Daniel 5:1-31
5 Raja Belsasar+ erban pesta si mbelin ras seribu bangsawan bas kerajanna. Minem anggur ia i lebe-lebe kalak e.+
2 Sanga ia mabuk, perentahken Belsasar gelah ibuat cangkir-cangkir emas bage pe pirak si baba bapakna* Nebukadnesar arah rumah pertoton i Jerusalem.+ Merhat ia minem arah cangkir-cangkir e radu ras bangsawan, gundik-gundikna,* bage pe diberu-diberuna si deban.
3 Kenca si e, baba kalak e me cangkir-cangkir emas si ibaba arah rumah pertoton Dibata i Jerusalem. Raja ras bangsawan-bangsawanna, gundik-gundikna, bage pe diberu-diberuna si deban, minem arah cangkir-cangkir e.
4 Minem-minem anggur kalak e janah pujina berhala-berhalana si iban arah emas, pirak, tembaga, besi, kayu, ras batu nari.
5 Bas paksa si e ka, lit jari-jari tan manusia si teridah janah nulis bas dingding deher ingan lampu bas istana raja. Idah raja tan si sangana nulis e.
6 Mis pucat ayo raja janah mbiar ia. Lemas nahena+ janah nggirgir tiwenna.
7 Serko raja janah lebuhna peramal-peramal, kalak Kaldea,* ras ahli-ahli bintang.+ Nina raja man kerina kalak pentar si lit bas Babilon, “Ise pe si banci mbaca tulisen e ras ngertikenca, kubere pagi baju ungu man bana ras ipakeken kalung emas i kerahungna.+ Kubereken ka pagi man bana kuasa si peteluken bas kerajan enda.”+
8 Kenca si e reh kerina kalak si pentar ngadap raja, tapi la lit si banci mbaca tulisen e ras ngertikenca.+
9 Emaka mbiar kel Raja Belsasar janah pucat ayona. Bangsawan-bangsawan pe bingung.+
10 Megi kata-kata raja ras bangsawan-bangsawan e, reh ratu ku ingan pesta e janah nina, “O Raja, nggeluhlah kam rasa lalap. Engkai maka pucat ayondu? Ula kam mbiar.
11 O Raja, bas kerajanndu lit sekalak dilaki si lit kuasa arah dewa-dewa si badia bas ia. Bas jaman bapakndu, lit bas ia pemeteh, pengangkan, ras kepentaren si bali bagi dewa-dewa.+ Bapakndu Raja Nebukadnesar ngelantik ia jadi kepala man si beluh ilmu gaib, peramal-peramal, kalak Kaldea,* ras ahli-ahli bintang.+
12 Dilaki e eme Daniel, tapi igelari raja ia Beltasar.+ Ia kalak si seh kel pentarna, lit ka pemetehna ras pengangkanna, emaka banci ertikenna nipi, jelaskenna teka-teki, janah banci dungina persoalen si seh kel serana.+ Gundari lebuhlah Daniel gelah ertikenna tulisen e.”
13 Emaka ibaba me Daniel ngadap raja. Sungkun raja ia nina, “Kam kin Daniel si itaban bapakku arah Juda nari?+
14 Kubegi lit bas kam kuasa arah dewa-dewa nari+ janah lit bas kam pemeteh, kepentaren, ras pengangkan si luar biasa.+
15 Kalak si pentar ras peramal-peramal enggo ibaba ngadap aku guna mbaca ras ngertiken tulisen e. Tapi kalak e la banci ngertiken tulisen e.+
16 Kubegi, banci dungindu erbage persoalen si seh kel serana. Adi banci kin bacandu tulisen e janah ertikenndu,+ kubere pagi baju ungu man bandu ras ipakeken kalung emas i kerahungndu. Kubereken ka pagi man bandu kuasa si peteluken bas kerajan enda.”+
17 Emaka nina Daniel, “O Raja, simpan saja hadiahndu ena ntah bereken man kalak si deban. Tapi, kubacaken nge kari tulisen e janah kukataken ertina man bandu.
18 Dibata Si Meganjangna enggo mereken kerajan, kehebaten, kehamaten, ras kemulian man Nebukadnesar bapakndu.+
19 Perban kehebaten si bereken Dibata e, kerina kalak arah erbage bangsa ras bahasa mbiar janah nggirgir man bana.+ Ise atena bunuhna, bunuhna. Ise atena pediatna nggeluh, pediatna nggeluh. Ise atena peganjangna, peganjangna. Ise atena rendahkenna, rendahkenna.+
20 Tapi perban meganjang ukurna janah mekeng ia, emaka melebesa perbahanenna.+ Dungna ipenusur ia arah tahtana janah bene kemulianna.
21 Ipelawes ia arah tengah-tengah manusia, perukurenna jadi seri ras binatang janah tading ia ras kelede liar. Dukut si jadi panganna bali bagi lembu janah dagingna litap iban namur arah langit, seh ngasa tehna maka Dibata Si Meganjangna kap Penguasa kerajan manusia janah Ia kap si mereken kerajan e man ise pe ateNa.+
22 “Amin pe kam anakna, o Belsasar, janah tehndu kerna si e kerina, la peterukndu ukurndu.
23 Peganjangndu bandu i lebe-lebe Dibata si erkuasa nandangi surga.+ Babandu ka cangkir-cangkir arah rumah Dibata ku lebe-lebendu.+ Dung e minem anggur kam arah cangkir e nari radu ras bangsawan-bangsawanndu, gundik-gundikndu, ras diberu-diberundu si deban, pujindu dibata si iban arah pirak, emas, tembaga, besi, kayu, ras batu, si la erpemegi, si la erpengidah, ras si la tehna kai pe.+ La muliakenndu Dibata si erkuasa nandangi kesahndu+ ras kerina dalan-dalanndu.
24 E me sebapna kirim Dibata tan e janah banNa tulisen e.+
25 Enda me isi tulisen e: MENE, MENE, TEKEL, ras UPARSIN.
26 “Enda me erti kata e: MENE, enggo kira Dibata masa pemerentahen Raja janah dungina pagi kerajanna.+
27 “TEKEL, Raja enggo itimbang alu timbangen janah kepeken menahangsa.
28 “PERES, kerajan Raja enggo ibagi-bagi janah ibereken man kalak Media Persia.”+
29 Kenca si e, perentahken Belsasar gelah ibereken baju ungu man Daniel ras ipakeken kalung emas i kerahungna. Jenari iumumken maka enggo ibereken man Daniel kuasa si peteluken bas kerajan e.+
30 Bas berngi e, ibunuh me Belsasar raja kalak Kaldea.+
31 Kerajanna iserahken man Darius+ kalak Media, umur Darius kira-kira 62 tahun.
Cataten i teruh
^ Ntah “bulangna.”
^ Maksudna, kalak si beluh ilmu ramal ras ahli-ahli bintang.
^ Maksudna, kalak si beluh ilmu ramal ras ahli-ahli bintang.
