Bilangen 35:1-34
35 Ngerana ka Jahwe man Musa i Gurun Pasir Moap, i tepi Lau Jordan+ deher Jeriho, nina,
2 “Suruhlah bereken kalak Israel kota-kota man ingan tading kalak Lewi arah warisen kalak e.+ Arus ka bereken kalak e mbalmbal si lit i sekeliling kota-kota e man kalak Lewi.+
3 Bas kota-kota e pagi kalak Lewi tading janah mbalmbal e pagi man ingan asuh-asuhenna, barang-barangna, ras kerina asuh-asuhenna si deban.
4 Mbalmbal si arus ibereken man kalak Lewi belangna kira-kira 450 meter,* iukur mulai arah tembok si lit i sekeliling kota.
5 I darat kota e arus ukur kena kira-kira 900 meter* ku arah timur, 900 meter ku arah selatan, 900 meter ku arah barat, ras 900 meter ku arah utara, janah kota e lit i tengah-tengahna. E me si jadi mbalmbal kota-kota kalak e.
6 “Arus bereken kena 6 kota perlindungen man kalak Lewi+ si jadi ingan kiam kalak si munuh+ janah bereken ka 42 kota si debanna.
7 Kota-kota si arus bereken kena man kalak Lewi jumlahna 48, termasuk ras mbalmbal.+
8 Kota-kota si bereken kena e arus buat kena arah jang kalak Israel.+ Arah kelompok si enterem arus mbue buat kena, janah arah kelompok si sitik arus sitik buat kena.+ Tiap kelompok arus mereken piga-piga kota man kalak Lewi menurut warisen si alokenna.”
9 Kenca si e nina Jahwe man Musa,
10 “Kataken man kalak Israel, ‘Sebrangi kena pagi Lau Jordan jenari masuk ku negri Kanaan.+
11 Pilih kenalah kota-kota si cocok akap kena jadi kota perlindungen. Adi lit kalak si la sengaja munuh kalak si deban, banci ia kiam ku kota e.+
12 Kota-kota e pagi si jadi ingan perlindungen arah kalak si nuntut balas,+ gelah kalak si munuh e la mate ope lenga iadili i lebe-lebe jelma si enterem.+
13 Enda ndai me tujun enem kota perlindungen si bereken kena e.
14 Arus ka pilih kena telu kota i sebelah timur Lau Jordan+ ras telu kota nari i negri Kanaan+ jadi kota perlindungen.
15 Enem kota e kari jadi ingan erlindung man kerina kalak. Kalak Israel, penduduk asing,+ penduduk sementara, ntah ise saja pe si la sengaja munuh kalak, banci kiam ku kota-kota e.+
16 “‘Tapi adi lit kalak si mekpek kalak si deban alu barang si iban arah besi janah mate kalak si pekpekna e, pembunuh kap ia. Pembunuh e arus ibunuh.+
17 Adi lit kalak si mekpek kalak si deban alu batu janah erban kalak si pekpekna e mate, pembunuh kap ia. Pembunuh e arus ibunuh.
18 Adi lit kalak si mekpek kalak si deban alu kayu janah e erban kalak si pekpekna e mate, pembunuh kap ia. Pembunuh e arus ibunuh.
19 “‘Kalak si lit hakna nuntut balas me si munuh pembunuh e. Sanga jumpa ia ras pembunuh e arus bunuhna pembunuh e.
20 Adi lit kalak segat atena kalak si deban janah sorongna kalak e ntah pe benterna perban lukaina atena janah mate banna kalak e,+
21 ntah pe pekpekna kalak perban segat atena janah mate kalak si pekpekna e, ia arus ibunuh. Pembunuh kap ia. Sanga jumpa kalak si nuntut balas ras ia, arus bunuhna pembunuh e.
22 “‘Tapi adi lit kalak si tersorongna ntah pe terbenterna kalak si deban ras labo perban segat atena ntah pe labo atena ngelukai ia,+
23 ntah adi la idahna kalak si deban janah ndabuh banna batu ku kalak e, padahal labo ia musuhna janah labo atena ngelukai ia, jenari mate kalak ndai,
24 sekelompok kalak arus ngadili ia bage pe kalak si nuntut balas alu peraturen-peraturen enda.+
25 Sekelompok kalak ndai arus nelamatken kalak si munuh e arah kalak si nuntut balas janah suruh kalak e ia mulih ku kota perlindungen, ku ingan ia arusna kiam. Tading ia i je seh ngasa mate imam si mbelin si ilantik alu minak si badia.+
26 “‘Tapi adi kalak si munuh e ndarat arah batas kota perlindungen, arah inganna kiam e,
27 jenari jumpa ia ras kalak si nuntut balas i darat kota perlindungen janah bunuhna ia, kalak si nuntut balas e la rutang dareh.
28 Emaka kalak si munuh e arus tetap tading i kota perlindungen seh ngasa mate imam si mbelin. Tapi kenca mate imam si mbelin, banci ia mulih ku kutana.+
29 Kerina peraturen enda arus patuhi kena bage pe keturunen kena i ja pe kena tading.
30 “‘Ise pe si munuh kalak si deban arus ibunuh+ adi lit piga-piga saksi si mbuktiken ia enggo munuh.+ Tapi sekalak jelma la banci ibunuh adi sada ngenca saksi si nuduh ia.
31 Ula aloken tebusen guna nelamatken kegeluhen kalak si sengaja munuh, sebap ia arus mate.+
32 Ula aloken tebusen guna kalak si kiam ku kota perlindungen, eme tebusen gelah banci ia mulih ku kutana ope lenga mate imam si mbelin.
33 “‘Ula ban kena najis taneh ingan kena tading, perban dareh erban taneh jadi najis,+ janah la lit pendamen man dareh si iamburken ku taneh e selain alu dareh kalak si ngamburkenca.+
34 Ula ban kena najis taneh ingan kena tading eme inganKu tading, sebap Aku, Jahwe, tading i tengah-tengah kalak Israel.’”+