Esekiel 20:1-49
20 Bas tahun si pepituken, bulan si pelimaken, bas wari si pe-10-ken bas bulan e, reh piga-piga peminpin Israel, kundul kalak e i lebe-lebeku mindo petunjuk Jahwe.
2 Reh kata Jahwe man bangku, nina,
3 “O anak manusia, katakenlah man peminpin-peminpin Israel, ‘Bagenda nina Jahwe Tuhan Si Meganjangna, “Mindo petunjukKu nge kena reh? ‘Aku Dibata si nggeluh ersumpah, labo kena Kualoi,’+ nina Jahwe Tuhan Si Meganjangna.”’
4 “O anak manusia, enggo kin kam ersikap ngakimi kalak e?* Enggo kin kam ersikap guna ngakimi kalak e? Katakenlah man kalak e kai si enggo ilakoken nini bulangna si erban ciga ate.+
5 Kataken bagenda man kalak e, ‘Nina Jahwe Tuhan Si Meganjangna, “Bas wari sanga Kupilih Israel,+ ersumpah ka Aku* man keturunen Jakup, Kupetandaken diriku man kalak e i negri Mesir.+ Ersumpah Aku man kalak e, ningKu, ‘Aku kap Jahwe Dibata kena.’
6 Bas wari e, ersumpah Aku maka Kubaba pagi kalak e ndarat arah negri Mesir ku negri si enggo Kupilih* man kalak e, eme negri si melala kel i je susu ras madu.+ Negri e si mejilena arah kerina negri.
7 NingKu man kalak e, ‘Arus ambekken kena kai si erban ciga ate si lit i lebe-lebe kena. Ula ban kena najis diri kena alu berhala-berhala si erban ciga ate* arah Mesir.+ Aku kap Jahwe Dibata kena.’+
8 “‘“Tapi mberontak kalak e man bangKu, la kalak e nggit megiken Aku. La ambekken kalak e kai si erban ciga ate si lit i lebe-lebe kalak e, la tadingken kalak e berhala-berhala si erban ciga ate arah Mesir.+ Emaka erjanji Aku, Kusehken pagi rawaKu man kalak e, Kuban pagi gelah nanami kalak e* rawaKu i Mesir.
9 Tapi guna gelarKu la Kuban bage, gelah gelarKu la ceda i lebe bangsa-bangsa si tading i sekeliling kalak e.+ Perban enggo Kupetandaken diriKu man kalak e* i lebe bangsa-bangsa e sanga Kubaba kalak e ndarat Mesir nari.+
10 Emaka Kubaba kalak e ndarat Mesir nari, Kubabai kalak e ku taneh mesawang.*+
11 “‘“Kenca si e, Kubereken man kalak e peraturenKu ras undang-undangKu,+ gelah kalak si matuhisa banci tetap nggeluh.+
12 Kubereken ka SabatKu+ jadi tanda antara Aku ras kalak e.+ Alu bage, teh kalak e maka Aku kap Jahwe si enggo mpebadia kalak e.
13 “‘“Tapi mberontak kalak Israel man bangKu bas taneh mesawang.*+ La dalanken kalak e peraturen-peraturenKu, tulak kalak e undang-undangKu, padahal ise pe si matuhisa pasti nggeluh. Najis kel ban kalak e SabatKu. Emaka erjanji Aku pasti Kusehken rawaKu man kalak e bas taneh mesawang gelah kernep kalak e.+
14 Tapi guna gelarKu la Kuban bage, gelah gelarKu la ceda i lebe bangsa-bangsa si ngidah Aku maba kalak e* ndarat arah Mesir.+
15 Ersumpah ka Aku man kalak e i taneh mesawang,* labo Kubaba kalak e ku negri si enggo Kubereken man kalak e,+ eme negri si melala kel i je susu ras madu,+ negri si mejilena arah kerina negri.
16 Kuban bage perban pusuh kalak e ngikutken berhala-berhala si erban ciga ate,+ tulak kalak e undang-undangKu, la dalanken kalak e peraturen-peraturenKu, janah najis ban kalak e SabatKu.
