Esekiel 21:1-32
21 Ngerana ka Jahwe man bangku, nina,
2 “O anak manusia, alaken ku Jerusalem, beritakenlah kerna ingan-ingan si badia ras ernubuatlah kerna negri Israel.
3 Kataken man negri Israel, ‘Bagenda nina Jahwe, “Kulawan kam, Kupedarat pedangKu arah inganna,*+ jenari Kubunuh kalak si benar ras si jahat si lit i tengah-tengahndu.
4 Kubunuh ateKu kalak benar ras jahat si lit i tengah-tengahndu, Kupedarat pagi pedangKu arah inganna guna nyerang kerina kalak, mulai selatan nari seh ku utara.
5 Kerina kalak pagi metehsa maka Aku Jahwe enggo mpedarat pedangKu arah inganna. Pedang e lanai pagi imasukken ku inganna.”’+
6 “O anak manusia, ndeherenglah kam janah nggirgir, ue ndeherenglah kam, sedihlah kam i lebe-lebe kalak e.+
7 Adi sungkun kalak e kam, ‘Engkai maka kam ndehereng?’ katakenlah, ‘Perban sada laporen.’ Sebap e pasti terjadi, kerina pusuh* pasti mbiar, kerina tan pasti lemas, kerina kalak pasti putus asa, bage pe kerina tiwen pasti litap.*+ ‘Enda pasti reh, e pasti terjadi,’ nina Jahwe Tuhan Si Meganjangna.”
8 Nina Jahwe ka man bangku,
9 “O anak manusia, ernubuatlah janah kataken, ‘Bagenda nina Jahwe, “Pedang! Pedang+ enggo ipetelap janah iasah seh asa erndilap.
10 Pedang e iasah guna munuhi kalak. Pedang e iasah gelah erndilap bagi cahaya.”’”
“La kin arusna kita ermeriah ukur?”
“‘Tulak pedang* e tongkat kekuasan anakKu,+ bagi si lakokenna man kerina batang kayu.
11 “‘Pedang e ibereken man sekalak jelma guna iasah ras ipake guna munuh. Pedang e enggo ipetelap janah iasah guna ibereken ku tan sekalak pembunuh.+
12 “‘O anak manusia, serkoken janah ngandungkenlah,+ perban pedang e reh ngelawan umatKu. Pedang e ngelawan kerina peminpin Israel.+ Kalak e ras umatKu jadi korban pedang e. Emaka pekpeklah pahandu alu erceda ate.
13 Pemereksan enggo ilakoken.+ Kai pagi si terjadi adi itulak pedang e tongkat kekuasan e? Kernep me tongkat e,’+ nina Jahwe Tuhan Si Meganjangna.
14 “O anak manusia, ernubuatlah, ertepuklah jenari kataken telu kali ‘Pedang!’ Pedang e eme pedang si munuh kalak, pedang si munuh enterem kalak. Kepung pedang e pagi kalak e.+
15 Mbiar pagi pusuh* kalak e,+ enterem pagi si mate bas gerbang kota kalak e. Kubunuhi pagi kalak alu pedang. Payo, pedang e erndilap bagi cahaya, iasah guna munuhi kalak!
16 Ayunkenlah ku kanan! Ayunkenlah ku kiri! Ayunkenlah ku japa pe babah pedang e iarahken!
17 Ertepuk ka pagi Aku, Kupuasken rawaKu.+ Aku Jahwe si enggo ngerana.”
18 Nina Jahwe ka man bangku,
19 “O anak manusia, banlah tanda bas dua dalan si banci idalani pedang raja Babilon. