Esekiel 18:1-32
18 Nina Jahwe ka man bangku,
2 “Kai maksudna kuan-kuan enda si cakapken kena bas Israel, ‘Bapak-bapak si man anggur si macem, tapi ipen anak-anakna si ngilu’?+
3 “Nina Jahwe Tuhan Si Meganjangna, ‘Aku Dibata si nggeluh ersumpah, lanai pagi cakapken kena kuan-kuan e bas Israel.
4 Kesah tiap jelma Aku kap si mpuna. Kesah bapak bage pe kesah anak, Aku kap si mpuna. Ise si erdosa ia si mate.
5 “‘Misalna lit sekalak jelma si bujur, adil ras benar perbahanenna.
6 La panna korban si enggo ipersembahken man berhala i pegunungen.+ La ia ertoto man berhala kalak Israel si erban ciga ate.* La ia erhubungen seks ras diberu kalak,+ la ia erhubungen seks ras diberu si sangana haid.+
7 La tindasna kalak.+ Ulihkenna barang jaminen kalak si rutang man bana.+ La ia ngerampok.+ Berekenna panganna man kalak si melihe,+ berekenna baju man kalak si tilanjang.+
8 La pindona bunga ntah pe ndarami untung+ sanga mereken pinjamen. La ia nokoh,+ hakimina dua pihak alu adil.+
9 Lalap dalankenna peraturen-peraturenKu, patuhina undang-undangKu alu setia. Ia kalak si benar kap, pasti ia tetap nggeluh,’+ nina Jahwe Tuhan Si Meganjangna.
10 “‘Tapi misalna lit anakna dilaki si nggit ngerampok,+ munuh,+ ntah pe ngelakoken perbahanen si bage rupana,
11 (tapi bapakna e la pernah ngelakoken perbahanen si bage) pan anakna e korban si ipersembahken man berhala i pegunungen, paksana diberu kalak ngelakoken perbahanen seks si salah ras ia.
12 Tindasna kalak si susah ras si mesera,+ ngerampok ia, la ulihkenna barang jaminen, ertoto ia man berhala si erban ciga ate,+ janah lakokenna perbahanen si erban ciga ate.+
13 Sanga berekenna pinjamen, daramina untung ras pindona bungana.+ Adi bage, anak e ndai la banci tetap nggeluh. Arus ia ibunuh perban enggo lakokenna kerina perbahanen si erban ciga ate e. Ia mate perban kesalahenna.
14 “‘Tapi misalna lit sekalak anak dilaki ngidah kerina dosa si lakoken bapakna. Amin pe idahna, la ia ikut ngelakokenca.
15 La panna korban si enggo ipersembahken man berhala i pegunungen. La ia ertoto man berhala kalak Israel si erban ciga ate. La ia erhubungen seks ras diberu kalak.
16 La tindasna kalak. Ulihkenna barang jaminen kalak si rutang man bana. La ia ngerampok. Berekenna panganna man kalak si melihe, berekenna baju man kalak si tilanjang.
17 La tindasna kalak mesera, la daramina untung ntah pe pindona bunga sanga berekenna pinjamen. Terus patuhina undang-undangKu ras dalankenna peraturen-peraturenKu. Kalak si bage labo mate perban kesalahen bapakna. Ia pasti tetap nggeluh.
18 Tapi perban nipu bapakna ras rampokna seninana, janah lakokenna perbahanen si salah, bapakna e mate perban kesalahenna.
19 “‘Tapi pasti tersungkun-sungkun kena, “Engkai maka anak e la ihukum perban kesalahen bapakna?” Anak e pasti tetap nggeluh perban enggo lakokenna kai si adil ras benar, lalap dalankenna ras patuhina kerina peraturen-peraturenKu.+
20 Ise si erdosa ia si mate.+ Anak labo ihukum perban kesalahen bapakna, bapak labo ihukum perban kesalahen anakna. Perbahanen si benar arah kalak si benar ibalasken man kalak si benar e saja, perbahanen si jahat arah kalak si jahat ibalasken man kalak si jahat e saja.+
21 “‘Adi lit kalak jahat si robah arah kerina dosa si enggo lakokenna, patuhina peraturen-peraturenKu, lakokenna kai si adil ras benar, pasti ia tetap nggeluh. Labo pagi ia mate.+
22 Labo pagi Kuinget sada pe kesalahenna e.+ Tetap pagi ia nggeluh perban enggo lakokenna kai si benar.’+
23 “Nina Jahwe Tuhan Si Meganjangna, ‘Akapndu kin meriah Kuakap ngidah kalak jahat mate?+ La kin riahen nge Kuakap ngidah kalak jahat robah janah tetap ia nggeluh?’+
24 “‘Tapi adi tadingken kalak si benar perbahanenna si benar, lakokenna kai si salah* bage pe kerina perbahanen si erban ciga ate si lakoken kalak jahat, banci kin ia tetap nggeluh? Sada pe perbahanenna si benar labo iinget.+ Pasti mate ia perban la ia setia, perban lakokenna dosa.+
25 “‘Pasti ning kena pagi, “Perbahanen Jahwe la adil.”+ O kalak Israel, begikenlah! PerbahanenKu kin si la adil?+ La kin perbahanen kena nge si la adil?+
26 “‘Adi tadingken kalak si benar perbahanenna si benar janah lakokenna kai si salah, pasti mate ia perban perbahanenna e. Mate ia perban kesalahenna.
27 “‘Adi lit kalak jahat si robah arah perbahanenna si jahat jenari mulai lakokenna kai si adil ras benar, pasti selamatkenna geluhna.+
28 Sanga sadar ia janah robah ia arah kerina kesalahen si enggo lakokenna, pasti ia tetap nggeluh. Labo pagi ia mate.
29 “‘Tapi pasti nina kalak Israel, “Perbahanen Jahwe la adil.” O kalak Israel, payo kin perbahanenKu si la adil?+ La kin perbahanen kena nge si la adil?’
30 “Nina Jahwe Tuhan Si Meganjangna, ‘O kalak Israel, Kuhakimi pagi kena menurut perbahanen kena masing-masing.+ Robahlah kena, ula nai ulihi kesalahen kena, gelah la kena ersalah sebap ban kena kalak erdosa jenari ersalah kena.
31 Ula nai lakoken kena kesalahen si pernah lakoken kena,+ ubahlah pusuh ras perukuren kena.+ O kalak Israel, engkai kena arus mate?’+
32 “‘Labo meriah ukurKu ngidah ise pe si mate.+ Emaka robahlah gelah tetap kena nggeluh,’+ nina Jahwe Tuhan Si Meganjangna.”
Cataten i teruh
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “la adil.”
