Esekiel 14:1-23
14 Reh piga-piga peminpin Israel, kundul kalak e i lebe-lebeku.+
2 Kenca si e reh kata Jahwe man bangku, nina,
3 “O anak manusia, terus ate kalak e ngikutken berhala-berhalana si erban ciga ate,* banna* kalak si deban ngelakoken dosa. Arus kin Kujawap penungkunen kalak e?+
4 Kataken man kalak e, ‘Bagenda nina Jahwe Tuhan Si Meganjangna, “Adi lit kalak Israel si terus atena ngikutken berhala-berhalana si erban ciga ate, banna* kalak si deban ngelakoken dosa, dahina nabi guna mindo petunjuk, Aku Jahwe pagi si mereken jawapen* man bana. Jawapen si Kubereken bali buena ras berhala-berhala kalak e.
5 Kuban pagi kalak Israel mbiar perban enggo tadingkenna Aku janah ikutkenna berhala-berhalana si erban ciga ate.”’+
6 “Emaka kataken man kalak Israel, ‘Bagenda nina Jahwe Tuhan Si Meganjangna, “Mulihlah kena, tadingken berhala-berhala kena si erban ciga ate. Tulaklah kerina perbahanen si erban ciga ate.+
7 Adi lit kalak Israel ntah pe penduduk asing si nadingken Aku, janah terus atena ngikutken berhala-berhalana si erban ciga ate, banna* kalak si deban ngelakoken dosa, jenari pindona petunjuk man nabiKu,+ Aku Jahwe pagi si mereken jawapen man bana.
8 Kulawan pagi ia. Kuban ia jadi persinget man kalak si deban, itokohi pagi ia. Kukernepken pagi ia arah umatKu.+ Alu bage teh kena pagi maka Aku kap Jahwe.”’
9 “‘Tapi adi tertipu nabi e, berena jawapen man kalak e, berarti Aku Jahwe si nipu nabi e.+ Kuangkat tanKu janah Kukernepken ia arah umatKu Israel.
10 Arus tanggung kalak e kesalahenna. Kesalahen kalak si mindo petunjuk e seri ras kesalahen nabi e,
11 gelah lanai tadingken kalak Israel Aku janah lanai iban kalak e dirina najis alu dosa-dosana. Jadi umatKu pagi kalak e, Aku jadi Dibatana,’+ nina Jahwe Tuhan Si Meganjangna.”
12 Ngerana ka Jahwe man bangku, nina,
13 “O anak manusia, adi lit negri si erdosa perban la setia man bangKu, Kuangkat pagi tanKu, Kukernepken persedian panganna,*+ Kuban terjadi kelihen+ guna engkernepken manusia ras binatang si lit i je.”+
14 “‘Amin pe Nuah,+ Daniel,+ ras Jop+ lit i je, kesahna sendiri ngenca si banci selamatkenna perban kalak e benar,’+ nina Jahwe Tuhan Si Meganjangna.”
15 “‘Ntah banci saja Kuban pagi reh binatang buas si seh kel rawana ku negri e guna munuh kalak si tading i je, emaka gersang pagi negri e. Ise pe la lit si lewat arah je nari perban binatang buas e.’+
16 Nina Jahwe Tuhan Si Meganjangna, ‘Aku, Dibata si nggeluh ersumpah, amin gia teluna dilaki ndai lit i je, la banci selamatken kalak e anak-anakna si dilaki ntah pe si diberu. Kesahna ngenca si banci selamatkenna, janah negri e ipediat la iurus.’”
17 “‘Ntah banci saja Kuban reh pedang ku negri e,+ ningku, “Pediatlah negri e iserang pedang,” emaka maten manusia ras binatang i je.+
18 Amin gia teluna dilaki ndai lit i je, Aku, Dibata si nggeluh ersumpah, labo banci selamatken kalak e anak-anakna si dilaki ntah pe si diberu. Kesahna ngenca si banci selamatkenna,’ nina Jahwe Tuhan Si Meganjangna.”
19 “‘Ntah banci saja Kuban reh wabah penakit ku negri e+ janah Kusehken rawaKu si erban dareh mamburen, emaka maten manusia ras binatang.
20 Amin gia Nuah,+ Daniel,+ ras Jop+ lit i je, Aku, Dibata si nggeluh ersumpah, labo banci selamatken kalak e anak-anakna si dilaki ntah pe si diberu. Kesahna ngenca si banci selamatkenna perban kalak e benar,’+ nina Jahwe Tuhan Si Meganjangna.”
21 “Sebap bagenda nina Jahwe Tuhan Si Meganjangna, ‘Si enda pagi terjadi sanga Kuban reh empat penghukumen enda,+ eme pedang, kelihen, binatang buas si seh kel rawana, ras wabah penakit+ guna nyerang Jerusalem, emaka maten pagi manusia ras binatang.+
22 Tapi lit piga-piga si selamat janah ibaba ndarat arah je nari,+ termasuk anak-anak si dilaki ras si diberu. Reh pagi kalak e ndahi kena, sanga idah kena pagi perbahanen ras lagu langkah kalak e, pasti teh kena engkai maka Kuban terjadi bencana man Jerusalem, janah engkai maka Kulakoken si e kerina man kota e.’”
23 “‘Sanga idah kena pagi perbahanen ras lagu langkah kalak e, teh kena pagi maka lit nge alasenna engkai maka Kuban bage,’+ nina Jahwe Tuhan Si Meganjangna.”
Cataten i teruh
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “banna batu si erban.”
^ Ntah “banna batu si erban.”
^ Ntah “hukumen.”
^ Ntah “banna batu si erban.”
^ As. “Kupenggelken tongkat rotina.” Mungkin maksudna tongkat ingan nggantung roti.
