Daniel 4:1-37
4 “Arah Raja Nebukadnesar nari man kerina kalak arah erbage bangsa ras bahasa si tading i belang-belang doni: Ertambah-tambahlah kedamen kena!
2 Kuceritaken ateku kerna mukjizat ras kai si luar biasa si lakoken Dibata Si Meganjangna man bangku.
3 Luar biasa kel mukjizat ras perbahanenNa si hebat! KerajanNa eme kerajan si rasa lalap janah erkuasa Ia arah jaman ku jaman.+
4 “Aku Nebukadnesar, senang geluhku bas rumahku janah makmur geluhku bas istanaku.
5 Kenca si e, kudat nipi si erban aku mbiar. Sanga medem aku, kuidah gambaren ras pengenehenen* si erban aku mbiar.+
6 Emaka kulebuh kerina kalak si pentar i Babilon, gelah kataken kalak e erti nipi e man bangku.+
7 “Sanga si e, si beluh ilmu gaib, si beluh ilmu sihir, peramal,+ ras kalak Kaldea* reh ngadap aku. Kuceritaken nipi e man kalak e, tapi la banci jelasken kalak e ertina man bangku.+
8 Dungna, reh Daniel si igelari Beltasar,+ bagi gelar dewaku.+ Lit bas ia kuasa arah dewa si badia.+ Kuceritaken nipiku e man bana janah ningku,
9 “‘O Beltasar, kepala kalak si beluh ilmu gaib,+ kuteh maka lit bas kam kuasa arah dewa si badia,+ la lit rahasia si meserasa akapndu.+ Emaka, jelaskenlah kai erti pengenehenen si kuidah bas nipiku e.
10 “‘Bas pengenehenen si kuidah sanga aku medem, lit kuidah batang kayu+ si luar biasa ganjangna i tengah-tengah doni.+
11 Batang kayu e reh belinna janah reh gegehna. Gedangna seh ku langit, emaka teridah arah ujung-ujung doni nari.
12 Bulungna mejile, mbue buahna, janah sediakenna pangan man kerinana. Binatang liar cilinggem i teruhna, perik-perik rasar i dahanna, janah kerina si nggeluh ndatken pangan arah ia nari.
13 “‘Bas pengenehenen e, kuidah utusen* si badia nusur arah surga.+
14 Nina, “Tabahlah batang kayu e,+ tektek dahan-dahanna, agui bulung-bulungna, janah merapken buahna. Pediatlah binatang si cilinggem i teruhna lawesen bage pe perik si lit i dahanna.
15 Tapi pediatlah tongkehna ras uratna tetap i taneh, i tengah-tengah dukut i juma. Iket tongkehna e alu besi ras tembaga. Pediat ilitapi namur arah langit nari, janah pediat tongkeh e i je radu ras binatang liar ras sinuan-sinuan i doni.+
16 Pediatlah pusuhna berubah, arah pusuh manusia jadi pusuh binatang. Pediatlah bage seh ngasa pitu masa.+
17 Ketetapen enda ipeseh utusen-utusen*+ janah keputusen e iumumken malekat si badia. Alu bage, kerina kalak si nggeluh meteh maka Dibata Si Meganjangna kap Penguasa kerajan manusia.+ Ia si mereken kerajan man ise pe ateNa, termasuk man kalak si rendahna kel.”
18 “‘Bagenda ndai me nipiku. Gundari o Beltasar, kataken man bangku erti nipi e, perban la lit sada pe kalak pentar bas kerajanku si banci mpebetehken ertina.+ Tapi kam pasti banci, perban lit bas kam kuasa dewa-dewa si badia.’
19 “Paksa si e, Daniel si igelari Beltasar,+ mbiar ia janah sinik ia ntisik.
“Nina raja, ‘O Beltasar, ula kam mbiar perban nipi e bage pe perban ertina.’
“Ngaloi Beltasar, ‘O Tuanku, mbera-mbera nipi e ras ertina terjadi man musuh-musuhndu bage pe man kalak si rate segat man bandu.
