Daniel 3:1-30
3 Raja Nebukadnesar erban patung emas si gedangna kira-kira 27 meter* janah belangna kira-kira telu meter.* Pajekkenna patung e i Dataren Dura i Propinsi Babilon.
2 Raja Nebukadnesar merentahken gelah mpepulung kepala-kepala gubernur, pejabat daerah, gubernur-gubernur, penasehat raja, bendahara, hakim, pejabat pengadilen, ras kerina pejabat propinsi. Kalak e ipepulung guna ngeresmiken patung si enggo ipajekken Raja Nebukadnesar e.
3 Emaka pulung kepala-kepala gubernur, pejabat daerah, gubernur-gubernur, penasehat raja, bendahara, hakim, pejabat pengadilen, ras kerina pejabat propinsi guna ngeresmiken patung si enggo pajekken Raja Nebukadnesar e. Tedis kalak e i lebe-lebe patung si ipajekken Nebukadnesar e.
4 Kenca si e sekalak petugas ngumumken alu sora megang, nina, “O kena si reh arah erbage bangsa ras bahasa, begikenlah perentah enda:
5 Adi begi kena sora trompet tanduk, suling, siter,* harpa* si kitik, alat musik si debanna si lit senarna, suling si galang, ras alat musik si debanna, arus kena sujud nembah patung emas si pajekken Raja Nebukadnesar.
6 Ise pe si la sujud guna nembah, mis ibenterken ku ingan api si gurlah.”+
7 Emaka sanga kerina kalak arah erbage bangsa ras bahasa e megi sora trompet tanduk, suling, siter, harpa si kitik, alat musik si debanna si lit senarna, suling si galang, ras alat musik si debanna, sujud kalak e nembah patung emas si pajekken Raja Nebukadnesar.
8 Sanga si e, piga-piga kalak Kaldea lawes ngadap raja janah adukenna* kalak Jahudi.
9 Nina kalak e man Raja Nebukadnesar, “O Raja, rasa lalaplah kam nggeluh.
10 O Raja, enggo perentahkenndu maka tiap kalak si megi sora trompet tanduk, suling, siter, harpa si kitik, alat musik si debanna si lit senarna, suling si galang, ras alat musik si debanna, arus sujud nembah patung emas e.
11 Ise pe si la sujud guna nembah arus ibenterken ku ingan api si gurlah.+
12 Tapi kalak Jahudi si enggo lantikndu jadi pejabat Propinsi Babilon, eme Saderah, Mesah, ras Abednego,+ la hamatina kam, Raja. La sembah kalak e dewa-dewandu Raja, janah la kalak e nggit nembah patung emas si pajekkenndu.”
13 Emaka merawa kel Nebukadnesar, suruhna gelah Saderah, Mesah, ras Abednego, ibaba ngadap ia. Emaka ibaba me kalak e ngadap raja.
14 Nina Nebukadnesar, “Saderah, Mesah, ras Abednego, tuhu kin la sembah kena dewa-dewaku+ janah la kena nggit sujud man patung emas si kupajekken?
15 Gundari sanga begi kena sora trompet tanduk, suling, siter, harpa si kitik, alat musik si debanna si lit senarna, suling si galang, ras alat musik si debanna, jenari sujud kena nembah patung si kuban e, labo kari kena kaden pe. Tapi adi la sembah kena, mis kari kena ibenterken ku ingan api si gurlah. Dewa si apai kin si ngasup nelamatken kena arah aku nari?”+
16 Nina Saderah, Mesah, ras Abednego ngaloi raja, “O Raja Nebukadnesar, enggom jelas jawapen kami.
17 Adi arus kin kami ibenterken ku ingan api si gurlah e, Dibata si sembah kami ngasup nelamatken kami arah api si gurlah e, o Raja, ngasup nge Ia nelamatken kami arah tanndu.+
18 Tapi bicara la pe selamatkenNa kami, perlu tehndu o Raja, labo kami nggit nembah dewa-dewandu janah sujud man patung emas si pajekkenndu.”+
19 Emaka merawa kel Nebukadnesar man Saderah, Mesah, ras Abednego, janah enggo sambar ayona.* Suruhna gelah ingan api si gurlah e iban pitu kali lasen asangken si biasana.
20 Suruhna piga-piga prajuritna si megegeh ngiket Saderah, Mesah, Abednego ras mbenterken kalak e ku ingan api si gurlah e.
21 Emaka kalak e iiket janah ibenterken ku ingan api si gurlah e janah lengkap denga paken kalak e eme mantel, baju, topi, ras paken si debanna.
22 Perban perentah raja seh kel kejamna janah ingan api e iban gurlah la tanggung lasna, kalak si mbenterken Saderah, Mesah, ras Abednego e mate tertutung.
23 Tapi dilaki e teluna eme Saderah, Mesah, ras Abednego ndabuh ku ingan api si gurlah e janah teriket denga.
24 Kenca si e, mbiar kel Raja Nebukadnesar janah mis ia tedis. Nina man pejabatna, “La kin ndai telu kalak nge siiket janah ibenterken ku ingan api e?” Nina kalak e ngaloi, “Ue, payo Raja.”
25 Nina raja, “Tapi lit kuidah empat kalak si erdalan i tengah-tengah api e, la kalak e kaden pe, si peempatken e bagi dewa kuidah.”
26 Deheri Nebukadnesar pintu ingan api si gurlah e janah erlebuh ia, nina, “O Saderah, Mesah, Abednego, pelayan Dibata Si Meganjangna,+ ndaratlah kena, mari ku jenda!” Emaka ndarat me Saderah, Mesah, ras Abednego arah api e.
27 Kepala-kepala gubernur, pejabat daerah, gubernur-gubernur, ras pejabat si debanna si pulung i je+ ngidah maka api e sitik pe la ngelukai daging kalak e.+ Sada pe buk kalak e la meseng, mantel kalak e pe la ceda, bau asap pe kalak e lang.
28 Kenca si e nina Nebukadnesar, “Terpujilah Dibata Saderah, Mesah, ras Abednego.+ UtusNa malekatNa janah selamatkenNa pelayan-pelayanNa. Tek kalak e man baNa janah ilawan kalak e perentah raja. Padin akap kalak e mate asangken nembah dibata si deban selain Dibatana.+
29 Perban si e, kuperentahken maka kalak arah bangsa ras bahasa si apai pe si la mehamat rananna man Dibata Saderah, Mesah, ras Abednego, arus ia ipotong-potong janah rumahna iban jadi WC umum.* La lit dibata si deban si banci nelamatken bagi Dibata kalak e.”+
30 Emaka ban Raja me Saderah, Mesah, ras Abednego naik pangkat i Propinsi Babilon.+
Cataten i teruh
^ As. “belangna 6 hasta.”
^ Alat musik si lit ka senarna.
^ Harpa eme alat musik si ersenar bagi gitar, tapi bentukna beda.
^ Ntah “pitnahna.”
^ Ntah “enggo berubah ukurna.”
^ Ntah banci saja “jadi ingan sampah.”
