Daniel 11:1-45
11 Kenca si e nina dilaki si make baju linen e, “Bas tahun si pertama pemerentahen Darius+ kalak Media e, kupegegehi ia ras kulindungi.
2 Kai si nandangi kukataken enda tuhu,
“Lit ka pagi telu raja nari i Persia. Kenca si e, raja si peempatken mpepulung mbue kebayaken, buen asangken kerina raja si debanna. Kenca reh gegehna ia perban kebayakenna, pepulungna kai pe guna ngelawan kerajan Junani.+
3 “Reh pagi sekalak raja si megegeh. Daerah kekuasanna mbelang+ janah ate-atena perbahanenna.
4 Tapi sanga megegeh kel kuasana, pecah kerajanna janah terbagi ku empat arah.+ Icabut pagi kerajanna janah ibereken man kalak si deban, tapi labo man keturunenna. Pemerentahen kalak e la seri gegehna ras ia.
5 “Megegeh pagi raja selatan, ia rehna arah salah sada peminpinna. Tapi lit pagi sekalak si naluken ia janah kuasana belinen asangken ia.
6 “Piga-piga tahun kenca si e, kerja sama kalak e. Reh pagi anak si diberu arah raja selatan ndahi raja utara guna erban perjanjin. Tapi bene pagi kuasa anak si diberu e. Raja e pe bene pagi kuasana. Iserahken pagi anak si diberu e radu ras si nemani ia, bapakna, bage pe kalak si erban ia megegeh sedekah e.
7 Janah salah sada anggota keluarga* anak si diberu e reh pagi nggantiken raja e.* Dahina pagi pasuken tentera guna nyerang benteng raja utara, janah talukenna kalak e.
8 Mulih pagi ia ku Mesir alu maba dibata-dibata kalak e, patung-patung logamna,* barang-barangna si merga si iban arah pirak ras emas, bage pe kalak si itaban. Kenca si e, piga-piga tahun dekahna, jaga jarak ia arah raja utara
9 si nyerang kerajan raja selatan, tapi mulih pagi ia ku negrina.
10 “Ersikap pagi anak-anakna* guna erperang janah pepulungna pasuken si seh kel teremna. Maju pagi ia nyerang kerina negri bali bagi banjir. Tapi mulih pagi ia janah lalap ia erperang i gedang-gedang dalan ku bentengna.
11 “Merawa pagi raja selatan janah serangna raja utara. Pepulungna pagi enterem jelma, tapi kerina pagi kalak e iserahken ku raja e.*
12 Kerina kalak e ibaba pagi lawes. Dungna meganjang pagi ukurna.* Bunuhna pagi puluhen ribu kalak, tapi la pagi gunakenna kedudukenna si megegeh.
13 “Reh ka pagi mulihi raja utara janah babana terbuen kalak, buen asangken si pertama. Kenca piga-piga waktu, kenca piga-piga tahun, reh ka ia alu pasuken si mbelin si lengkap senjatana.
14 Paksa si e, melala si reh ngelawan raja selatan.
“Ibaba pagi kalak si kejam* arah bangsandu guna erban sada pengenehenen* terjadi, tapi labo pagi kalak e berhasil.
15 “Reh pagi raja utara, jenari banna gun-gunen guna nyerang ras ngerebut kota si erbenteng. Pasuken arah negri selatan ras pasukenna si megegehna labo pagi ngasup ertahan, janah la lit gegeh kalak e guna ertahan.
16 Si reh ngelawan ia,* ate-atena pagi perbahanenna, janah la lit si ngasup ngelawanca. Tedis pagi ia* i Negri Si Mejile,+ janah lit kengasupenna guna ngancurken.
17 Enggo tetapkenna ukurna guna reh alu kerina kuasa kerajanna. Banna pagi perjanjin ras ia janah berhasil pagi ia. Ipediat pagi ia engkernepken anak diberu arah sekalak diberu. La pagi ngasup anak diberu e ertahan, janah labo pagi lalap ia jadi jang raja e.
18 Serangna pagi daerah tepi laut janah rebutna melala daerah. Lit sekalak komandan si erban lanai tual perbahanenna, emaka lanai pagi ia tual. Ban komandan e pagi perbahanenna si tual e mulihken man bana.
19 Kenca si e, lawes ia* ku benteng-benteng si lit bas negrina, tertuktuk pagi ia jenari ndabuh, emaka lanai pagi ia lit.
20 “Kenca si e, reh sekalak si nggantiken posisina. Suruhna pagi pemungut pajak* lewat arah kerajan si mewah e, tapi kernep pagi ia bas piga-piga wari, labo perban kejahaten ntah pe perban perang.
21 “Jenari sekalak si ianggap hina reh pagi nggantiken posisina. Kehamaten kerajan e la pagi ibereken man bana. Reh pagi ia bas masa si aman* janah rebutna pagi kerajan e alu cara si licik.
22 Talukenna pagi pasuken si bagi banjir e. Hancurkenna pagi kalak e bage pe Peminpin+ perjanjin e.+
23 Perban lit si kerja sama ras ia, lalap pagi ia nipu ras nyerang. Dungna megegeh ia perban penampat bangsa si kitik.
24 Bas masa si aman,* masuk pagi ia ku daerah si mejilena bas propinsi e janah lakokenna kai si lenga pernah lakoken nini bulangna. Bagikenna man rakyat barang rampasen, jarahen, ras erta. Banna rencana guna nyerang ingan-ingan si erbenteng, tapi bas ntisik e ngenca.
