Bilangen 9:1-23
9 Bas bulan pertama+ tahun si peduaken kenca ndarat kalak Israel arah Mesir nari, ngerana Jahwe man Musa i Taneh Mesawang* Sinai, nina,
2 “Arus sikapken kalak Israel korban Paskah+ bas waktu si enggo itentuken.+
3 Bas wari pe-14-ken bas bulan e eme paksa karaben,* arus iban kena persikapen e bas waktu si enggo itetapken. Si e arus isikapken menurut kerina peraturen ras ketetapen si enggo iban.”+
4 Emaka kataken Musa man kalak Israel gelah sikapken kalak e korban Paskah.
5 Kenca si e, bas wari pe-14-ken bas bulan si pertama eme paksa karaben,* sikapken kalak e korban Paskah i Taneh Mesawang* Sinai. Lakoken kalak Israel kerina bagi si perentahken Jahwe man Musa.
6 Tapi lit kalak si la banci nikapken korban Paskah bas wari e perban kuitna mayat kalak mate,+ emaka jumpaina Musa ras Harun bas wari e.+
7 Jenari nina kalak e man Musa, “Kami najis perban kuit kami mayat kalak mate. Tapi payo kin la banci sikapken kami persembahen man Jahwe bas waktu si enggo itetapken, bagi kalak Israel si debanna?”+
8 Nina Musa ngaloisa, “Timai kena lebe jenda, gelah kupindo lebe petunjuk man Jahwe kerna kena.”+
9 Kenca si e nina Jahwe man Musa,
10 “Bagendalah nindu man kalak Israel, ‘Amin pe lit antara kena ntah pe keturunen kena si lawes ndauh ntah pe jadi najis perban ngkuit mayat kalak mate,+ arus tetap sikapkenna korban Paskah man Jahwe.
11 Arus sikapkenna bas wari pe-14-ken bas bulan si peduaken+ eme paksa karaben.* Arus panna e radu ras roti si la itama ragi bage pe gulen si pagit.+
12 Janah la banci lit si sisa seh paginna.+ Sada tulan pe la banci penggelkenna arah korban e.+ Arus sikapkenna menurut kerina peraturen kerna Paskah.
13 Tapi adi lit kalak si la nikapken korban Paskah amin pe labo ia najis ntah pe lawes ndauh, ia arus ibunuh.+ Sebap la berekenna persembahen man Jahwe bas waktu si itentuken. Arus tanggungna dosana e.
14 “‘Penduduk asing pe arus nikapken korban Paskah man Jahwe.+ Arus sikapken kalak e menurut peraturen ras ketetapen kerna Paskah.+ Arus lit peraturen si patuhi kena bage pe penduduk asing.’”+
15 Kenca dung kemah ingan ersembah ipasang,+ nusur embun nutupi kemah e si isina Peti Perjanjin.* Tapi sanga berngi, embun e teridah bagi api i datas kemah e seh ngasa erpagi-pagi.+
16 Enda si terus terjadi: Paksa ciger, lit embun i datas kemah ingan ersembah, janah paksa berngi, embun e teridah tempa-tempa bagi api.+
17 Katawari pe embun e nangkih, kalak Israel arus pindah,+ janah i japa pe embun e ngadi, i je me kalak Israel erkemah.+
18 Kalak Israel pindah perban perentah Jahwe, janah kalak e erkemah perban perentah Jahwe.+ Adi lit denga embun i datas kemah ingan ersembah, kalak e tetap erkemah bas ingan e.
19 Adi embun e lit piga-piga wari dekahna i datas kemah ingan ersembah, arus patuhi kalak Israel perentah Jahwe janah la kalak e pindah.+
20 Mon-mon, piga-piga wari dekahna embun e i datas kemah ingan ersembah. Kalak e tetap erkemah perban perentah Jahwe, janah kalak e pindah perban perentah Jahwe.
21 Mon-mon embun e lit i datas kemah ingan ersembah mulai berngi seh ngasa erpagi-pagi. Adi nangkih embun e sanga erpagi-pagi, kalak e arus pindah. La soal suari ntah pe berngi embun e nangkih, kalak e arus pindah.+
22 La soal dua wari ntah sada bulan ntah pe terdekahen, adi tetap denga embun e i datas kemah ingan ersembah, kalak Israel arus tetap erkemah i je janah la banci pindah. Tapi adi nangkih embun e, kalak e arus pindah.
23 Kalak e tetap erkemah perban perentah Jahwe, janah kalak e pindah perban perentah Jahwe. Terus patuhi kalak e Jahwe menurut perentah si bereken Jahwe man Musa.
Cataten i teruh
^ Taneh si mbelang si jarang iingani.
^ Maksudna, kenca terbenam matawari.
^ Maksudna, kenca terbenam matawari.
^ Taneh si mbelang si jarang iingani.
^ Maksudna, kenca terbenam matawari.
^ Ntah “Peti Perpadanen.”
