Epesus 1:1-23
1 Surat enda arah Paulus nari, sekalak rasul Kristus Jesus sesuai ras peraten Dibata. Surat enda man kalak si badia si lit i Epesus+ bage pe man kalak si setia si ersada ras Kristus Jesus:
2 Mbera-mbera aloken kena kiniulin Dibata si luar biasa ras kedamen arah Ia nari eme Bapakta ras arah Tuan Jesus Kristus nari.
3 Perban kita enggo ersada ras Kristus, terpujilah Dibata eme Bapak Tuanta Jesus Kristus si enggo mereken pasu-pasu rohani i surga.+
4 Sope doni enda ijadiken,* enggo pilih Dibata kita gelah ersada ras Kristus, emaka arus sibuktiken kekelengenta, kita arus badia janah la lit cacatta+ i lebe-lebeNa.
5 Tangtangna nari pe enggo tetapken Dibata+ gelah kita iangkat jadi anak-anakNa+ arah Jesus Kristus, sesuai ras sura-suraNa ras si ngena ateNa.+
6 Alu bage ipuji Ia perban kiniulinNa si luar biasa+ ras mulia, buktikenNa si e man banta arah AnakNa si kelengiNa.+
7 Perban seh kel belinna kiniulinNa si luar biasa e, tebusNa kita alu dareh AnakNa.+ Ibebasken kita janah dosata pe iampuni.+
8 BuktikenNa kiniulinNa si luar biasa alu mereken kerina kepentaren ras pengangkan man banta,
9 janah katakenNa rahasia si badia+ kerna peratenNa. Rahasia si badia e sesuai ras kai si ngena ateNa bage pe tujunNa
10 guna ngelakoken sada pengaturen. Pengaturen e ilakoken adi enggo dung waktu si tetapkenNa e. Alu bage kerina si lit i surga bage pe si lit i doni ipepulung kerinana bas Kristus.+ Payo, bas ia kerinana ipepulung.
11 Ersada kami ras Kristus janah kami itetapken jadi ahli waris ras ia.+ Tangtangna nari, kami enggo ipilih sesuai ras peraten Dibata si ngelakoken kerinana si sesuai ras sura-suraNa.
12 Alu bage Dibata ipuji ras imuliaken arah kami, eme kalak si pertama erpengarapen man Kristus.
13 Kena pe erpengarapen man Kristus, perban enggo begi kena kata kebenaren eme berita si meriah si mere keselamaten man kena. Kenca kena tek, ibereken pagi tanda man kena arah Kristus alu meterai+ eme kesah si badia si enggo ijanjiken.
14 Kesah si badia e jadi jaminen maka sialoken pagi warisen+ si enggo ijanjiken Dibata. Lakoken Dibata si e gelah umatNa ibebasken+ alu tebusen,+ alu bage Ia ipuji ras imuliaken.
15 E me sebapna kenca kubegi kerna kiniteken kena man Tuan Jesus bage pe kekelengen kena man kerina kalak si badia,
16 la erngadi-ngadi aku ngata bujur man Dibata kerna kena. Lalap kena kutotoken,
17 gelah Bapak si mulia eme Dibata Tuanta Jesus Kristus, mereken kesah si badia man kena gelah banci kena pentar janah angkai kena kai si katakenNa, alu bage benar pemeteh kena kerna Ia.+
18 Enggo buka Dibata pusuh kena gelah banci idah kena janah teh kena arapen si berekenNa man kena. Seh kel muliana kebayaken si berekenNa man kalak si badia, e me si jadi warisen man kalak e,+
19 seh kel belinna kuasaNa man kita si erkiniteken.+ Kuasa si mbelin e teridah arah pendahinNa,
20 eme sanga pekekeNa Kristus bas si mate nari janah pekundulNa ia i sebelah kananNa+ i surga.
21 Kedudukenna e ndauh ganjangen asangken kerina pemerentah, penguasa, peminpin, bage pe kerina gelar,+ labo saja bas jaman* si gundari tapi bas jaman si nandangi reh pe.
22 Ban Dibata ka kerina jadi patuh i teruh nahe Kristus+ janah jadikenNa ia kepala man runggun bas kai pe.+
23 Runggun e daging Kristus kap,+ runggun e dem alu sipat-sipat Kristus. Banna kerina lengkap bas kerinana.
