Daniel 9:1-27
9 Darius+ anak Ahasweros keturunen kalak Media, ilantik jadi raja kerajan kalak Kaldea.+
2 Bas tahun si pertama pemerentahenna, aku Daniel ngangkai arah buku-buku* maka menurut kata-kata Jahwe man Nabi Jeremia, ipediat pagi Jerusalem+ hancur 70 tahun dekahna.+
3 Emaka kupindo penampat Jahwe Dibata si benar, ertoto aku man baNa. Erpuasa ka aku+ ras kupake kain guni, kuamburken abu ku dagingku.
4 Ertoto aku man Jahwe Dibataku, kuakui dosa bangsaku, ningku,
“O Jahwe Dibata si benar, Dibata si mulia ras luar biasa, si nepati perjanjinNa ras ncidahken kekelengen si setia+ man kalak si engkelengi Ia ras si patuh man perentah-perentahNa.+
5 Kami enggo erdosa, ersalah kami, lakoken kami si jahat, mberontak kami.+ La ikutken kami perentah-perentahNdu ras undang-undangNdu.
6 La begiken kami nabi-nabiNdu eme pelayan-pelayanNdu+ si ngerana bas gelarNdu man raja-raja, peminpin-peminpin, ras nini bulang kami, bage pe man kerina rakyat negri enda.
7 O Jahwe, Kam adil ras benar. Tapi kami, mela ngenca dat kami, bagi bas wari enda. Kerina kalak Juda, penduduk Jerusalem, ras kerina kalak Israel enggo merapkenNdu ku erbage negri si ndeher ras si ndauh, sebap kalak e la setia man baNdu.+
8 “O Jahwe, kami, raja-raja kami, peminpin-peminpin kami, ras nini bulang kami enggo erdosa man baNdu, emaka mela akap kami.
9 O Jahwe Dibata kami, Kam perkuah ate janah nggit ngampuni,+ tapi mberontak kami man baNdu.+
10 La patuhi kami kata-kata Jahwe Dibata kami alu la ngikutken undang-undang si enggo bereNdu man kami arah nabi-nabiNdu.+
11 Kerina kalak Israel ngelanggar Undang-UndangNdu. La kami patuh janah la ikutken kami kata-kataNdu. Kami enggo erdosa man baNdu. BanNdu kami kena sumpah bagi si tertulis bas Undang-Undang Musa pelayan Dibata si benar.+
12 LakokenNdu kai si pernah katakenNdu man kami+ ras penguasa si merentah kami,* alu erban bencana si mbelin terjadi man kami. Kai si terjadi man Jerusalem lenga pernah terjadi i japa pe i teruh langit.+
13 Kerina bencana e terjadi man kami pas bagi si tertulis bas Undang-Undang Musa.+ Tapi lenga pindo kami perkuah ate Jahwe Dibata kami. La kami robah arah kesalahen kami+ janah la angka kami maka lalap kap tepatiNdu si katakenNdu.
14 “Lalap perdiateken Jahwe janah banNa terjadi bencana man kami. Kerina si lakoken Jahwe Dibata kami lalap benar. Tapi la patuhi kami kata-kataNa.+
15 “O Jahwe Dibata kami, Kam si maba umatNdu ndarat arah Mesir nari alu tanNdu si megegeh+ janah banNdu gelarNdu terkenal seh ngasa wari enda.+ Kami enggo erdosa janah lakoken kami si jahat.
16 O Jahwe, perban Kam lalap ngelakoken si benar,+ mindo kami gelah ula nai min Kam merawa ras nembeh man kotaNdu Jerusalem, gunungNdu si badia. Dosa kami ras kesalahen nini bulang kami enggo erban Jerusalem ras umatNdu ihina kalak si lit i sekeliling kami.+
17 O Jahwe, gundari begiken min toto ras pemindon pelayanNdu enda. Cidahken min maka jadi ateNdu man inganNdu si badia+ si enggo hancur.+ Si enda guna kepentingen gelarNdu kap.
18 O Dibataku, perdiateken min ras begikenNdu min. Tataplah, nen min kesusahen kami bage pe kota si maba gelarNdu si enggo hancur e. Mindo kami man baNdu labo perban benar perbahanen kami, tapi perban perkuah ateNdu si mbelin.+
19 O Jahwe, begiken min. O Jahwe, ampuni min.+ O Jahwe, perdiateken min, ertindak min Kam. O Dibataku, guna kepentingenNdu, ula min pedekah-dekahNdu, sebap kotaNdu ras umatNdu enda kap si maba gelarNdu.”+
20 Sanga ngerana denga aku ras ertoto ngakui dosaku bage pe dosa bangsaku kalak Israel, ras mindo perkuah ate man Jahwe Dibataku guna gunungNa si badia,+
21 sanga ertoto denga aku, Gabriel,+ si pernah kuidah bas pengenehenen* sebelumna e,+ reh ndahi aku. Reh ia sanga persembahen nandangi ibereken bas berngi, sanga latih kel kuakap.
22 Jelaskenna man bangku, nina,
“O Daniel, aku reh guna nampati kam gelah tehndu ras angkandu.
23 Kenca mulai kam ertoto, kudat berita arah Dibata janah gundari reh aku ngatakenca man bandu, sebap kam kalak situhu-tuhu ikelengi.*+ Emaka ukurilah enda janah angkailah pengenehenen enda.
24 “Lit 70 minggu* si enggo itentuken man bangsandu ras kotandu si badia,+ guna engkernepken pelanggaren, nasapken dosa,+ ngampuni kesalahen,+ negakken kebenaren si tahan rasa lalap,+ guna erban pengenehenen ras nubuat imeteraiken,+ bage pe guna mpebadia Ingan Sibadiana.
25 Arus tehndu ras angkandu maka mulai kenca ipedarat perentah guna erban Jerusalem+ bagi si mbarenda janah mbangunca mulihi seh ngasa reh Mesias*+ eme Peminpin e,+ lit pagi 7 minggu bage pe 62 minggu.+ Iban pagi kota e bagi si mbarenda janah ibangun mulihi, lengkap ras lapangen ras parikna. Tapi si e ilakoken pagi bas masa si sulit.
26 “Kenca 62 minggu e, ibunuh pagi Mesias,+ la lit kadena pe.+
“Reh pagi rakyat arah sekalak peminpin guna engkernepken kota ras ingan si badia e.+ Bas pendungina, banjir pagi si engkernepkenca. Lit perang seh ngasa dung kedungen e. Kai si itetapken eme kap kehancuren.+
27 “Pastikenna pagi perjanjin e berlaku man enterem kalak, sada minggu dekahna. Bas pertengahen minggu e, pengadina pagi korban ras persembahen.+
“Reh pagi si maba kehancuren e i datas kabeng si erban ciga ate,+ janah kai si enggo itentuken Dibata, iamburken pagi ku datas kai si enggo hancur.”
Cataten i teruh
^ Maksudna, buku-buku si badia.
^ As. “ras hakim si ngakimi kami.”
^ Eme kerna kai pe si cidahken Dibata ku bas pikiren sekalak jelma.
^ Ntah “kalak si ihamati kel.”
^ I jenda 1 minggu = 7 tahun.
^ Ntah “Kalak Si Ipilih.”
