Bilangen 4:1-49
4 Nina Jahwe ka man Musa ras Harun,
2 “Banlah sensus guna ngkira dilaki-dilaki arah keturunen Kohat+ si lit i bas suku Lewi, menurut keluargana ras keluarga bapakna.
3 Kerina si umurna 30+ seh ku 50 tahun+ ikut erdahin bas kemah perjumpan.+
4 “Anak-anak Kohat si dilaki arus erdahin bas kemah perjumpan.+ Badia kel dahin kalak e.
5 Sanga kalak Israel nandangi berkat, Harun ras anak-anakna arus masuk ku bas kemah e. Arus lepasken kalak e tirai pemisah+ janah tutupi kalak e Peti Perjanjin*+ alu tirai e.
6 Arus tutupi kalak e Peti e alu kain penutup si iban arah kulit anjing laut jenari tutupi kalak e ka alu kain biru, janah pasangna tongkat-tongkat+ guna ngangkatsa.
7 “Arus tutupi kalak e meja roti persembahen+ alu kain biru. I datasna arus tama kalak e piring ras cangkirna, bage pe mangkok ras tekona si ipake guna persembahen inemen.+ Roti persembahen+ pe arus tetap lit i meja e.
8 E ndai kerina arus tutupi kalak e alu kain si warna megara, jenari tutupi ka alu kain penutup si iban arah kulit anjing laut, janah arus ipasang kalak e tongkat-tongkat+ guna ngangkatsa.
9 Arus ka ibuat kalak e kain si warna biru guna nutupi ingan lampu,+ kerina lampuna,+ penjepit-penjepit sumbuna, ingan-ingan sumbuna,+ bage pe kerina ingan minak lampu e.
10 Arus bungkusna kerina e bage pe kerina perlengkapenna alu kain penutup si iban arah kulit anjing laut, janah tamaken kalak e ku tongkat pengangkatna.
11 Kenca si e arus tutupi kalak e ingan nutung* persembahen si iban arah emas alu kain biru,+ jenari tutupi ka alu kain penutup si iban arah kulit anjing laut, janah pasang kalak e tongkat-tongkat guna ngangkatsa.+
12 Kenca si e arus buat kalak e kerina perlengkapen+ si biasa ipake guna ngelayani bas ingan si badia. Jenari itama ku bas kain biru janah ibungkus alu kain penutup si iban arah kulit anjing laut janah itamaken ku tongkat pengangkatna.
13 “Arus ambekken kalak e abu* arah ingan nutung persembahen+ nari jenari tutupi kalak e ingan nutung persembahen e alu kain wol warna ungu.
14 I datasna, arus tamaken kalak e kerina perlengkapen si ipake sanga ngelayani bas ingan nutung persembahen, eme garpu, sekop, mangkok, ras ingan rara.+ Jenari arus tutupi kalak e alu kain penutup si iban arah kulit anjing laut nari janah ipasang kalak e tongkat-tongkat guna ngangkatsa.+
15 “Sanga nandangi berkat bangsa e, Harun ras anak-anakna arus nutupi kerina perlengkapen ingan si badia.+ Kenca si e reh anak-anak Kohat si dilaki guna ngangkatsa,+ tapi la banci jemak kalak e barang-barang si badia e gelah ula kalak e mate.+ E me dahin anak-anak Kohat si dilaki bas kemah perjumpan.
16 “Eleasar+ anak Imam Harun ertanggung jawap guna ngawasi minak lampu, kemenyan si merim,+ persembahen pangan* si ratur ipersembahken, bage pe minak pelantiken.+ Ia pe ertanggung jawap ngawasi kerina kemah ingan ersembah ras kerina isina, termasuk ingan si badia ras perlengkapenna.”
17 Kenca si e nina Jahwe man Musa bage pe man Harun,
18 “Ula sempat keluarga-keluarga keturunen Kohat+ kernep arah tengah-tengah kalak Lewi.
19 Enda si arus ilakoken gelah ula kalak e mate perban deherina barang-barang si seh kel badiana.+ Harun ras anak-anakna arus masuk ku kemah perjumpan, jenari itentuken kalak e dahin tiap kalak bage pe kai si arus ibabana.
20 Keturunen Kohat la banci masuk ntah pe ngenen barang-barang si badia amin pe kentisik, gelah ula kalak e mate.”+
21 Kenca si e nina Jahwe man Musa,
22 “Banlah sensus guna ngkira keturunen Gerson+ si dilaki menurut keluarga kalak e ras keluarga bapak kalak e.
