Bilangen 6:1-27
6 Kenca si e nina Jahwe ka man Musa,
2 “Bagendalah nindu man kalak Israel, ‘Adi lit dilaki ntah pe diberu si erban janji khusus jadi sekalak Nasir*+ man Jahwe,
3 la banci inemna anggur ntah pe inemen si lit alkoholna. La banci inemna cuka anggur ntah pe cuka arah kai pe si lit alkoholna.+ La banci panna ras inemna kai pe si iban arah anggur nari, la soal buah anggur si segar ntah pe si enggo kerah.
4 Sedekah ia jadi sekalak Nasir la banci panna kai pe si iban arah batang anggur nari ras arah anggur si lenga tasak bage pe kulitna.
5 “‘Sedekah ia jadi sekalak Nasir, la banci potongna bukna.+ Tetap ia badia adi pediatna gedang bukna seh ngasa dung waktuna ia ipisahken man Jahwe.
6 La banci deherina kalak mate sedekah ia ipisahken man Jahwe.
7 Amin pe si mate e bapakna, mamakna, seninana, ntah pe turangna, la banci banna dirina najis perban si mate e,+ sebap tanda maka ia sekalak Nasir man Dibatana lit i datas takalna.
8 “‘Sedekah ia jadi sekalak Nasir, ia badia man Jahwe.
9 Tapi adi lit si rempet mate i deherna+ jenari najis bukna si jadi tanda maka ia enggo ipisahken man Dibata, arus potongna bukna+ e bas wari si pepituken, eme bas wari ia ipebadia.
10 Bas wari si pewaluhken arus babana dua perik ndukur ntah pe dua merpati si nguda denga man imam ku pintu masuk kemah perjumpan.
11 Arus persembahken imam sada perik e jadi persembahen dosa janah sada nari jadi persembahen tutungen. Ban imam pendamen man bana perban enggo erdosa+ ia sebap deherina kalak mate. Kenca si e arus pebadiana takalna bas wari e.
12 Jenari arus sekali nari pisahkenna dirina man Jahwe jadi sekalak Nasir janah arus babana biri-biri jantan si umurna setahun ntah kurang jadi persembahen kesalahen. Tapi sedekah ia najis, ia la ikira jadi sekalak Nasir.
13 “‘Enda undang-undang kerna sekalak Nasir: Adi enggo tepatina janjina jadi sekalak Nasir,+ ibaba ia ku pintu masuk kemah perjumpan.
14 I je arus berekenna persembahen man Jahwe: sada biri-biri jantan guna persembahen tutungen,+ sada biri-biri beruna guna persembahen dosa+ janah duana arus sehat ras umurna arus setahun ntah kurang, sada biri-biri jantan si sehat guna korban persadan,+
15 sada keranjang roti si la itama ragi si bentukna bagi gelang si iban arah tepung halus si icampur minak, roti si menipes si la itama ragi si iolesi alu minak, persembahen pangan,*+ ras persembahen inemen.+
16 Kenca si e persembahken imam kerina e i lebe-lebe Jahwe janah persembahkenna persembahen dosa ras persembahen tutungen kalak ndai.
17 Persembahken imam ka biri-biri jantan e jadi korban persadan man Jahwe radu ras sada keranjang roti si la itama ragi. Arus ka persembahken imam persembahen pangan+ ras persembahen inemen kalak ndai.
18 “‘Arus ipotong sekalak Nasir e bukna+ i lebe-lebe kemah perjumpan, jenari buatna bukna e janah tamana ku bas api si lit i teruh korban persadan.
19 Kenca si e arus buat imam paha si arah lebe arah biri-biri jantan si ibelgang+ e, janah buatna ka arah keranjang ndai sada roti si la itama ragi si bentukna bagi gelang, ras sada roti si menipes si la itama ragi, jenari tamana kerina e ku tan sekalak Nasir ndai kenca potongna bukna si jadi tanda maka ia sekalak Nasir.
20 Arus ayunken imam kerina e jadi persembahen si iayunken i lebe-lebe Jahwe.+ Enda badia man imam, termasuk bagin dada ras nahe arah persembahen si iayunken e.+ Kenca si e banci inem sekalak Nasir e anggur.
21 “‘Enda undang-undang kerna sekalak Nasir:+ Adi erjanji ia maka ngasup ia mereken persembahen man Jahwe lebih asa si itentuken man sekalak Nasir, arus tepatina janjina e menurut undang-undang kerna sekalak Nasir.’”
22 Kenca si e nina Jahwe man Musa,
23 “Bagendalah nindu man Harun ras anak-anakna, ‘Bagendalah cara kena masu-masu+ kalak Israel:
24 “Mbera-mbera ipasu-pasu+ ras ilindungi Jahwe kena.
25 Mbera-mbera cirem Jahwe natap kena,+ mbera-mbera ngena ateNa ngidah kena.
26 Mbera-mbera mehuli Jahwe man kena janah bereNa kedamen man kena.”’+
27 Arus ipake kalak e gelarKu guna masu-masu bangsa Israel,+ gelah Kupasu-pasu kalak e.”+
Cataten i teruh
^ Ertina “Kalak si Ipisahken; Kalak si Ikhususken.”
