Daniel 7:1-28
7 Bas tahun si pertama Raja Belsasar+ merentah i Babilon, ernipi Daniel janah datna pengenehenen* sanga ia terpedem.+ Jenari, itulisna nipi e+ janah lengkap icatatna.
2 Nina Daniel,
“Bas pengenehenen si kudat sanga berngi, kuidah laut ergelombang perban angin si rembus arah empat arah.+
3 Jenari empat binatang buas raksasa+ ndarat arah laut nari, beda-beda kerina.
4 “Si pertama bagi singa,+ janah kabengna bagi kuliki.+ Kenca si e, kuidah kabengna tercabut, janah terangkat ia arah taneh nari emaka tedis ia alu dua nahena bagi manusia. Ibereken ka man bana perukuren manusia.
5 “Jenari lit binatang si peduaken, si bagi beruang.+ Angkatna sada nahena janah karatna telu tulan rusuk. Ikataken man bana, ‘Medakkenlah, panlah melala daging.’+
6 “Jenari, lalap kuperdiateken janah kuidah ka binatang si deban. Ia bagi macan tutul,+ tapi lit empat kabengna bagi kabeng perik. Lit ka empat takal binatang e,+ janah ibereken kuasa guna merentah man bana.
7 “Kenca si e, bas pengenehenen sanga berngi e, kuidah binatang si peempatken. Binatang e erban mbiar, seram, ras luar biasa gegehna. Ipenna galang-galang janah arah besi nari. Panna ras ripukkenna kai pe si lit, janah sisana perjakina.+ Ia beda ras kerina binatang si sebelumna. Tandukna lit sepuluh.
8 Sanga kuperdiateken tanduk-tanduk e, lit tanduk kitik+ si turah. Kenca turah tanduk e, telu tanduk si deban si lit i je tercabut. Tanduk si kitik e lit matana bagi mata manusia, ras lit babahna si ngerana alu sombong.+
9 “Lalap kuperdiateken, janah lit kuidah tahta-tahta si itamaken ku inganna. Jenari kuidah Ia Si Enggo Lit Nai Nari+ sangana kundul.+ UisNa mbentar bagi salju,+ ras bukNa bagi wol si bersih. TahtaNa arah api nari, ras roda-rodana arah api si gara.+
10 Maler ka api arah lebe-lebeNa.+ Lit seribu kali seribu si ngelayani Ia janah lit sepuluh ribu kali sepuluh ribu si tedis i lebe-lebeNa.+ Imulai me Pengadilen+ janah buku-buku pe ibuka.
11 “Lalap kutatap, perban lalap kataken tanduk e kata-kata si sombong.+ Jenari kuidah binatang e ibunuh janah mayatna ihancurken ras iambekken ku api.
12 Tapi kerna binatang-binatang si debanna,+ kekuasanna ibuat janah ipediat nggeluh seh ngasa waktu si itentuken.
13 “Bas pengenehenen berngi e, kuidah sekalak si bagi anak manusia reh bas embun-embun i langit.+ Ipediat ia njumpai Si Enggo Lit Nai Nari+ janah ibaba ia ku lebe-lebeNa.
14 Ibereken kuasa+ man bana bage pe kehamaten+ ras kerajan, gelah kerina kalak arah erbage bangsa ras bahasa ngelayani ia.+ Kekuasanna eme kap kekuasan si rasa lalap si la pernah masap, janah kerajanna la pernah kernep.+
15 “Gelisah aku perban pengenehenen e. Pengenehenen si kuidah e erban aku mbiar.+
16 Kudeheri salah sada si lit i je guna nungkun kerna ertina man bana. Emaka ijawapna janah katakenna ertina.
17 “‘Empat binatang buas raksasa e+ eme empat raja si erkuasa pagi i doni.+
18 Tapi kalak si badia jang Dibata Si Meganjangna+ ngaloken kerajan e pagi.+ Kerajan e lalap pagi jadi jang kalak e+ seh rasa lalap.’
19 “Merhat aku meteh terbuen kerna binatang si peempatken e. Binatang e beda ras binatang si deban. Binatang e seram kel rupana. Ipenna arah besi, silu-siluna arah tembaga. Bendutna kai pe si lit, ripukkenna, jenari perjakina kerina si tading.+
20 Merhat ka aku meteh kerna sepuluh tanduk+ bas takalna bage pe kerna tanduk si sada nari e, si teridah galangen asangken tanduk si debanna. Sanga ndarat tanduk e, lit telu tanduk si naktak.+ Tanduk si ndarat e lit matana janah lit babahna si sombong pengeranana.
21 “Kuidah tanduk e erperang ngelawan kalak si badia janah menang tanduk e ngelawan kalak e.+
22 Kenca si e, Ia Si Enggo Lit Nai Nari+ e reh janah banNa keputusen si erban menang kalak si badia jang Dibata Si Meganjangna.+ Waktuna enggo seh man kalak si badia guna ngaloken kerajan e.+
23 “Enda me penjelasen si katakenna man bangku, ‘Binatang si peempatken e eme kerajan si peempatken si lit pagi i doni. Kerajan e beda ras kerajan si debanna. Bendutna pagi kerina, perjakina, janah ripukkenna belang-belang doni enda.+
24 Sepuluh tanduk e eme sepuluh raja si reh arah kerajan ndai. Kenca kalak e, lit pagi sada nari si reh. Raja e beda ras raja-raja si deban si lit ope lenga ia janah talukenna pagi telu raja.+
25 Katakenna pagi kata-kata si ngelawan Dibata Si Meganjangna+ janah lalap gangguna kalak si badia jang Dibata Si Meganjangna. Ubahna atena waktu ras undang-undang, janah kalak si badia iserahken pagi man bana sada masa, dua masa, ras setengah masa dekahna.*+
26 Tapi imulai me Pengadilen janah ibuat kekuasanna gelah ikernepken janah imasapken seh asa keri.+
27 “‘Kenca si e, ibereken me kerajan, kekuasan, ras kemulian si lit i belang-belang doni man kalak si badia jang Dibata Si Meganjangna.+ Kerajan kalak e eme kerajan si tahan rasa lalap+ janah kerina pemerentah patuh pagi man kalak e janah layanina kalak e.’
28 “Bage ndai me kedungenna. Mbiar kel aku emaka pucat ayoku. Tapi kusimpan si e kerina bas pusuhku.”
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Maksudna, telu setengah masa.
