Epesus 3:1-21
3 Aku Paulus, ipenjaraken+ perban Kristus Jesus guna kena si rehna bas bangsa si deban nari.
2 Pasti begi kena maka enggo ibereken tanggung jawap man bangku jadi pengurus rumah,+ gelah banci kusampati kena ndatken manpaat arah kiniulin Dibata si luar biasa.
3 Ikataken man bangku kerna rahasia si badia si ndai kutulisken alu gendek.
4 Emaka sanga baca kena e, banci teh kena maka enggo kuangkai rahasia si badia+ kerna Kristus.
5 Bas jaman si nai, rahasia si badia e lenga kerinana kel ikataken man manusia. Tapi gundari, si e enggo ipebetehken kerinana alu kesah si badia man rasul-rasul bage pe man nabi-nabiNa si badia.+
6 Enda rahasia e: Perban berita si meriah, kalak bas bangsa si deban nari si ersada ras Kristus Jesus, ikut pagi jadi ahli waris radu ras ia, bage pe jadi anggota bas daging si seri,+ janah ikut bas ngaloken kai si enggo janjiken Dibata man kami.
7 Perban kiniulin Dibata si luar biasa, aku jadi pelayan guna rahasia e. Alu kuasaNa, berekenNa pemere enda bangku.+
8 Asangken kalak si kitikna bas kalak si badia, kitiken denga ka aku.+ Tapi bereken Dibata man bangku kiniulinNa si luar biasa,+ alu bage banci kupeseh berita si meriah man bangsa-bangsa si deban kerna pasu-pasu arah Kristus nari si la terkira,
9 janah banci kusampati kerina kalak gelah angkai kalak e kerna pengaturen rahasia si badia,+ si nai nari buniken Dibata si nciptaken kerinana.
10 Emaka, arah runggun,+ gundari pemerentah-pemerentah ras penguasa-penguasa i surga banci tehna kerna kepentaren Dibata si erbage-bage.+
11 Si enda sesuai ras peratenNa si tahan rasa lalap, si enggo tetapkenNa gelah terjadi arah Kristus+ Jesus Tuanta.
12 Perban erkiniteken man Kristus, banci kita bebas ngerana,+ la kita ragu ndeheri Dibata.
13 Emaka kupindoken man kena gelah ula kitik ukur kena ngidah kiniseran si kunanami guna kena, sebap kiniseranku e maba kemulian man kena.+
14 E me sebapna sujud aku i lebe-lebe Bapak,
15 perban Ia kerina keluarga i doni bage pe i surga jadi lit.
16 Kutotoken man Dibata si dem alu kemulian gelah pegegehiNa pusuh ras perukuren kena+ alu gegeh kesahNa si badia,
17 bage pe gelah tading Kristus bas pusuh kena alu kekelengen perban kena erkiniteken.+ Mbera-mbera rurat kena+ janah ibangun i datas pondasi,+
18 gelah bagi kalak si badia, kena pe tuhu-tuhu angkai kena uga belangna, gedangna, ganjangna, ras bagesna kebenaren e,
19 janah teh kena kekelengen Kristus si ulin+ asangken pemeteh. Alu bage, kena banci dem alu kerina sipat-sipat Dibata si berekenNa man kena.
20 Alu kuasa Dibata si erdahin bas kita,+ banci lakokenNa ndauh buen asangken kerina si enggo sipindo ntah pe siukuri.+
21 Man baNa ibereken kemulian arah runggun bage pe arah Kristus Jesus, seh rasa lalap. Amin.
