Daniel 10:1-21
10 Bas tahun si peteluken pemerentahen Kores+ raja Persia, Daniel si igelari Beltasar+ ndatken sada berita. Berita e tuhu, janah isina kerna perang si mbelin. Angkana berita e janah angkana kai si idahna.
2 Paksa si e, aku, Daniel, enggo erceda ate+ telu minggu dekahna.
3 La kupan pangan si entabeh, la kupan daging, ras la kuinem anggur. La kuminaki dagingku telu minggu dekahna.
4 Bas tahun si pe-24-ken bas bulan si pertama, aku sangana i tepi lau galang eme Lau Tigris.*+
5 Kuidah sekalak dilaki si erbaju linen+ janah pakena ikat pinggang arah emas murni nari.
6 Dagingna bagi batu krisolit,+ ayona bagi kilap, matana bagi obor si gara, tan ras nahena bagi tembaga si igusgus ngasa erndilap,+ janah sorana bagi sora enterem jelma.
7 Aku ngenca si ngidah pengenehenen* e, kalak si radu ras aku la idahna si e.+ Tapi mbiar kel kalak e janah cebuni kalak e.
8 Tading aku i je sisada. Sanga kuidah pengenehenen si luar biasa e, lanai aku ergegeh, pucat ayoku janah bene kerina gegehku.+
9 Kenca si e kubegi ia ngerana. Tapi kenca kubegi ia ngerana, pingsan aku janah ndabuh aku, ayoku ku taneh.+
10 Kenca si e, lit tan si njemak aku,+ ugur-ugurna gelah medak aku, jenari sujud aku.
11 Kenca si e nina man bangku,
“O Daniel, kam tuhu-tuhu kalak si ikelengi,*+ perdiatekenlah kata-kata si nandangi kupeseh man bandu. Gundari tedislah kam, perban aku enggo isuruh ndahi kam.”
Sanga ngerana ia man bangku, tedis aku janah nggirgir aku.
12 Kenca si e nina man bangku, “O Daniel, ula kam mbiar,+ sebap totondu enggo ibegiken mulai kin tangtangna nari petetapndu ukurndu guna ndatken pengertin, ras peterukndu bandu i lebe-lebe Dibatandu, emaka reh aku perban totondu e.+
13 Tapi ilawan peminpin+ arah daerah kerajan Persia aku 21 wari dekahna. Jenari Mikael*+ eme salah sada peminpin si meganjangna, reh nampati aku, janah tetap aku i je, i deher raja-raja Persia.
14 Reh aku guna nampati kam ngangkai si nandangi terjadi man bangsandu bas bagin pendungi masa e,+ sebap pengenehenen e kerna wari si pepagi.”+
15 Kenca katakenna si e, mis aku tungkuk, lanai aku ngasup ngerana.
16 Dung e, si teridah bagi manusia ndai ngkuit biberku.+ Emaka kukataken man si tedis i lebe-lebeku e, “O Tuan, pengenehenen e erban aku nggirgir janah lanai lit gegehku.+
17 Emaka uga pelayanndu enda banci ngerana man bandu, Tuan?+ Lanai lit gegehku, menam bene kesahku.”+
18 Si teridah bagi manusia e, kuitna aku sekali nari janah pegegehina aku.+
19 Kenca si e nina, “O kam kalak situhu-tuhu ikelengi,*+ ula kam mbiar.+ Mbera-mbera lit dame bas kam.+ Megegehlah kam.” Sanga ia ngerana ras aku, reh gegehna aku janah ningku, “O Tuan, ngeranalah kam, sebap enggo pegegehindu aku.”
20 Kenca si e nina, “Tehndu kin engkai maka reh aku ndahi kam? Gundari, aku mulih guna ngelawan peminpin Persia.+ Sanga lawes aku, reh kari peminpin Junani.
21 Tapi kukataken man bandu kai si tertulis bas buku kebenaren. La lit si deban si ndukung aku selain Mikael,+ peminpin kena.+
Cataten i teruh
^ As. “Hidekel.”
^ Eme kerna kai pe si cidahken Dibata ku bas pikiren sekalak jelma.
^ Ntah “kalak si ihamati kel.”
^ Ertina “Ise si Bagi Dibata?”
^ Ntah “kalak si ihamati kel.”
