Esekiel 13:1-23
13 Ngerana ka Jahwe man bangku, nina,
2 “O anak manusia, ernubuatlah kerna nabi-nabi Israel,+ kataken man kalak si ban-banna nubuatna,+ ‘Begikenlah si ikataken Jahwe.
3 Bagenda nina Jahwe Tuhan Si Meganjangna, “Cilaka man nabi-nabi si motu, si ernubuat arah pikirenna sendiri padahal labo datna pengenehenen* kai pe arah Aku!+
4 O Israel, nabi-nabindu bagi biang kerangen* si tading bas runtuhen batu.
5 La kena lawes guna mpekena bagin si ceda bas tembok-tembok batu man kalak Israel,+ emaka kalak Israel la ngasup ertahan bas wari pertempuren Jahwe.”+
6 “Dat kalak e pengenehenen si la tuhu bage pe nubuat palsu. Ning kalak e, ‘Bagenda nina Jahwe,’ padahal labo utus Jahwe kalak e, janah ngarap kel kalak e terjadi kai si ikatakenna e.+
7 Ning kena, ‘Bagenda nina Jahwe,’ padahal labo lit kai pe Kukataken. La kin pengenehenen si la tuhu nge si nen kena e janah nubuat palsu nge si kataken kena e?”’
8 “‘Emaka bagenda nina Jahwe Tuhan Si Meganjangna, “‘Perban la tuhu nubuat kena e janah la tuhu pengenehenen kena e, jadi musuhKu pagi kena,’ nina Jahwe Tuhan Si Meganjangna.”+
9 TanKu pagi si ngukum nabi-nabi si mpeseh pengenehenen si la tuhu ras nubuat palsu e.+ Lanai pagi kalak e lit i tengah-tengah umat si ndeher ras Aku. Kalak e la icatat bas daftar silsilah kalak Israel, la kalak e mulih ku negri Israel. Dungna teh kena pagi maka Aku kap Jahwe Tuhan Si Meganjangna.+
10 Kerina enda terjadi perban enggo ban kalak e umatKu papak alu ngataken, “Lit dame!” situhuna labo lit dame.+ Sanga lit kalak si mbangun dingding si la paguh, lapisi kalak e alu cet mbentar.’*+
11 “Katakenlah man kalak si ngelapisi dingding alu cet mbentar e, maka runtuh nge pagi dingding e. Reh pagi udan meder, udan es, ras angin si meter ngeruntuhkenca.+
12 Sanga runtuh dingding e, isungkuni pagi kena, ‘I ja lapisen cet mbentar kena ndai?’+
13 “Emaka, bagenda nina Jahwe Tuhan Si Meganjangna, ‘Sanga merawa Aku, Kuban pagi reh angin si meter, udan si meder, ras udan es si erban hancur.
14 Kuruntuhken pagi seh ku taneh, dingding si ilapisi kena alu cet mbentar, teridah pagi pondasina. Sanga runtuh pagi kota e, kena pe mate bas kota e. Teh kena pagi maka Aku kap Jahwe.’
15 “‘Sanga Kusehken pagi rawaKu man dingding bage pe man kalak si ngelapisi dingding e alu cet mbentar, ningku pagi man kena, “Lanai lit dingding e, kalak si ngelapisisa pe lanai lit.+
16 Nabi-nabi Israel lanai pagi lit. Kalak e kap si ernubuat man Jerusalem ras ndatken pengenehenen kerna kedamen man kota e, padahal labo lit dame,”’+ nina Jahwe Tuhan Si Meganjangna.
17 “O anak manusia, alakenlah ku anak bangsandu si diberu si ban-banna nubuatna. Ernubuatlah kerna kalak e.
18 Kataken man kalak e, ‘Bagenda nina Jahwe Tuhan Si Meganjangna, “Cilaka man kalak si njait pita guna ipakeken ku kerina tan* kalak janah si erban tudung i bas erbage ukuren guna ngayak-ngayak kesah kalak! Ayaki kena kin kesah umatKu guna nelamatken kesah kena?
19 Najis ban kena Aku i lebe-lebe umatKu guna ndatken sengkerauk barli ras piga-piga potong roti.+ Bunuh kena kalak si arusna la mate, pediat kena nggeluh kalak si arusna mate. Alu bage buali kena umatKu janah tek kalak e man kena.”’+
20 “Emaka, bagenda nina Jahwe Tuhan Si Meganjangna, ‘O diberu-diberu, segat ateKu pita-pita si pake kena guna erburu kesah kalak bagi erburu perik. Kuretapken pagi pita e arah tan kena nari, Kulepasken kalak si iburu kena bagi perik.
21 Kurigatken pagi tudung kena, Kuselamatken pagi umatKu arah tan kena. Lanai pagi ayaki kena kalak e, janah teh kena pagi maka Aku kap Jahwe.+
22 Buali kena kalak si benar dungna lanai ia semangat,+ padahal labo Aku si erban ia susah.* Pegegehi kena kalak jahat+ si erban ia la robah arah perbahanenna si jahat, dungna mate ia.+
23 Emaka o diberu-diberu, lanai pagi dat kena pengenehenen si la tuhu bage pe ramalen.+ Kuselamatken pagi umatKu arah tan kena nari, janah teh kena pagi maka Aku kap Jahwe.’”
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Enda jenis biang si gendek nahena, galang cupingna, janah licik.
^ Maksudna, erban dingding si la paguh janah ilapisi alu kapur gelah teridah paguh.
^ Maksudna, gelang jimat si iiketken bas siku ntah pe pergelangen tan.
^ Ntah “rate mesui.”