17 “‘“Tapi mekuah ateKu kalak e, la Kukernepken kalak e. La Kukernepken kalak e bas taneh mesawang.*
18 NingKu man keturunen kalak e bas taneh mesawang,*+ ‘Ula dalanken kena peraturen-peraturen nini bulang kena,+ ula patuhi kena undang-undangna. Ula ban kena najis diri kena alu berhala-berhalana si erban ciga ate.
19 Aku kap Jahwe Dibata kena. Dalankenlah peraturen-peraturenKu, patuhilah undang-undangKu. Lakokenlah kerina e.+
20 Pebadialah SabatKu,+ e jadi tanda si ngingetken kena maka Aku kap Jahwe Dibata kena.’+
21 “‘“Tapi keturunen Israel mberontak man bangKu.+ La dalanken kalak e peraturen-peraturenKu, la patuhina undang-undangKu janah la ikutkenna, padahal ise pe si matuhisa pasti nggeluh. Najis ban kalak e SabatKu. Emaka erjanji Aku, Kusehken pagi rawaKu man kalak e, Kuban gelah nanamina rawaKu i taneh mesawang.*+
22 Tapi Kukendaliken bangKu,+ la Kuban bage guna gelarKu,+ gelah gelarKu la icedai i lebe bangsa-bangsa si ngidah Aku maba kalak e* ndarat arah Mesir.
23 Ersumpah ka Aku man kalak e bas taneh mesawang* maka Kumerapken kalak e ku tengah bangsa-bangsa ras ku erbage negri.+
24 Si e terjadi perban la lakoken kalak e undang-undangKu, tulakna peraturen-peraturenKu,+ najis banna SabatKu, ikutkenna berhala-berhala nini bulangna si erban ciga ate.+
25 Kupediat ikutken kalak e peraturen-peraturen si la mehuli bage pe undang-undang si la mereken kegeluhen.+
26 Gelah kernep kalak e, Kupediat kalak e najis iban korban-korbanna, eme sanga itutungna anakna sintua.+ Alu bage, teh kalak e maka Aku kap Jahwe.”’
27 “O anak manusia, ngeranalah kam man kalak Israel, kataken man kalak e, ‘Bagenda nina Jahwe Tuhan Si Meganjangna, “Nini bulang kena pe ihinana Aku alu cara si bage. La kalak e setia man bangKu.
28 Kubaba kalak e ku negri si enggo Kujanjiken alu sumpah man kalak e.+ Sanga idah kalak e kerina bukit si meganjang bage pe batang-batang kayu si melala bulungna,+ mulai persembahken kalak e korban-korban bage pe persembahen si erban Aku sakit hati. Persembahken kalak e korban si merim bauna* janah amburken kalak e persembahen inemen i je.
29 Emaka Kusungkun kalak e, ‘Erkai kena lawes ku ingan-ingan si meganjang* e? (Seh ngasa gundari ingan e igelari Ingan si Meganjang.)’”’+
30 “Gundari kataken man kalak Israel, ‘Bagenda nina Jahwe Tuhan Si Meganjangna, “Najis ban kena diri kena alu ngelakoken kai si lakoken nini bulang kena, eme nembah berhala-berhala kalak e si erban ciga ate, janah la kena setia man bangKu.*+
31 Lalap nge ban kena najis diri kena seh asa gundari alu mpersembahken korban man kerina berhala kena si erban ciga ate ras nutung anak kena si dilaki?+ O kalak Israel, sanga ban kena bage, arus kin Kualoi kena?”’+
“Nina Jahwe Tuhan Si Meganjangna, ‘Aku, Dibata si nggeluh ersumpah, labo kena Kualoi.+
32 Kai si lit bas ukur kena labo pernah terjadi, eme sanga ning kena, “Bagi bangsa si debanlah kita, bagi keluarga-keluarga bas negri si deban si nembah* kayu ras batu.”’”+
33 “Nina Jahwe Tuhan Si Meganjangna, ‘Aku Dibata si nggeluh ersumpah, Aku pagi si merentah kena alu ndudurken tanKu si megegeh janah Kusehken pagi rawaKu.+
34 Kubaba pagi kena arah bangsa-bangsa, Kupepulung pagi kena arah negri si ku je kena enggo Kumerapken alu ndudurken tanKu si megegeh janah Kusehken pagi rawaKu.+
35 Kubaba pagi kena ku taneh mesawang* bangsa-bangsa, pedempak ayo pagi kita i je jenari Kuadili kena.+
36 “‘Kuadili pagi kena, bagi caraKu ngadili nini bulang kena bas taneh mesawang* negri Mesir,’ nina Jahwe Tuhan Si Meganjangna.
