Bilangen 36:1-13
-
Undang-undang kerna perjabun diberu si dat warisen (1-13)
36 Kenca si e, kepala-kepala keluarga keturunen Gileat anak Mahir+ reh njumpai Musa bage pe peminpin-peminpin kalak Israel. Mahir e anak Manase, Manase e anak Jusup.
2 Nina kalak e, “O Tuan, suruh Jahwe kam mbagiken negri e jadi warisen man kalak Israel alu cara iundi.+ Suruh Jahwe ka kam mereken warisen senina kami Selapehat man anak-anakna si diberu.+
3 Adi erjabu kalak e ras dilaki arah suku si deban, warisen kalak e pasti ibuat arah warisen nini bulang kami janah warisen e jadi jang suku dilaki si ngempoi kalak e. Alu bage warisen si ibereken man kami ibuat arah kami nari.
4 Bas Tahun Pembebasen,*+ warisen kalak e jadi jang suku dilaki si ngempoi kalak e janah dungna warisen e jadi jang suku dilaki ndai seh rasa lalap. Alu bage warisen kalak e ibuat arah warisen suku nini bulang kami.”
5 Kenca si e ipeseh Musa perentah si ibereken Jahwe man kalak Israel, nina, “Tuhu kap si kataken keturunen Jusup e.
6 Enda perentah Jahwe kerna anak-anak Selapehat: ‘Banci kalak e erjabu ras ise pe. Tapi, kalak e arus erjabu ras dilaki arah suku bapakna.
7 Warisen kalak Israel la banci pindah ku suku si deban, sebap kalak Israel arus njaga warisen arah suku nini bulangna.
8 Anak diberu si ndatken warisen i bas suku-suku Israel arus erjabu ras dilaki arah suku bapakna.+ Alu bage kalak Israel tetap njaga warisen arah nini bulangna.
9 Warisen la banci pindah ku suku si deban, sebap suku-suku Israel arus njaga warisenna masing-masing.’”
10 Lakoken anak-anak Selapehat bagi si perentahken Jahwe man Musa.+
11 Emaka Mahlah, Tirsa, Hogelah, Milka, bage pe Nuah eme anak-anak Selapehat,+ erjabu ras dilaki-dilaki arah keluarga bapakna.
12 Kalak e jadi ndehara dilaki-dilaki arah suku Manase anak Jusup, gelah warisen kalak e tetap jadi jang suku bapak kalak e.
13 Enda ndai me perentah-perentah ras undang-undang si bereken Jahwe man kalak Israel erkelangken Musa i Gurun Pasir Moap i tepi Lau Jordan i deher Jeriho.+
Cataten i teruh
^ Ntah “Tahun Penangtangen.”
