Esekiel 10:1-22
10 Sanga kuperdiateken, kuidah i datas lante i datas takal kerubim-kerubim e lit si bagi batu sapir, bentukna bagi tahta.+
2 Kenca si e, nina Dibata man dilaki si make baju linen e,+ “Masuklah ku antara roda-roda si erputar+ si lit i teruh kerubim-kerubim e. Demi tanndu alu rara api si gara+ si lit i antara kerubim-kerubim e, jenari amburken ku datas kota e.”+ Emaka kuidah ia masuk ku bas.
3 Sanga masuk dilaki e, kerubim-kerubim e sangana tedis i sebelah kanan rumah pertoton, janah dem embun i halamen si arah bas.
4 Kenca si e, nangkih kemulian Jahwe+ arah kerubim-kerubim e ku pintu rumah pertoton, jenari manjar-anjar dem embun+ bas rumah e janah cahaya kemulian Jahwe dem bas halamen.
5 Sora kabeng kerubim-kerubim e terbegi arah halamen si arah darat, bagi sora Dibata Si Madakuasa sanga Ia ngerana.+
6 Kenca si e, perentahkenNa dilaki si make uis linen e, nina, “Buatlah api si lit i antara roda si erputar e, eme i antara kerubim-kerubim,” jenari masuk dilaki e, tedis ia i sebelah roda e.
7 Kenca si e, masukken salah sada kerubim tanna ku api si lit i antara kerubim-kerubim e,+ buatna sitik api e jenari tamana ku duana tan dilaki si make uis linen e.+ Aloken dilaki e api ndai, jenari ndarat ia.
8 I teruh kabeng kerubim-kerubim e, lit si bagi tan manusia.+
9 Sanga kuperdiateken, lit kuidah empat roda i samping kerubim-kerubim e, sada roda i samping tiap kerubim. Roda-roda e ersinar bagi batu krisolit.+
10 Seri empatna bentuk roda e. Roda-roda e, bagi dua roda si ipasang ersilang.
11 Roda-roda e banci erdalan ku arah japa pe, la perlu belok perban roda-roda e banci lawes ku japa pe pengala takal kerubim e janah la perlu belok.
12 Dem mata bas daging kerubim-kerubim e, bas gurungna, tanna, ras kabeng-kabengna. Bas empatna roda si lit i samping kerubim-kerubim e pe dem mata.+
13 Lit kubegi sora si erlebuh man roda-roda e, “O roda si erputar, majulah!”
14 Tiap kerubim e lit empat ayona. Ayo si pertama ayo kerubim, ayo si peduaken ayo manusia, ayo si peteluken ayo singa, ayo si peempatken ayo kuliki.+
15 Kerubim-kerubim e bagi mahluk si nggeluh si kuidah i Lau Kebar,+ kerubim-kerubim e banci nangkih ku datas.
16 Adi erdalan kerubim-kerubim e, roda-roda e pe ikut erdalan i sampingna. Adi kimbangken kerubim-kerubim e kabengna gelah nangkih ia arah taneh, roda-roda e la belok ntah pe pindah arah sampingna.+
17 Adi ngadi kerubim-kerubim e, roda-roda e pe ngadi. Adi nangkih kerubim-kerubim e, roda-roda e pe nangkih perban kesah si badia si nuruh mahluk e pe lit bas roda-roda e.
18 Kenca si e, kemulian Jahwe+ lawes arah pintu rumah pertoton e nari, janah ngadi i datas kerubim-kerubim e.+
19 Kenca si e, kuidah ikimbangken kerubim-kerubim e kabengna jenari nangkih ia arah taneh nari. Roda-roda si lit i sampingna pe ikut nangkih. Ngadi kerubim-kerubim e i pintu gerbang sebelah timur rumah Jahwe, janah kemulian Dibata Israel lit i datasna.+
20 Enda ndai me mahluk-mahluk si nggeluh si pernah kuidah i teruh Dibata Israel sanga aku i Lau Kebar.+ Enggo kuteh maka e kerubim-kerubim.
21 Empatna mahluk e lit empat ayona, empat kabengna, ras i teruh kabengna lit si bagi tan manusia.+
22 Ayona bagi ayo si kuidah i deher Lau Kebar.+ Kerina kalak e erdalan lurus ku lebe.+