Esekiel 16:1-63
16 Ngerana ka Jahwe man bangku, nina,
2 “O anak manusia, kataken man Jerusalem kerina perbahanenna si erban ciga ate.+
3 Kataken man kalak e, ‘Nina Jahwe Tuhan Si Meganjangna man Jerusalem, “Asalndu negri Kanaan nari, i je kam lahir. Bapakndu kalak Amori,+ mamakndu kalak Het.+
4 Sanga kam lahir, nali pusungndu la ipotong, la kam iperidi gelah bersih, la kam igusgus alu sira, la kam ibungkus alu uis.
5 La lit si rate mekuah man bandu guna ngelakoken si e ndai kerina. Ise pe la rate mekuah man bandu. Iambekken kam ku juma-juma perban segat ate kalak e kam sanga kam lahir.
6 “‘“Sanga lewat Aku, Kuidah kam nipak-nipak, dagingndu erdareh-dareh denga. Sanga kam tayang janah dagingndu erdareh-dareh denga, ningKu, ‘Ula kam mate!’ Ue, sanga kam tayang janah dagingndu erdareh-dareh denga, ningKu, ‘Ula kam mate!’
7 Kuban kam jadi seh kel teremna bagi sinuan-sinuan si ertunas i juma. Reh galangna kam janah reh belinna. Pakendu ka perhiasen si mejilena. Buah dadandu enggo galang, bukndu reh gedangna, tapi kam tilanjang denga.”’
8 “‘Sanga lewat Aku janah Kuperdiatekan, Kuidah enggo cukup umur kam guna rate ngena. Emaka Kukimbangken jubahKu+ nutupi dagingndu si tilanjang e. Jenari ersumpah Aku, Kuban perjanjin ras kam, dung e kam jadi jangKu,’ nina Jahwe Tuhan Si Meganjangna.
9 ‘Kenca si e, Kuperidi kam alu lau, Kubersihken darehndu janah Kuminaki kam.+
10 Kupakeken baju si isulam man bandu, Kubereken selop si mejilena si iban arah kulit* nari, jenari Kututupi takalndu alu uis linen halus, ras Kubajui kam alu baju-baju si merga.
11 Kupakeken man bandu perhiasen, Kutamaken gelang-gelang bas tanndu bage pe kalung bas kerahungndu.
12 Kutama ka anting-anting bas igungndu ras anting-anting bas cupingndu bage pe mahkota bas takalndu.
13 Terus ihiasindu bandu alu emas ras pirak. Bajundu arah uis linen halus, kain si merga, ras baju si isulam. Panganndu arah tepung halus, madu, ras minak. Reh galangna kam janah jadi diberu si seh kel jilena,+ enggo cocok kam jadi ratu.’”
14 “‘Enggo terkenal kam* i tengah bangsa-bangsa+ perban mejile kel kam. Sempurna kel jilendu perban Kubereken kemulianKu man bandu,’+ nina Jahwe Tuhan Si Meganjangna.”
15 “‘Tapi mulai andalkenndu jilendu e,+ jadi pelacur kam perban kam terkenal.+ Ise pe si lewat, berekenndu dirindu man bana+ janah jilendu e jadi jangna.
16 Buatndu piga-piga bajundu janah banndu ingan-ingan ersembah* si warna-warni, jenari jadi pelacur kam i je.+ Aturna la lakokenndu si bage, si e arusna la pernah terjadi.
17 Buatndu ka perhiasen emas ras pirak si Kubereken man bandu, jenari banndu patung-patung dilaki janah jadi pelacur kam man bana.+
18 Buatndu ka bajundu si isulam jenari pakekenndu man bana.* Persembahkenndu minakKu ras kemenyanKu man bana.+
19 Roti si Kubereken man bandu si iban arah tepung halus, minak, ras madu si Kubereken gelah ipanndu, persembahkenndu ka man bana gelah merim* akapna.+ Bage me si terjadi,’ nina Jahwe Tuhan Si Meganjangna.”
20 “‘Buatndu ka anak-anakndu si dilaki ras si diberu si lahirkenndu man bangKu,+ jenari korbankenndu kalak e jadi persembahen man berhala-berhala.+ Lenga kin kam puas jadi pelacur?
21 Bunuhndu anak-anakKu si dilaki, persembahkenndu jadi korban alu nutung kalak e.+
22 Sanga lakokenndu kerina perbahanenndu si erban ciga ate e bage pe sanga kam jadi pelacur, la ingetndu sanga kam kitik denga, sanga kam tilanjang, sanga kam nipak-nipak janah dagingndu erdareh-dareh denga.