37 ‘Kuban pagi kena lewat arah teruh tongkat permakan,+ Kuiket pagi kena alu sada perjanjin.
38 Tapi Kumasapken pagi arah tengah-tengah kena nari kalak si mberontak bage pe kalak si ngelanggar undang-undangKu.+ Sebap Kupedarat pagi kalak e arah negri inganna tading jadi kalak asing, tapi labo pagi kalak e masuk ku negri Israel.+ Teh kena pagi maka Aku kap Jahwe.’
39 “O kalak Israel, bagenda nina Jahwe Tuhan Si Meganjangna, ‘Laweslah kena kerina, sembahlah berhala-berhala kena si erban ciga ate.+ Tapi amin pe la begiken kena Aku, labo banci ban kena najis gelarKu si badia alu korban-korban ras berhala-berhala kena si erban ciga ate.’+
40 “Nina Jahwe Tuhan Si Meganjangna, ‘Bas negri e, i datas gunungKu si badia eme gunung si meganjang bas Israel,+ kerina pagi kalak Israel nembah man bangKu.+ Bas ingan e meriah pagi ukurKu ngidah kalak e, Kupindo gelah bereken kena sumbangen ras persembahen si mehulina eme jang kena si badia.+
41 Perban persembahken kena bau si merim, meriah pagi ukurKu ngidah kena sanga Kubaba kena ndarat arah bangsa-bangsa, janah Kupepulung kena arah negri si ku je kena Kumerapken.+ Ipebadia pagi Aku i tengah-tengah kena i lebe bangsa-bangsa.’+
42 “‘Teh kena pagi maka Aku kap Jahwe+ sanga Kubaba kena ku negri Israel,+ eme ku negri si enggo Kujanjiken alu sumpah man nini bulang kena.
43 I je, inget kena pagi si erban kena najis eme perbahanen kena ras kerina si enggo lakoken kena,+ ciga pagi ate kena diri kena perban kerina si jahat si enggo lakoken kena.+
44 O kalak Israel, teh kena pagi maka Aku kap Jahwe sanga Kulakoken si e man kena guna gelarKu,+ la pagi Kuban man kena bagi perbahanen kena si jahat ras si erban mela,’ nina Jahwe Tuhan Si Meganjangna.”
45 Nina Jahwe ka man bangku,
46 “O anak manusia, alaken ku arah selatan, umumkenlah ku je, ernubuatlah ku kerangen si lit i daerah selatan.
47 Kataken man kerangen selatan, ‘Begiken kai nina Jahwe. Bagenda nina Jahwe Tuhan Si Meganjangna, “Kuban pagi api nutung kam,+ keri pagi kerina batang kayundu si meratah ras si kerah. Api si gara e la banci mate,+ melas pagi akap kerina kalak, mulai selatan nari seh ku utara.
48 Kerina pagi kalak ngidahsa maka Aku Jahwe si mpegara api e, api e la banci mate.”’”+
49 Emaka ningku, “O Jahwe Tuhan Si Meganjangna! Kataken kalak e lalap aku ngerana alu teka-teki.”*
Cataten i teruh
^ Ntah “ersikap ngumumken penghakimen man kalak e?”
^ As. “Kuangkat ka tanKu.”
^ Ntah “Kumata-matai.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Maksudna, Israel.
^ Maksudna, Israel.
^ Taneh si mbelang si jarang iingani.
^ Taneh si mbelang si jarang iingani.
^ Maksudna, Israel.
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Maksudna, Israel.
^ Taneh si mbelang si jarang iingani.
^ Ntah “si erban meriah ukur.”
^ Ntah “ingan-ingan ersembah.”
^ Ntah “janah lakoken kena pelacuren rohani.”
^ Ntah “ngelayani.”
^ Taneh si mbelang si jarang iingani.
^ Taneh si mbelang si jarang iingani.
^ Ntah “kuan-kuanen.”
