Bilangen 5:1-31
5 Kenca si e nina Jahwe man Musa,
2 “Perentahkenlah man kalak Israel gelah pedaratna arah perkemahen nari kerina kalak si sakit kusta,+ kalak si ndaraten cairen arah kelaminna,+ ras kalak si najis perban kalak mate.+
3 La soal ia dilaki ntah pe diberu, arus pedarat kena. Arus pedarat kena kalak e arah perkemahen nari gelah perkemahen inganKu tading tetap bersih.”+
4 Emaka pedarat kalak Israel kerina kalak si bage arah perkemahen nari bagi si perentahken Jahwe man Musa.
5 Nina Jahwe ka man Musa,
6 “Katakenlah man kalak Israel, ‘Adi lit dilaki ntah pe diberu si jahat man kalak si deban ntah pe la setia man Jahwe, ia enggo ersalah.+
7 Arus akuina*+ dosana e, jenari galarina ganti rugi perban kesalahenna e janah tambahina seperlima nari.+ Arus berekenna e man kalak si irugikenna ndai.
8 Tapi adi kalak si irugiken e mate janah la lit keluargana ngaloken ganti rugi e, ganti rugi e arus ibereken man Jahwe janah jadi bagin imam. Ganti rugi e lenga termasuk biri-biri jantan pendamen si ipake imam guna erban pendamen man kalak si ersalah e.+
9 “‘Kerina pemere si ipersembahken+ kalak Israel, jadi bagin imam si ngaloken pemere e.+
10 Kai pe si badia si ipersembahken kalak, enggo jadi bagin imam. Kai pe si ibereken man imam jadi jang imam kap.’”
11 Kenca si e nina Jahwe man Musa,
12 “Katakenlah man kalak Israel, ‘Adi lit sekalak diberu selingkuh, la ia setia man dilakina
13 janah erhubungen seks ia ras dilaki si deban,+ amin pe perbahanenna e la teh dilakina janah lalap la tereteh, la ka lit si ngidahsa, la ka terdat, diberu e enggo najis. Emaka enda si arus ilakoken:
14 Adi cemburu dilakina janah curiga ia maka diberuna e lanai setia, la soal diberuna e najis ntah pe la najis,
15 arus baba dilaki e diberuna ku imam janah babana ka persembahen guna diberuna e, eme sada kilo* tepung barli. La banci tamana minak ntah pe kemenyan mbentar ku datas tepung e, sebap tepung e persembahen si lit hubungenna ras perasan cemburu, eme persembahen pangan* guna nginget kesalahen.
16 “‘Arus suruh imam diberu e tedis i lebe-lebe Jahwe.+
17 Arus baba imam lau si badia i bas sada ingan si iban arah taneh liat nari janah buatna sitik abu arah lante kemah ingan ersembah, jenari tamana ku bas lau e.
18 Arus isuruh imam diberu e tedis i lebe-lebe Jahwe janah arus sarsarkenna buk diberu e. Kenca si e arus itama imam i bas tan diberu e persembahen pangan guna jadi penginget eme persembahen si lit hubungenna ras perasan cemburu,+ janah ibaba imam lau si pagit si banci erban kena sumpah.+
19 “‘Kenca si e isuruh imam diberu e ersumpah janah nina man diberu e, “Adi tuhu kin la lit dilaki si deban si erhubungen seks ras kam sanga lit denga dilakindu+ janah labo kam selingkuh ntah pe jadi najis, kam bebas arah sumpah si lit bas lau si pagit e.
20 Tapi adi selingkuh kam sanga lit denga dilakindu janah erhubungen seks kam ras dilaki si deban+ selain dilakindu—”
21 Kenca si e isuruh imam diberu e ersumpah maka pasti ia kena sumpah adi tuhu kin ilakokenna e. Jenari nina imam man bana, “Mbera-mbera iban Jahwe gelarndu ipake guna numpahi i bas tengah-tengah bangsandu. Iban Jahwe reh kitikna* pahandu* janah galang beltekndu.
22 Lau si maba sumpah e masuk ku ususndu, janah banna galang beltekndu ras reh kitikna* pahandu.”* Kenca si e arus nina diberu e ngaloisa, “Amin! Amin!”*
23 “‘Jenari arus itulis imam sumpah e i bas sada buku janah apusna alu lau si pagit ndai.
24 Kenca si e isuruh imam inem diberu e lau si maba sumpah ndai jenari masuk me lau e ku beltekna janah ibanna ia suin.
25 Kenca si e ibuat imam tepung persembahen pangan si lit hubungenna ras perasan cemburu+ arah tan diberu e janah ayunkenna i lebe-lebe Jahwe, jenari babana ku deher ingan nutung* persembahen.
26 Kenca si e arus ibuat imam sengkerauk arah persembahen pangan e janah tutungna bas ingan nutung persembahen si jadi tanda maka persembahen e enggo ipersembahken.+ Kenca si e arus suruh imam inem diberu e lau si pagit ndai.
27 Sanga inem diberu e lau ndai, adi tuhu kin ia enggo najis janah la setia man dilakina, lau si maba sumpah si masuk ku beltekna e pasti erban mesui akapna, jenari bengkak me beltekna janah reh kitikna* pahana,* janah ipake gelarna guna numpahi i tengah-tengah bangsana.
28 Tapi adi tuhu kin diberu e bersih ras la najis, bebas ia arah hukumen e. Banci ia hamil janah banci lit anakna.
29 “‘Enda ndai me undang-undang kerna perasan cemburu+ adi lit diberu si selingkuh janah najis banna dirina sanga lit denga dilakina,
30 ntah pe sanga cemburu sekalak dilaki man diberuna janah curiga ia maka diberuna e la setia man bana. Arus babana diberuna e ku lebe-lebe Jahwe janah arus dalanken imam kerina undang-undang e man diberuna e.
31 Dilakina e labo ersalah, tapi diberuna e si nanggung kesalahenna sendiri.’”
Cataten i teruh
^ As. “akui kalak e.”
^ Ntah “kesip.” Mungkin maksudna lanai banci lit anakna.
^ Mungkin maksudna organ-organ reproduksi.
^ Ntah “kesip.” Mungkin maksudna lanai banci lit anakna.
^ Mungkin maksudna organ-organ reproduksi.
^ Ntah “Terjadilah bage! Terjadilah bage!”
^ Ntah “kesip.” Mungkin maksudna lanai banci lit anakna.
^ Mungkin maksudna organ-organ reproduksi.