23 Cilaka, cilaka kel kam, perban enggo lakokenndu kejahaten,’+ nina Jahwe Tuhan Si Meganjangna.
24 ‘Banndu sada ingan guna nembah dibata palsu janah banndu ingan si meganjang bas tiap lapangen kota.
25 Banndu ingan ersembah bas ingan si teridah bas tiap dalan, jilendu e enggo erban ciga ate perban tawarkenndu dirindu man tiap kalak si lewat,+ janah reh rusurna kam ngelakoken pelacuren.+
26 Kam jadi pelacur man kalak Mesir+ eme tetanggandu si galang napsuna, sakit hati Aku banndu perban lanai terkira uga buena kam ngelakoken pelacuren.
27 Kuangkat pagi tanKu ngelawan kam, Kukurangi persedian panganndu.+ Kupediat pagi anak-anak si diberu arah kalak Pilisti rate-ate man bandu.+ Segat ate diberu-diberu e man bandu, ciga atena perbahanenndu si la meteh mela.+
28 “‘Perban la kam puas-puas, jadi pelacur ka kam man kalak Assur,+ tapi kenca jadi pelacur kam man kalak e, tetap denga kam la puas.
29 Emaka reh rusurna lakokenndu pelacuren bas negri Kanaan* bage pe bas negri kalak Kaldea,+ tapi kenca si e pe tetap denga kam la puas.
30 Lemah kel pusuhndu,* perban lakokenndu kerina e. Perbahanenndu e bagi pelacur si la meteh mela!’+ nina Jahwe Tuhan Si Meganjangna.
31 ‘Sanga banndu sada ingan guna nembah dibata palsu janah sanga banndu ingan si meganjang bas tiap lapangen kota, kam la bagi pelacur, perban kam la nggit igalari.
32 Kam ndehara si meriah akapna erlua-lua, si ngena atena kalak si la tandaina janah labo dilakina!+
33 Pelacur biasana ibere hadiah,+ tapi kam, kam si mereken hadiah man kerina kalak si galang napsuna man bandu.+ Sogokndu kalak arah erbage ingan gelah reh ia ndahi kam guna ngelakoken hubungen seks ras kam.+
34 La kam seri ras pelacur si deban. Labo lit pelacur si bagi kam! Labo kam si igalari, tapi kam si nggalari kalak. Si lakokenndu e tuhu-tuhu beda kel.’
35 “O pelacur,+ begikenlah kai nina Jahwe.
36 Bagenda nina Jahwe Tuhan Si Meganjangna, ‘Perban puaskenndu napsundu, tilanjangindu dagingndu sanga kam ngelakoken pelacuren ras kerina rondong-rondongndu, bage pe ras kerina berhala-berhalandu si erban ciga ate,*+ korbankenndu ka dareh anak-anakndu si dilaki man kerina berhala-berhala e,+
37 emaka Kupepulung kerina rondong-rondongndu si enggo meriah banndu ukurna, eme kerina si ngena atendu radu ras kerina kalak si segat atendu. Kupepulung pagi kalak e arah sekelilingndu guna ngelawan kam. Kutilanjangi pagi kam i lebe-lebe kalak e, idah kalak e pagi kam tilanjang.+
38 “‘Kuhukum pagi kam alu hukumen si patut man diberu perlua-lua+ ras diberu si ngamburken dareh,+ bas rawaKu ras cemburuKu Kuamburken pagi darehndu.+
39 Kubereken pagi kam ku tan kalak e, iruntuhken kalak e pagi ingan ersembah man dibata palsundu bage pe ingan-ingan ersembahndu.+ Talangi kalak e pagi bajundu,+ rampasna perhiasenndu si mejile+ jenari tadingkenna kam tilanjang.
40 Ban kalak e pagi reh enterem jelma,+ benteri kalak e pagi kam alu batu+ jenari bunuhna kam alu pedang.+
41 Tutung kalak e pagi rumahndu+ janah ihukum kam i lebe-lebe enterem diberu. Kuban pagi lanai kam jadi pelacur,+ lanai pagi galarindu kalak.
42 Kusehken pagi rawaKu man bandu,+ kenca si e lanai Aku merawa man bandu.+ Dung e enggo tenang Aku, lanai Aku sakit hati.’
43 “‘Perban lanai ingetndu uga kam sanga kitik denga+ janah arah kerina perbahanenndu banndu Aku merawa, emaka Kuban pagi nanamindu akibat arah perbahanenndu e,’ nina Jahwe Tuhan Si Meganjangna, ‘lanai pagi lakokenndu perbahanen si la meteh mela e, bage pe kerina perbahanenndu si erban ciga ate.
