Esekiel 12:1-28
12 Ngerana ka Jahwe man bangku, nina,
2 “O anak manusia, kam tading i antara bangsa pemberontak. Lit mata kalak e guna ngenen, tapi la idahna. Lit cuping kalak e guna megi tapi la begina,+ perban kalak e bangsa pemberontak.+
3 O anak manusia, sikapkenlah barang-barangndu, tempa-tempa kam nandangi itaban. Sanga ciger wari, sanga kam idah kalak e, laweslah kam tempa-tempa bagi itaban. Sanga idah kalak e, laweslah kam arah rumahndu nari ku ingan si deban, tempa-tempa bagi itaban. Banci saja perdiateken kalak e kam amin gia kalak e bangsa pemberontak.
4 Bas ciger wari, sanga idah kalak e kam, babalah barang-barangndu, tempa-tempa kam lawes guna itaban. Sanga berngi, sanga kam idah kalak e, laweslah kam bagi kalak si itaban.+
5 “Sanga idah kalak e, lubangilah tembok rumahndu jenari ndarat kam arah lubang e, baba barang-barangndu.+
6 Sanga idah kalak e, tamaken barang-barangndu ku barandu, babalah e ndarat sanga wari enggo gelap. Tutupi ayondu gelah la banci idahndu taneh, sebap Kuban kam jadi tanda man kalak Israel.”+
7 Kulakoken tepat bagi si iperentahken man bangku. Sanga ciger wari, kubaba barang-barangku bagi maba barang guna itaban. Sanga karaben, kulubangi tembok rumahku alu tanku. Sanga wari enggo gelap, sanga idah kalak e, kuangkat barang-barangku bas baraku.
8 Paginna, ngerana ka Jahwe man bangku, nina,
9 “O anak manusia, la kin sungkuni kalak Israel, bangsa pemberontak e kam, nina, ‘Erkai kam e?’
10 Kataken man kalak e, ‘Bagenda nina Jahwe Tuhan Si Meganjangna, “Lit berita man peminpin-peminpin+ i Jerusalem bage pe man kerina kalak Israel si lit bas kota e.”’
11 “Kataken bagenda, ‘Aku jadi tanda man kena.+ Ilakoken pagi man kalak e bagi si kulakoken enda. Ibaba pagi kalak e lawes jadi tabanen.+
12 Baba peminpin-peminpin bangsa e pagi barang-barangna bas barana, lawes kalak e sanga gelap wari. Lubangi kalak e tembok kota, ndarat ia arah tembok e janahna maba barang-barangna.+ Tutupina pagi ayona emaka la idahna taneh.’
13 Kupebelang pagi jaringKu ku datasna janah Kutangkap ia alu jaringKu e.+ Jenari Kubaba pagi ia ku Babilon ku negri kalak Kaldea, tapi la idahna kota e, mate pagi ia i je.+
14 Kerina si lit i sekelilingna, si nampati ia, bage pe pasukenna, Kumerapken pagi ku erbage arah,+ Kupedarat pagi pedang guna ngayaki kalak e.+
15 Teh kalak e pagi maka Aku kap Jahwe sanga Kumerapken kalak e ku tengah bangsa-bangsa, janah Kumerapken kalak e ku erbage negri.
16 Tapi piga-piga arah kalak e Kupediat pagi selamat arah pedang, kelihen, ras arah wabah penakit, gelah banci ceritaken kalak e i tengah bangsa-bangsa ingan kalak e lawes, kerina perbahanen kalak e si erban ciga ate. Teh kalak e pagi maka Aku kap Jahwe.”
17 Ngerana ka Jahwe man bangku, nina,
18 “O anak manusia, sanga panndu pagi rotindu arus kam mbiar. Sanga inemndu pagi laundu arus kam nggirgir janah kuatir.+
19 Kataken man rakyat negri e, ‘Bagenda nina Jahwe Tuhan Si Meganjangna man penduduk Jerusalem i negri Israel, “Kuatir pagi kalak e man rotina, mbiar pagi kalak e nginem launa, sebap negri kalak e lanai pagi iingani+ perban kekerasen si lakoken kerina kalak si tading i je.+
20 Kota-kota si lit pendudukna ihancurken pagi janah negri e jadi gersang,+ jenari teh kena pagi maka Aku kap Jahwe.”’”+
21 Ngerana ka Jahwe man bangku, nina,
22 “O anak manusia, la kin lit kuan-kuan si bagenda bas Israel, ‘Wari-wari e enggo lewat, tapi la lit pengenehenen* si terjadi’?+
23 Emaka kataken man kalak e, ‘Bagenda nina Jahwe Tuhan Si Meganjangna, “Kumasapken pagi kuan-kuan e, lanai pagi belasken kalak e bas Israel.”’ Tapi kataken man kalak e, ‘Wari-wari e enggo ndeher,+ kerina pengenehenen pasti terjadi.’
24 Sebap lanai pagi lit pengenehenen si la tuhu ntah pe ramalen palsu* i tengah-tengah kalak Israel.+
25 ‘“Sebap si ngerana e Aku, eme Jahwe. Kai pe si Kukataken pasti terjadi, labo ipedekah-dekah.+ Bas jamanndu,+ o bangsa pemberontak, Kukataken pagi kata-kata enda janah Kulakoken,” nina Jahwe Tuhan Si Meganjangna.’”
26 Ngerana ka Jahwe man bangku, nina,
27 “O anak manusia, bagenda nina kalak Israel, ‘Ndekah dengang maka terjadi pengenehenen si idahna e. Nubuatna kerna masa depan e ndekah dengang maka terjadi.’+
28 Emaka, kataken bagenda man kalak e, ‘Bagenda nina Jahwe Tuhan Si Meganjangna, “‘La lit sada pe arah kata-kataKu si ipedekah-dekah. Kai pe si Kukataken pasti terjadi,’ nina Jahwe Tuhan Si Meganjangna.”’”
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Ntah “si nipu.”
