Daniel 6:1-28
6 Tetapken Darius gelah 120 kepala gubernur ilantik guna ngawasi kerina kerajan.+
2 Lantik raja ka telu pejabat tinggi guna ngawasi kalak e. Kepala-kepala gubernur+ arus ngelapor man pejabat tinggi e gelah raja la rugi. Salah sada pejabat tinggi si ipilih eme Daniel.+
3 Daniel ndauh ulin asangken pejabat tinggi si deban bage pe kepala-kepala gubernur e perban kengasupenna si luar biasa.+ Emaka bere raja tena ia kuasa bas kerina kerajan.
4 Paksa si e, pejabat-pejabat tinggi ras kepala-kepala gubernur terus ndarami alasen guna nuduh Daniel bas urusen kerajan. Tapi la lit dat kalak e alasen ntah pe kesalahen kai pe. Daniel jujur, terteki, janah la pernah salah bas ndalanken tugasna.
5 Emaka nina kalak e, “Labo ndigan pe sidat alasen guna nuduh Daniel, selain si lit hubungenna ras undang-undang Dibatana.”+
6 Emaka pejabat-pejabat tinggi bage pe kepala-kepala gubernur e reh ras-ras ngadap raja janah nina, “O Raja Darius, nggeluhlah kam rasa lalap.
7 Kerina pejabat tinggi kerajan, pejabat daerah, kepala-kepala gubernur, penasehat kerajan, gubernur-gubernur, ersada arih kalak e guna erban peraturen ras netapken larangen enda: Sedekah 30 wari, ise pe si ertoto man dewa ntah pe man manusia selain man kam o Raja, arus ibenterken ku lubang singa.+
8 Emaka o Raja, mindo kami man bandu gelah ibanndu peraturen e janah tanda tanganindu,+ gelah lanai banci iubah. Sebap undang-undang kalak Media ras Persia la banci iubah.”+
9 Emaka tanda tangani Raja Darius peraturen ras larangen e.
10 Tapi kenca teh Daniel maka peraturen e enggo itanda tangani, mis ia mulih ku rumahna. Bas loteng rumahna, lit ruangen si talang jendela-jendelana janah ngadap ku Jerusalem.+ Sujud ia, ertoto, janah pujina Dibata telu kali sada wari bagi si biasa lakokenna sope lit larangen e.
11 Sanga si e, rempet kalak e masuk janah idahna Daniel sangana mindo penampat ras perkuah ate man Dibatana.
12 Emaka ngadap kalak e man raja janah singetken kalak e kerna larangen e, nina, “O Raja, enggo tanda tanganindu peraturen e maka bas 30 wari enda, adi lit kalak si ertoto man dewa ntah man manusia si apai pe selain man bandu, arus ia ibenterken ku lubang singa. La kin bage, Raja?” Nina raja ngaloisa, “Payo, janah menurut undang-undang kalak Media ras Persia, peraturen e la banci ibatalken.”+
13 Mis nina kalak e man raja, “Daniel eme tabanen arah Juda e,+ la mehamat man bandu janah la diatena larangen si enggo tanda tanganindu. Ertoto ia telu kali sada wari.”+
14 Megi si e, sedih kel raja janah gulut ukurna. Daramina cara guna nelamatken Daniel, janah seh ngayak matawari terbenam lalap usahakenna nelamatken ia.
15 Dungna, penguasa-penguasa ras pejabat-pejabat e ngadap man raja janah ning kalak e, “O Raja, ingetndulah maka menurut undang-undang kalak Media ras Persia, larangen ntah peraturen kai pe si enggo tetapken raja la banci iubah.”+
16 Emaka perentahken raja gelah Daniel itangkap ras ibenterken ku lubang singa.+ Nina raja man Daniel, “Dibata si lalap layanindu kari si nampati kam.”
17 Kenca si e, ibaba sada batu janah itamaken bas babah lubang e. Kenca si e, icap raja batu e alu cincinna ras cincin bangsawanna. Alu bage, keputusen kerna Daniel e la banci iubah.
18 Dung e, mulih raja ku istanana. Bas berngi e, erpuasa ia, la ia nggit iapuli* janah la ia banci medem.
19 Dungna bas pagi-pagi si lampas, mis raja lawes ku lubang singa.
20 Seh kenca ia i deher lubang e, lebuhna Daniel janahna sedih, nina, “O Daniel, pelayan Dibata si nggeluh, ngasup nge Dibata si terus ilayanindu nelamatken kam arah singa-singa e?”
21 Mis nina Daniel ngaloi, “O Raja, nggeluhlah kam seh rasa lalap.
22 Dibataku ngutus malekatNa guna nutup babah singa-singa e.+ Labo aku kaden pe iban singa-singa e,+ perban teh Dibata maka aku labo ersalah. Man bandu pe labo aku ersalah, o Raja.”
23 Meriah kel akap raja janah perentahkenna gelah Daniel ipedarat arah lubang e. Ipedarat me Daniel, janah la ia kaden pe perban tek ia man Dibatana.+
24 Jenari perentahken raja gelah kalak si nuduh* Daniel itangkap ras ibenterken ku lubang singa, radu ras anakna bage pe diberuna. Lenga pe kalak e seh ku dasar lubang e, terkam singa-singa e kalak e janah ripukkenna tulan-tulanna.+
25 Kenca si e, kirim Raja Darius surat man kerina kalak arah kerina bangsa ras bahasa i belang-belang doni,+ “Mbera-mbera dame kena!
26 Kuperentahken kerina kalak si lit bas wilayah kerajanku gelah mbiar man Dibata Daniel.+ Ia kap Dibata si nggeluh janah tetap lit rasa lalap. KerajanNa la banci ihancurken janah kekuasanNa lit rasa lalap.+
27 SampatiNa umatNa+ janah selamatkenNa. BanNa mukjizat ras kai si luar biasa i langit ras doni.+ Daniel enggo selamatkenNa arah cakar singa.”
28 Emaka Daniel lalap berhasil sedekah pemerentahen Darius+ bage pe pemerentahen Kores kalak Persia.+
