Daniel 1:1-21
1 Bas tahun si peteluken Raja Joyakim+ merentah i Juda, reh Nebukadnesar raja Babilon ku Jerusalem janah kepungna kota e.+
2 Jahwe mpediat Joyakim raja Juda+ ras piga-piga barang arah rumah pertoton Dibata si benar itaban Nebukadnesar. Babana kerina barang e ku daerah Babilon*+ ku rumah dibatana. Tamakenna barang-barang e bas ingan nimpan erta dibatana.+
3 Kenca si e, raja nuruh Aspenas kepala pegawai istana e guna maba piga-piga kalak Israel, termasuk keturunen raja ras keturunen bangsawan.+
4 Si arus babana eme anak-anak muda si la lit cacatna, ganteng, pentar, beluh, erpemeteh,+ ras beluh erdahin bas istana raja. Arus ajari Aspenas pemeteh* ras bahasa kalak Kaldea man kalak e.
5 Tiap wari, tetapken raja gelah ibereken man kalak e pangan si entabeh ras anggur si biasa ibereken man raja. Kalak e iajari* telu tahun dekahna, kenca si e ertugas pagi kalak e bas istana raja.
6 I tengah-tengah kalak e, lit si rehna arah suku Juda eme Daniel,*+ Hanania,* Misael,* ras Asaria.*+
7 Kepala pegawai istana mereken gelar* man kalak e. Gelar Daniel banna jadi Beltasar,+ gelar Hanania banna jadi Saderah, gelar Misael banna jadi Mesah, gelar Asaria banna jadi Abednego.+
8 Tapi tetapken Daniel bas ukurna maka la ia nggit man pangan raja si entabeh bage pe nginem anggurna, sebap bas pangan e lit si najis. Emaka mindo ia man pegawai e gelah la padah panna pangan e, gelah ula ia najis.
9 Ban Dibata si benar gelah mehuli perbahanen pegawai istana e man Daniel ras mekuah atena ia.+
10 Tapi nina pegawai e man Daniel, “Mbiar aku man raja. Ia kap si netapken gelah pangan ras inemen e ibereken man kena. Uga kari ningku adi idahna kena kertangen asangken anak muda si deban si sebaya ras kena? Ban kena kap pagi aku ersalah i lebe-lebe raja.”
11 Tapi nina Daniel man kalak si itugasken pegawai istana e, si isuruh guna njaga Daniel, Hanania, Misael, ras Asaria,
12 “Ujilah kami sepuluh wari dekahna. Berekenlah gulen-gulen* jadi pangan kami, ras lau jadi inemen kami.
13 Kenca si e, bandingkenndu daging kami ras anak muda si deban si man pangan raja, jenari tentukenndu kai atendu si lakokenndu man kami.”
14 Emaka setuju ia janah ujina kalak e sepuluh wari dekahna.
15 Kenca sepuluh wari, mbestangen ras sehaten* kalak e asangken kerina anak muda si man pangan raja.
16 Kenca wari e, lalap berekenna man kalak e gulen-gulen, labo pangan ras anggur arah raja.
17 Dibata si benar erban empatna anak muda e meteh ras ngangkai kerina jenis pemeteh ras kepentaren. Daniel pe ibereken kengasupen guna ngangkai kerina pengenehenen* ras nipi.+
18 Kenca enggo dung waktu si tentuken raja,+ kepala pegawai istana e maba kalak e ngadap ku Nebukadnesar.
19 Ngerana me raja man kerina anak muda e, i tengah-tengah kalak e la lit si bagi Daniel, Hanania, Misael, ras Asaria.+ Emaka terus kalak e i je ngelayani raja.
20 Tiap sungkun raja persoalen si merluken kepentaren ras pengertin, jawapen kalak e sepuluh kali ulin asangken kerina si beluh ilmu gaib ras peramal+ si lit bas kerajanna.
21 Daniel tetap i je seh ngasa tahun si pertama pemerentahen Raja Kores.+
Cataten i teruh
^ As. “Sinar.”
^ As. “tulisen.”
^ Ntah banci saja “iurus.”
^ Ertina “Enggo Cidahken Jahwe Perkuah Ate.”
^ Ertina “Jahwe Enggo Nampati.”
^ Mungkin ertina, “Ise si Bagi Dibata?”
^ Ertina “Dibata kap Hakimku.”
^ Maksudna, gelar Babilon.
^ Ntah “sayur-sayur.”
^ As. “mburen.”
^ Eme kerna kai pe si cidahken Dibata ku bas pikiren sekalak jelma.
