Bilangen 32:1-42
-
Ingan tading i sebelah timur Lau Jordan (1-42)
32 Melala kel asuh-asuhen suku Ruben+ ras suku Gat,+ emaka cocok akap kalak e daerah Jaser+ ras daerah Gileat jadi ingan asuh-asuhen kalak e.
2 Emaka jumpai kalak e Musa, Imam Eleasar, ras peminpin-peminpin Israel, janah nina,
3 “Atarot, Dibon, Jaser, Nimra, Hesbon,+ Eleale, Sebam, Nebo,+ ras Beon,+
4 enda ndai me daerah si italuken Jahwe guna kalak Israel.+ Kerina daerah e cocok man ingan asuh-asuhen janah melala kel asuh-asuhen budak-budakndu enda.+
5 Adi setuju kam, berelah daerah e man kami janah ula min suruhndu kami nyebrangi Lau Jordan.”
6 Kenca si e nina Musa man suku Gat ras suku Ruben, “Jadi tetap ate kena tading i jenda sanga senina-senina kena lawes erperang?
7 Engkai maka iban kena kalak Israel lanai semangat nyebrang ku negri si nandangi ibereken Jahwe man kalak e?
8 Bage si lakoken nini bulang kena sanga kusuruh kalak e ku Kades-Barnea guna ngenen negri e.+
9 Sanga lawes kalak e ku Lembah* Eskol+ guna ngenen negri e, banna kalak Israel lanai semangat ku negri si nandangi ibereken Jahwe.+
10 Merawa kel Jahwe sanga si e janah ersumpah Ia,+ nina,
11 ‘Kerina si ndarat arah Mesir nari si umurna 20 tahun ku datas la banci masuk ku negri+ si Kujanjiken alu sumpah man Abraham, Isak, ras Jakup,+ perban la patuhi kalak e Aku alu bulat ukur.
12 Ise pe la banci masuk ku negri e selain Kalep+ anak Jepune kalak Keni ras Josua+ anak Nun, perban patuhi kalak e Jahwe alu bulat ukur.’+
13 Emaka merawa kel Jahwe man kalak Israel, janah banNa kalak e mutar-mutar i taneh mesawang* 40 tahun dekahna,+ seh ngasa mate kerina kalak si ngelakoken kejahaten i lebe-lebe Jahwe.+
14 Gundari kena pe enggo bagi nini bulang kena e. Bali kena bagi kelompok si erdosa si erban merawa kel Jahwe man kalak Israel.
15 Adi la kena nggit ngikutken Ia, pasti tadingkenNa ka bangsa enda i taneh mesawang* janah kernep pagi bangsa enda perban kena.”
16 Bas pudi wari jumpai kalak e ka Musa janah nina, “Pediatlah ibangun kami kandang asuh-asuhen kami arah batu-batu nari bage pe kota man anak-anak kami.
17 Tapi tetap nge kami ikut erperang.+ Kami kari i lebe-lebe kalak Israel seh ngasa baba kami kalak e ku inganna. Sanga si e, anak-anak kami tading i kota-kota si erbenteng gelah la kalak e iganggu penduduk negri e.
18 Labo pagi kami mulih seh ngasa kerina kalak Israel ngaloken taneh warisenna.+
19 Lanai pagi buat kami taneh si lit i sebelah barat Lau Jordan enda, perban enggo buat kami taneh i sebelah timur Lau Jordan jadi warisen kami.”+
20 Nina Musa ngaloisa, “Adi bage, enda si arus lakoken kena: Ersikaplah kena guna erperang man Jahwe,+
21 janah sebrangilah Lau Jordan i lebe-lebe Jahwe. Kenca si e, sanga enggo pelawesNa pagi musuh-musuhNa arah lebe-lebeNa nari,+
22 janah enggo taluken Jahwe kalak e,+ banci kena mulih.+ La kena erdosa man Jahwe bage pe man kalak Israel. Kenca si e maka kerina daerah enda banci jadi jang kena i lebe-lebe Jahwe.+
23 Tapi adi la bage ban kena, erdosa kena man Jahwe janah kena si nanggung akibatna.
24 Banci bangun kena kota man anak-anak kena ras kandang man asuh-asuhen kena,+ tapi arus tepati kena janji kena.”
25 Nina suku Gat ras suku Ruben man Musa, “Lakoken budak-budakndu enda kari bagi si perentahkenndu, Tuan.
26 Anak-anak kami, diberu kami, lembu ras biri-biri kami, bage pe kerina asuh-asuhen kami tading kari i kota-kota Gileat.+
27 Tapi kerina pagi budak-budakndu enda nyebrang guna erperang i lebe-lebe Jahwe,+ bagi si perentahkenndu.”
28 Emaka bere Musa perentah kerna kalak e man Imam Eleasar ras Josua anak Nun, bage pe man peminpin-peminpin arah keluarga bapak arah suku-suku Israel.
29 Nina Musa man kalak e, “Adi suku Gat ras suku Ruben nyebrangi Lau Jordan radu ras kena janah kerina ikut erperang i lebe-lebe Jahwe, jenari negri e italuken i lebe-lebe kena, arus bere kena daerah Gileat jadi jang kalak e.+
30 Tapi adi la kalak e ikut nyebrang ras erperang radu ras kena, arus kalak e tading ras kena i negri Kanaan.”
31 Megi si e nina suku Gat ras suku Ruben, “Kai si kataken Jahwe, e me si lakoken budak-budakndu enda.
32 Ikut pagi kami erperang ras nyebrang ku negri kalak Kanaan i lebe-lebe Jahwe.+ Tapi taneh warisen kami pagi eme si lit i sebelah timur Lau Jordan.”
33 Emaka bereken Musa kerina kota ras negri si lit i daerah Sihon+ raja kalak Amori, ras daerah Og+ raja negri Basan, termasuk kota-kota si lit i sekeliling daerah e man suku Gat, suku Ruben,+ ras man setengah suku Manase+ (Manase e anak Jusup).
34 Kenca si e ibangun* suku Gat kota Dibon,+ Atarot,+ Aroer,+
35 Atarot-sopan, Jaser,+ Jogbeha,+
36 Bet-Nimra,+ ras Bet-Haran.+ Kerina kota e erbenteng. Jenari bangun kalak e kandang-kandang man asuh-asuhenna.
37 Suku Ruben mbangun kota Hesbon,+ Eleale,+ Kiriataim,+
38 Nebo+ ras Baalmeon+ (gelar kota e duana enggo iganti) bage pe Sipma. Kenca si e iban kalak e gelar si mbaru man kota-kota si ibangunna mulihi e.
39 Keturunen Mahir+ arah suku Manase lawes ku negri Gileat janah talukenna negri e, jenari pelawesna kerina kalak Amori si tading i je.
40 Emaka bereken Musa negri Gileat man keturunen Mahir janah tading kalak e i je.+
41 Jair anak Manase pe ikut nyerang negri Gileat janah talukenna kuta-kuta perkemahen si lit i je, jenari banna gelar daerah e Hawot-jair.*+
42 Nobah pe naluken Kenat ras kota-kota si lit i sekelilingna janah banna gelar ingan e Nobah bali bagi gelarna.
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Ntah “mulihi bangun.”
^ Ertina “Kuta-Kuta Perkemahen Jair.”