peminpin eme si minpin seribu prajurit+ ras si minpin seratus prajurit lawes njumpai Musa,
49 janah nina kalak e man Musa, “Enggo kira budakndu enda jumlah prajurit si ipinpin kami janah la lit sada pe si bene.+
50 Emaka bereken kami ate kami persembahen kami masing-masing man Jahwe arah kai si enggo dat kami eme barang-barang arah emas, gelang nahe, gelang tan, cincin stempel, anting-anting, ras perhiasen si debanna guna erban pendamen man kami i lebe-lebe Jahwe.”
51 Emaka aloken Musa ras Imam Eleasar emas ras kerina perhiasen arah kalak e nari.
52 Emas si isumbangken peminpin seribu prajurit ras peminpin seratus prajurit man Jahwe lit kira-kira 191 kilo* buena.
53 Kerina prajurit enggo buatna jangna arah hasil jarahen e.
54 Aloken Musa ras Imam Eleasar emas e arah kalak si minpin seribu prajurit ras si minpin seratus prajurit. Baba kalak e emas e ku kemah perjumpan jadi persinget man kalak Israel i lebe-lebe Jahwe.