23 Daftarkenlah kerina si umurna 30 seh ku 50 tahun, janah kalak e si erdahin guna ngelayani bas kemah perjumpan.
24 Enda dahin si arus ilakoken keluarga-keluarga arah keturunen Gerson:+
25 Arus angkat kalak e kain-kain kemah ingan ersembah+ eme kain-kain penutupna ras kain penutupna si arah datas+ kel si iban arah kulit anjing laut nari, bage pe tirai pintu masuk kemah perjumpan.+
26 Arus ka iangkat kalak e tirai pembatas halamen,+ tirai pintu masuk halamen+ si lit i sekeliling kemah ingan ersembah ras ingan nutung persembahen, nali-nali kemah ras kerina perlengkapen si lit hubungenna ras si e kerina. E me tugas kalak e.
27 Kerina dahin ras barang-barang si iangkat keturunen Gerson+ arus iawasi Harun ras anak-anakna. Arus tugasken kena kalak e guna ngangkat kerina barang e.
28 Enda ndai me dahin keluarga keturunen Gerson bas kemah perjumpan.+ Kerina dahin kalak e iawasi Itamar+ anak Imam Harun.
29 “Daftarken ka keturunen Merari+ si dilaki menurut keluarga kalak e ras keluarga bapak kalak e.
30 Daftarkenlah kerina si umurna 30 seh ku 50 tahun, janah kalak e pe ikut erdahin guna ngelayani bas kemah perjumpan.
31 Enda dahin kalak e bas kemah perjumpan: Arus iangkat+ kalak e kerina rangka-rangka dingding+ kemah ingan ersembah, beloti-belotina,+ tiang-tiangna,+ alas-alasna si erlubang,+
32 tiang-tiang+ man dingding i sekeliling halamen ras alas-alasna si erlubang,+ pantuk-pantuk kemah,+ nali-nalina ras kerina perlengkapenna, bage pe kerina si lit hubungenna ras si e kerina. Arus tugasken kena man tiap kalak barang si apai si arus iangkatna.
33 Enda ndai me dahin keluarga keturunen Merari+ bas kemah perjumpan. Dahin kalak e iawasi Itamar anak Imam Harun.”+
34 Kenca si e, Musa, Harun, ras peminpin-peminpin+ kalak Israel ndaftarken keturunen Kohat+ si dilaki menurut keluarga kalak e ras keluarga bapak kalak e.
35 Kalak si idaftarken e eme dilaki si umurna 30 seh ku 50 tahun. Kalak e si ikut erdahin bas kemah perjumpan.+
36 Kerina si terdaftar menurut keluarga kalak e lit 2.750 kalak.+
37 Kalak e ndai me si terdaftar arah keluarga-keluarga keturunen Kohat si erdahin bas kemah perjumpan. Idaftarken Musa ras Harun kalak e bagi si perentahken Jahwe arah Musa.+
38 Keturunen Gerson si dilaki+ idaftarken ka menurut keluarga kalak e ras keluarga bapak kalak e.
39 Kalak si idaftarken e eme dilaki si umurna 30 seh ku 50 tahun. Kalak e si ikut erdahin bas kemah perjumpan.
40 Kerina si terdaftar menurut keluarga kalak e ras menurut keluarga bapak kalak e lit 2.630 kalak.+
41 Kalak e ndai me si terdaftar arah keluarga-keluarga keturunen Gerson si erdahin bas kemah perjumpan. Idaftarken Musa ras Harun kalak e bagi si perentahken Jahwe.+
42 Keturunen Merari si dilaki idaftarken ka menurut keluarga kalak e ras keluarga bapak kalak e.
43 Kalak si idaftarken e eme dilaki si umurna 30 seh ku 50 tahun. Kalak e me si ikut erdahin bas kemah perjumpan.+
44 Kerina si terdaftar menurut keluarga kalak e lit 3.200 kalak.+
45 Kalak e ndai me si terdaftar arah keluarga-keluarga keturunen Merari. Idaftarken Musa ras Harun kalak e bagi si perentahken Jahwe arah Musa.+
46 Musa, Harun, bage pe peminpin-peminpin kalak Israel ndaftarken keturunen Lewi si dilaki menurut keluarga kalak e ras keluarga bapak kalak e.
47 Kalak si idaftarken e eme dilaki si umurna 30 seh ku 50 tahun. Kerina kalak e itugasken ngelayani ras ngangkat kerina barang si lit hubungenna ras kemah perjumpan.+
48 Kerina si terdaftar lit 8.580 kalak.+
49 Kerina kalak e idaftarken bagi si perentahken Jahwe man Musa. Dahin tiap kalak enggo itentuken bage pe barang si arus iangkatna. Kalak e idaftarken bagi si perentahken Jahwe arah Musa.
Cataten i teruh
^ Ntah “Peti Perpadanen.”
^ Ntah “abu si lit lemakna,” eme abu si tercampur ras lemak korban.