25 “Pepulungna gegehna janah usahakenna kel gelah pang ia ngelawan raja selatan alu pasukenna si enterem. Ersikap pagi raja selatan ras pasukenna si la tanggung teremna janah megegeh guna erperang. Tapi labo pagi ia* ngasup ertahan, sebap enggo sekongkol kalak e guna nyerang ia.
26 Kalak si man panganna si entabeh pagi si erban ia ndabuh.
“Igedapken pagi pasukenna janah mbue pagi si terbunuh.
27 “Duana raja e lalap pagi atena ngelakoken si jahat. Kundul pagi kalak e sada meja janah sitipun kalak e duana. Tapi, la pagi berhasil rencana kalak e, perban waktu si itetapken man kedungen e lenga seh.+
28 “Mulih pagi ia* ku negrina maba barang si melala, janah tetapkenna bas ukurna ngelawan perjanjin si badia. Berhasil pagi ia janah mulih ku negrina.
29 “Bas waktu si itetapken, reh pagi ia mulihi ngelawan negri selatan. Tapi keadanna la bagi si sebelumna,
30 perban reh pagi kapal-kapal Kitim+ ngelawan ia, janah lanai ia pang.
“Mulih pagi ia janah merawa ia man perjanjin si badia.+ Ertindak pagi ia janah berhasil. Mulih pagi ia janah perdiatekenna kalak si nadingken perjanjin si badia e.
31 Lit pagi pasuken-pasuken si reh arah ia nari. Najis pagi ban kalak e benteng e eme ingan si badia,+ janah pengadina persembahen si ibereken alu ratur.+
“Pajekken kalak e pagi kai si erban ciga ate si erban hancur.+
32 “Kalak si jahat perbahanenna ras si ngelanggar perjanjin e, banna pagi jadi murtad alu rananna si licik.* Tapi umat si nandai Dibatana menang pagi. Ertindak pagi kalak e janah berhasil.
33 Kalak si lit pengangkanna+ mereken pengertin man enterem kalak. Piga-piga waktu dekahna, ndabuh pagi kalak e iban pedang ras api, bage pe perban itaban ras irampok.
34 Tapi sanga ndabuh kalak e, dat kalak e pagi sitik penampat. Enterem pagi si ndukung kalak e alu ranan si licik.*
35 Piga-piga kalak si lit pengangkanna iban pagi ndabuh. Alu bage, kalak si deban banci imurniken, ibersihken, ras ipebadia+ seh ku pendungi jaman, perban waktu si itetapken lenga seh.
36 “Ate-ate raja e* perbahanenna, janah peganjangna bana, muliakenna bana i datas kerina dibata. Alu rananna, hinana pagi Dibata si ganjangen asangken dibata si apai pe.+ Berhasil pagi ia seh ngasa cidahken Dibata rawaNa, perban kai si enggo itetapken pasti pagi terjadi.
37 La pagi hamatina Dibata nini bulangna. La ergaina sura-sura diberu-diberu, ras la hamatina dibata si apai pe. Peganjangna bana i datas kerina kalak.
38 Tapi si imuliakenna dibata benteng-benteng, si la itandai nini bulangna. Berena emas, pirak, permata, ras barang-barang si merga man dibata e.
39 Alu penampat dibata si deban e, berhasil pagi ia naluken benteng-benteng si paguhna. Berekenna pagi kehamaten si mbelin man ise pe si ndukung ia.* Banna pagi kalak e erkuasa nandangi enterem kalak. Bagikenna pagi taneh man ise pe si nggalarisa.
40 “Bas pendungi jaman, ia ras raja selatan siserang-serangen pagi. Serang raja utara pagi ia alu gereta perang, si nangkih kuda, ras melala kapal. Masuk pagi ia ku negri-negrina bali bagi banjir janah serangna kerinana.
41 Masuk pagi ia ku Negri Si Mejile,+ janah melala negri si talukenna. Tapi lit negri si selamat arah kuasana nari eme Edom, Moap, ras bagin utama arah bangsa Ammon.
42 Lalap serangna melala negri, janah Mesir pe la pagi banci selamat.
43 Erkuasa pagi ia nandangi erta si terbuni eme emas, pirak, bage pe kerina barang si merga arah Mesir. Kalak Libia ras kalak Etiopia pe ngikutken ia pagi.
44 “Tapi laporen-laporen arah timur* ras utara erban ia gelisah, janah maju pagi ia alu seh kel rawana guna engkernepken ras nasapken enterem kalak.
45 Pajekkenna pagi kemahna si mewah antara laut si mbelang ras gunung si badia si lit i Negri Si Mejile.+ Kenca si e ikernepken pagi ia janah la lit si nampatisa.
Cataten i teruh
^ As. “salah sada tunas arah urat.”
^ Mungkin maksudna raja selatan.
^ Ntah “patung tuangenna.”
^ Mungkin maksudna raja utara.
^ Mungkin maksudna raja selatan.
^ Mungkin maksudna raja selatan.
^ Ntah “Ibaba pagi anak-anak perampok.”
^ Eme kerna kai pe si cidahken Dibata ku bas pikiren sekalak jelma.
^ Mungkin maksudna raja selatan.
^ Mungkin maksudna raja utara.
^ Mungkin maksudna raja utara.
^ Ntah “kalak si ndaftarken jadi tentera.”
^ Ntah banci saja “la isangka-sangka.”
^ Ntah banci saja “la isangka-sangka.”
^ Mungkin maksudna raja utara.
^ Mungkin maksudna raja utara.
^ Ntah “muji-muji.”
^ Ntah “muji-muji.”
^ Mungkin maksudna raja utara.
^ Ntah banci saja “si dukungna.”
^ Ntah “matawari terbit.”
