Bilangen 8:1-26
8 Nina Jahwe man Musa,
2 “Bagendalah nindu man Harun, ‘Sanga pegarandu lampu, pituna lampu e arus nerangi daerah si lit i lebe-lebe ingan lampu e.’”+
3 Lakoken Harun bage. Pegarana lampu e guna nerangi daerah si lit i lebe-lebe ingan lampu ndai,+ bagi si perentahken Jahwe man Musa.
4 Bagenda cara erban ingan lampu e: Ingan lampu e iban arah emas si itempah, itempah mulai arah batangna seh ku kelopak bungana.+ E iban bagi si enggo icidahken+ Jahwe man Musa.
5 Nina Jahwe ka man Musa,
6 “Pisahkenlah kalak Lewi arah kalak Israel janah pebadialah kalak e.+
7 Enda si arus lakokenndu guna mbersihken kalak e: Percikken man kalak e lau guna mbersihken dosa. Arus cukur kalak e kerina dagingna, cucina bajuna, janah bersihkenna dirina.+
8 Kenca si e arus buat kalak e sada lembu jantan si nguda denga+ ras persembahen pangan*+ si iban arah tepung halus si icampur minak, bage pe sada nari lembu jantan si nguda denga jadi persembahen dosa.+
9 Kenca si e babalah kalak Lewi ku lebe-lebe kemah perjumpan janah suruh kerina kalak Israel pulung.+
10 Sanga babandu kalak Lewi ku lebe-lebe Jahwe, arus tama kalak Israel tanna ku datas takal kalak Lewi.+
11 Arus bereken Harun kalak Lewi jadi persembahen*+ man Jahwe arah kalak Israel nari, janah tugas kalak e kari ngelayani Jahwe.+
12 “Kenca si e arus tama kalak Lewi tanna i datas takal lembu-lembu jantan e.+ Jenari arus bereken kalak e sada lembu jadi persembahen dosa janah sada nari jadi persembahen tutungen man Jahwe. Enda ndai kerina guna erban pendamen+ man kalak e.
13 Suruhlah kalak e tedis i lebe-lebe Harun ras anak-anakna janah persembahkenlah* kalak e jadi persembahen si iayunken man Jahwe.
14 Arus pisahkenndu kalak Lewi arah kalak Israel nari, jadi jangKu me kalak Lewi.+
15 Kenca si e kalak Lewi arus ngelayani bas kemah perjumpan. Bage me carandu mpebadia kalak e ras mpersembahken* kalak e jadi persembahen si iayunken.
16 Arah kalak Israel nari, kalak e me si jadi jangKu. Kupisahken kalak e man bangKu guna nggantiken kerina anak sintua arah kalak Israel.+
17 JangKu kap kerina anak sintua bas Israel bage pe kerina anak si pertama lahir arah binatang si lit bas Israel.+ Enggo Kupebadia kalak e jadi jangKu sanga Kubunuh kerina anak sintua kalak Mesir.+
18 Kalak Lewi si Kuban nggantiken kerina anak sintua Israel.
19 I antara kalak Israel, Kubereken kalak Lewi man Harun bage pe man anak-anakna. Kalak e si ndalanken tugas guna kepentingen kalak Israel bas kemah perjumpan+ ras erban pendamen man kalak Israel,+ gelah kalak Israel la kena bencana perban deherina ingan si badia.”
20 Musa, Harun, ras bangsa Israel ngelakoken si ndai kerina man kalak Lewi. Lakoken kalak e man kalak Lewi bagi si perentahken Jahwe man Musa.
21 Emaka bersihken kalak Lewi dirina janah cucina bajuna.+ Kenca si e persembahken* Harun kalak e jadi persembahen si iayunken man Jahwe.+ Jenari iban Harun pendamen man kalak e guna mpebadia kalak e.+
22 Dung e, lawes kalak Lewi ku kemah perjumpan guna ndalanken tugasna, janah si ngawasisa eme Harun ras anak-anakna. Bage me si ilakoken man kalak Lewi bagi si perentahken Jahwe man Musa.
23 Nina Jahwe man Musa,
24 “Enda peraturen man kalak Lewi: Dilaki si umurna 25 tahun ku datas arus ikut bas kelompok si ertugas bas kemah perjumpan.
25 Tapi kenca umurna 50 tahun, arus ia pensiun arah tugasna janah lanai ngelayani.
26 Banci sampatina seninana si ngelayani denga bas kemah perjumpan tapi lanai ia banci ngelayani i je. Enda me si arus lakokenndu man kalak Lewi bage pe tugas-tugasna.”+
Cataten i teruh
^ As. “persembahen si iayunken.” Maksudna, kalak e isuruh ergerak ku lebe ras ku pudi.
^ As. “ayunkenlah.” Maksudna, kalak e isuruh ergerak ku lebe ras ku pudi.
^ As. “ngayunken.” Maksudna, kalak e isuruh ergerak ku lebe ras ku pudi.
^ As. “ayunken.” Maksudna, kalak e isuruh ergerak ku lebe ras ku pudi.