20 “‘Batang kayu si idahndu e Raja, reh dekahna reh galangna ras reh gegehna, ganjangna seh ku langit, janah teridah arah belang-belang doni,+
21 bulungna mejile, buahna mbue, sediakenna pangan man kerinana, janah binatang liar cilinggem i teruhna, perik-perik rasar i dahanna.+
22 Kam kap batang kayu e, Raja. Kuasandu reh belinna janah reh gegehna kam. Kemulianndu terus reh tambahna seh ku langit+ janah pemerentahenndu seh ku ujung doni.+
23 “‘Jenari idahndu utusen* si badia+ nusur arah surga nari, si ngataken, “Tabahlah batang kayu e janah hancurken, tapi pediatlah tongkehna ras uratna tetap i taneh, i tengah-tengah dukut i juma. Iket tongkehna e alu besi ras tembaga. Pediat ilitapi namur arah langit nari, janah pediat tongkeh e i je radu ras binatang liar seh ngasa pitu masa.”+
24 Enda me ertina, o Raja. Dibata Si Meganjangna enggo netapken maka terjadi pagi si e man bandu.
25 O Raja, ipelawes pagi kam arah tengah-tengah manusia janah tading pagi kam ras binatang liar. Dukut pagi nakanndu bagi lembu, janah ilitapi namur arah langit nari pagi kam.+ Bage pagi keadanndu pitu masa dekahna,+ seh ngasa tehndu maka Dibata Si Meganjangna kap Penguasa kerajan manusia, janah berekenNa kerajan e man ise pe ateNa.+
26 “‘Tapi perban ikataken ndai maka tongkeh ras urat batang kayu e ipediat,+ mulihi ka pagi kam jadi raja kenca tehndu maka Dibata si i surga kap penguasa.
27 Emaka o Raja, begikenndu min nasehatku enda. Ula nai lakokenndu dosa, tapi lakokenlah si benar. Ula nai lakokenndu si jahat, tapi cidahkenlah perkuah ate man kalak si mesera. Mbera-mbera makmur lalap geluhndu Raja, janah dame akapndu.’”+
28 Kerina e terjadi man Raja Nebukadnesar.
29 Sepulu dua bulan kenca si e, erdalan-dalan ia i loteng istana Babilon.
30 Sanga si e nina raja, “Luar biasa kel Babilon si kubangun enda. Kubangun Babilon jadi istanaku alu gegeh ras kuasaku, gelah idah kalak uga muliana aku ras uga hebatna aku!”
31 Lenga pe ia dung ngerana, lit terbegi sora arah surga nari, nina, “O Raja Nebukadnesar, begikenlah kata-kata enda, ‘Kuasandu selaku raja enggo ibuat arah kam nari.+
32 Ipelawes pagi kam arah tengah-tengah manusia janah tading kam ras binatang liar. Dukut pagi panganndu bagi lembu. Bage pagi keadanndu pitu masa dekahna, seh ngasa tehndu maka Dibata Si Meganjangna kap Penguasa kerajan manusia, janah berekenNa kerajan e man ise pe ateNa.’”+
33 Emaka mis terjadi kata-kata e man Nebukadnesar. Ipelawes ia arah tengah-tengah manusia janah tading ia ras binatang liar. Mulai me panna dukut bagi lembu, janah ilitapi namur arah langit dagingna, seh ngasa bukna gedang bagi mbulu kuliki janah silu-siluna bagi silu-silu perik.+
34 “Kenca dung masa e,+ aku, Nebukadnesar, kutatap ku langit janah waras aku mulihi. Kupuji Dibata Si Meganjangna, si nggeluh seh rasa lalap. Perban kuasaNa kap kuasa si tetap lit janah kerajanNa si tetap lit arah jaman ku jaman.+
35 Kerina penduduk doni labo lit ertina adi bandingken ras Ia. LakokenNa kai pe ateNa lakokenNa man pasuken langit ras penduduk doni. La lit si banci ngambati Ia+ ntah pe mpersoalken si lakokenNa.+
36 “Paksa si e waras aku mulihi. Kudat mulihi kemulian bas kerajanku, kehebaten, bage pe kehagan.+ Pejabat-pejabatku ras bangsawan merhat kel jumpa ras aku. Mulih aku ku kerajan janah hamati kalak kel aku lebihen asangken si sebelumna.
37 “Gundari, kupuji, kupeganjang, ras kumuliaken Raja si erkuasa nandangi surga,+ perban kerina perbahanenNa benar ras dalan-dalanNa adil,+ janah ngasup Ia mpermelaken kalak si sombong.”+
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Maksudna, kalak si beluh ilmu ramal ras ahli-ahli bintang.
^ As. “penjaga.”
^ As. “penjaga-penjaga.”
^ As. “penjaga.”
