Esekiel 17:1-24
17 Ngerana ka Jahwe man bangku, nina,
2 “O anak manusia, pesehlah sada teka-teki ras sada kuan-kuanen kerna kalak Israel.+
3 Katakenlah, ‘Bagenda nina Jahwe Tuhan Si Meganjangna, “Lit perik kuliki si galang,+ kabengna mbelang, ujung kabengna gedang, melala mbuluna ras warna-warni. Reh ia ku Libanon,+ cinep ia i pucuk batang kayu aras.+
4 Penggelkenna pucuk si arah datasna kel jenari babana ku negri Kanaan,* janah suanna i kota kalak si erdagang.+
5 Kenca si e buatna benih arah negri e,+ suanna bas juma si subur tanehna. Suanna benih e bagi nuan batang kayu* si lit bas ingan si melala launa.
6 Emaka ertunas benih e, turah jadi batang anggur si njoler i teruh.+ Dahan-dahanna bengkok ku bas janah uratna lit i teruhna. Benih e jadi batang anggur, ertunas janah ercabang.+
7 “‘“Reh ka sada nari kuliki si galang,+ mbelang kabengna, ujung kabengna gedang.+ Batang anggur e pe semangat njolerken uratna ku arah perik e, ndauh arah inganna isuan. Dahan-dahanna pe arahkenna ku perik e gelah palerkenna lau man bana.+
8 Sinuan-sinuan e enggo isuan i juma si subur tanehna, i deher ingan si melala launa gelah ercabang, erbuah, janah jadi batang anggur si galang si seh kel jilena.”’+
9 “Kataken ka, ‘Bagenda nina Jahwe Tuhan Si Meganjangna, “Mejile nge kari perturah batang anggur e? La kin lah kari cabut kalak uratna+ janah macik banna buahna ras melus tunasna?+ Kerah kel kari batang anggur e janah banci icabut seh ku uratna. La perlu tan si megegeh ncabutsa ntah pe enterem kalak.
10 Amin pe batang anggur e isuan mulihi bas ingan si deban, mejile kin kari perturahna? La kin lah kari kerah adi rembus angin arah timur? Kerah pagi batang anggur e bas kebun inganna ertunas.”’”
11 Ngerana ka Jahwe man bangku, nina,
12 “Kataken man bangsa pemberontak e, ‘La kin tehndu kai ertina kerina enda?’ Kataken ka, ‘Reh pagi raja Babilon ku Jerusalem, babana raja ras pejabat-pejabat si lit i Jerusalem jenari babana kalak e radu ras ia ku Babilon.+
13 Kenca si e buatna salah sada keturunen raja,+ banna perjanjin ras ia janah suruhna ia ersumpah.+ Jenari babana lawes kalak si penting bas negri e,+
14 gelah kerajan e lanai iergai janah lanai banci megegeh. Sada ngenca cara gelah kerajan e banci ertahan eme alu matuhi perjanjinna.+
15 Dungna mberontak raja e man bana+ alu ngirim utusen ku Mesir guna ndatken kuda+ ras melala pasuken.+ Berhasil nge kalak e? Banci kin kalak si ngelakoken si e selamat? Banci kin kalak si ngelanggar perjanjin e la ihukum?’+
16 “‘Nina Jahwe Tuhan Si Meganjangna, “Aku Dibata si nggeluh ersumpah, mate pagi ia i Babilon bas ingan raja* si erban ia* jadi raja. La ergaina sumpahna man raja e, langgarna perjanjinna ras raja e.+
17 Sanga timbunen-timbunen taneh ras tembok pengepungen ibangun guna munuh enterem kalak, pasuken si enterem ras prajurit si melala arah raja Mesir* la banci nampati bas peperangen.+
18 La ergaina sumpah, langgarna perjanjin. Amin pe enggo erjanji ia, lakokenna kerina enda. Labo kari ia banci pulah.”’
19 “‘Bagenda nina Jahwe Tuhan Si Meganjangna, “Perban la ergaina sumpahna man bangKu janah langgarna perjanjinna ras Aku, Aku Dibata si nggeluh ersumpah,+ Kuban pagi nanamina akibat perbahanenna e.
20 Kupebelang pagi jaringKu ku ia, itangkap pagi ia alu jaringKu e.+ Kubaba pagi ia ku Babilon, Kuhakimi pagi ia i je perban la ia setia man bangKu.+
21 Kerina prajuritna si kiam, mate pagi perban pedang, janah kalak si nggeluh denga merap ku kerina arah.+ Alu bage teh kena pagi maka Aku kap Jahwe si enggo ngatakenca.”’+
22 “‘Bagenda nina Jahwe Tuhan Si Meganjangna, “Kubuat pagi pucuk batang kayu aras si meganjang+ e jenari Kusuan. Kupenggelken pagi pucukna si nguda denga arah ujung cabangna,+ jenari Kusuan i datas gunung si meganjang kel.+
23 Kusuan pagi pucuk e i datas gunung si meganjang bas Israel. Reh galangna pagi cabang-cabangna, erbuah, janah jadi batang kayu aras si galang si seh kel jilena. Tading pagi erbage-bage perik i je, erlindung ia i dahan-dahanna.
24 Kerina batang kayu si erbuah tehna pagi maka Aku kap Jahwe si mpeteruk batang kayu si meganjang janah mpeganjang batang kayu si meteruk. Kupekerah batang kayu si meratah bulungna+ janah Kuban batang kayu si kerah erbunga.+ Aku Jahwe si enggo ngatakenca ras si enggo ngelakokenca.”’”
Cataten i teruh
^ Ntah “kalak si erdagang.”
^ Maksudna, batang kayu wilow eme batang kayu si gedang cabang-cabangna ras runcing bulungna.
^ Maksudna, Nebukadnesar.
^ Maksudna, Sedekia.
^ As. “Paro; Firaun.” Penggelaren man raja Mesir.
