Epesus 5:1-33
5 Emaka, usihlah Dibata+ selaku anak-anak si ikelengi.
2 Teruslah buktiken kekelengen bas geluh kena+ bagi Kristus enggo engkelengi kita*+ janah berekenna dirina guna kita* jadi persembahen ras korban si merim man Dibata.+
3 Ula sempat belasken kena kerna perbahanen seks si salah,* ras kerina si najis ntah pe si merangap,+ perban enda la patut man kalak si badia,+
4 bage ka pe perbahanen si pemela-melaken, ranan si la erguna ntah pe cakap kotor,*+ sebap kerina enda la patut. Tapi ngata bujurlah man Dibata.+
5 Teh kena janah sadar kena maka kalak si ngelakoken perbahanen seks si salah*+ ntah kalak si najis ntah pe kalak si merangap,+ seri ras si nembah berhala. Emaka la pagi datna warisen bas Kerajan Dibata si iperentah Kristus.+
6 Ula pediat ise pe nipu kena alu ranan si la erguna, perban e banci erban Dibata merawa man kalak si la patuh.
7 Ula erteman ras kalak si bage.
8 Mbarenda kena bas gelap, gundari kena bas terang+ perban enggo ersada kena ras Tuan.+ Teruslah nggeluh selaku anak-anak terang,
9 sebap hasil* bas terang e nari eme kerina si mehuli, si adil, ras si benar.+
10 Teruslah pastiken kai si ngena ate+ Tuhan.*
11 Ula nai lakoken perbahanen si la erguna si lit hubungenna ras kegelapen.+ Tapi banlah kerina si e teridah.
12 Kai si lakoken kalak e alu erbuni-buni, tuhu-tuhu man kemelanken guna icakapken.
13 Kerinana icidahken terang, alu bage kerina si cidahken terang e jadi terang.
14 Lit tertulis, “Medakkenlah, o kena si sangana medem. Kekekenlah bas si mate nari,+ janah terangi Kristus kena.”+
15 Perdiatekenlah cara kena nggeluh, gelah kena nggeluh selaku kalak pentar, labo selaku kalak si la pentar.
16 Gunakenlah waktu kena alu mehuli,+ sebap wari-wari enda jahat.
17 Emaka ula nai kena la masuk akal. Tapi teruslah perdiateken kai peraten Jahwe.*+
18 Ula kena mabuk ban anggur,+ sebap banci ceda geluh kena. Tapi teruslah kena dem alu kesah si badia.
19 Ercakap-cakaplah kena sada ras si debanna* alu masmur, alu puji-pujin man Dibata, bage pe alu lagu-lagu rohani. Rendelah+ man Jahwe* alu musik+ bas pusuh kena nari.+
20 Bas kai pe, teruslah ngata bujur+ man Dibata eme Bapakta bas gelar Tuanta Jesus Kristus.+
21 Patuhilah sada ras si debanna+ perban mehamat kel kena man Kristus.
22 O kena ndehara, patuhlah man perbulangen kena+ bagi kena patuh man Tuan,
23 perban perbulangen eme kepala ndeharana,+ bagi Kristus pe kepala runggun+ si nelamatken daging e.
24 Situhuna, bagi runggun patuh man Kristus, ndehara pe arus patuh man perbulangenna bas kai pe.
25 O kena perbulangen, teruslah kelengi ndehara kena,+ bagi Kristus pe engkelengi runggun janah korbankenna dirina man kalak e,+
26 gelah banci pebadiana kalak e, bersihkenna alu lau, eme kata Dibata.+
27 Alu bage banci mejile banna runggun e i lebe-lebena, la ringut ntah pe la lit si ceda,+ tapi badia janah la lit cacatna.+
28 Perbulangen pe arus bage. Arus kelengina ndeharana bagi ia engkelengi dagingna. Kalak si engkelengi ndeharana engkelengi dirina kap.
29 Labo pernah lit kalak segat atena dagingna tapi berena man janah kelengina bagi Kristus engkelengi runggun,
30 sebap kita kap anggota dagingna.+
31 “E me sebapna sekalak dilaki nadingken bapakna ras mamakna, jenari tetap ia ersada ras diberuna, janah duana jadi sada.”*+
32 Seh kel pentingna rahasia si badia enda.+ Gundari aku ngerana kerna Kristus ras runggun.+
33 Amin pe bage, tiap perbulangen arus engkelengi ndeharana+ bagi engkelengi dirina, janah tiap ndehara arus tuhu-tuhu mehamat man perbulangenna.+
Cataten i teruh
^ Ntah banci saja “kena.”
^ Ntah banci saja “kena.”
^ Ntah “ntah kai pe si lit hubungenna ras porno.”
^ As. “buah.”
^ Ntah banci saja “kena man diri sendiri.”
^ As. “sada daging.”