44 “‘Kataken kalak pagi kuan-kuan enda sanga cakapkenna kam, nina, “Uga mamakna, bage kang anakna!”+
45 Kam tuhu-tuhu anak mamakndu, si segat atena dilakina bage pe anak-anakna. Kam tuhu-tuhu kakak ras adek seninandu, si segat atena dilakina bage pe anak-anakna. Mamakndu kalak Het janah bapakndu kalak Amori.’”+
46 “‘Kakakndu eme Samaria+ si tading i sebelah utarandu* ras anak-anakna si diberu,*+ adekndu eme Sodom+ si tading i sebelah selatanndu* ras anak-anakna si diberu.+
47 Labo bas dalan-dalan kalak e saja kam erdalan janah ikutkenndu perbahanenna si erban ciga ate, tapi ntisik saja pe, perbahanenndu enggo jahaten asangken kalak e.+
48 Aku, Dibata si nggeluh ersumpah,’ nina Jahwe Tuhan Si Meganjangna, ‘adekndu Sodom ras anak-anakna si diberu la pernah ngelakoken bagi si lakokenndu bage pe si lakoken anak-anakndu si diberu.
49 Enda kesalahen adekndu Sodom: Ia ras anak-anakna+ sombong,+ melala pangan kalak e,+ geluhna tenang ras dame,+ tapi la sampatina kalak si susah ras si mesera.+
50 Lalap kalak e sombong,+ terus lakokenna perbahanen si erban ciga ate i lebe-lebeKu,+ emaka Kukernepken ateKu kalak e.+
51 “‘Dosa Samaria+ la lit setengahna pe adi bandingken ras dosandu. Lalap lakokenndu perbahanen si erban ciga ate lebihen asangken kalak e. Kerina perbahanenndu si erban ciga ate e erban kakakndu ras adekndu tempa-tempa enggo benar.+
52 Emaka gundari gengkenlah ugapa pe kapndu melana, perban enggo banndu perbahanen kakakndu ras adekndu tempa-tempa enggo benar. Kam erdosa sebap perbahanenndu ndauh keleken asangken kalak e, emaka tempa-tempa perbahanen kalak e ulin asangken kam. Gundari, gengkenlah ugapa pe kapndu melana perban enggo banndu kakakndu ras adekndu tempa-tempa benar.’
53 “‘Kenca si e, Kupepulung pagi kalak si enggo itaban, eme kalak Sodom ras anak-anakna si diberu bage pe kalak Samaria ras anak-anakna si diberu. Kalak si itaban arah kena pe ikut Kupepulung ras kalak e,+
54 gelah mela akapndu. Mela pagi akapndu perban enggo banndu reh senangna akap kalak e.
55 Adekndu Sodom ras anak-anakna si diberu, kakakndu Samaria ras anak-anakna si diberu, bage pe kam ras anak-anakndu si diberu mulihi ka pagi bagi si mbarenda.+
56 Sanga kam sombong, adekndu Sodom la kapndu merga,
57 eme sope tereteh kejahatenndu.+ Gundari anak-anak Siria si diberu ras tetangga-tetanggana nokohi kam, anak-anak kalak Pilisti si diberu+ ras kalak si lit i sekelilingndu pe nokohi kam.
58 Arus nanamindu akibat arah perbahanenndu si jahat ras si erban ciga ate e,’ nina Jahwe.”
59 “Bagenda nina Jahwe Tuhan Si Meganjangna, ‘Kuban pagi man bandu bagi si enggo banndu,+ perban segat atendu sumpahndu janah langgarndu perjanjinKu.+
60 Tapi lalap pagi Kuinget perjanjin si enggo Kuban ras kam sanga kam nguda denga, Kuban pagi perjanjin si tahan rasa lalap ras kam.+
61 Pasti ingetndu pagi perbahanenndu, mela akapndu+ sanga alo-alondu kakak-kakakndu ras adek-adekndu si diberu. Kuban pagi kalak e jadi anak-anakndu si diberu tapi labo perban perjanjin ras kam.’
62 “‘Kuban pagi perjanjin ras kam janah tehndu pagi maka Aku kap Jahwe.
63 Sanga Kuampuni kam,* la soal kai pe si lakokenndu, ingetndu pagi kerina si lakokenndu e, mela pagi kapndu+ seh ngasa lanai tehndu kai si man katanken,’+ nina Jahwe Tuhan Si Meganjangna.”
Cataten i teruh
^ Ntah “kulit anjing laut.”
^ As. “gelarndu.”
^ As. “ingan-ingan si meganjang.”
^ Eme patung-patung dilaki.
^ As. “meriah.”
^ Ntah “negri kalak si erdagang.”
^ Ntah banci saja “Merawa kel Aku man bandu.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ As. “kirindu.”
^ Mungkin maksudna kota-kota si lit i sekelilingna.
^ As. “kananndu.”
^ Ntah “Sanga Kuban pendamen ras kam.”
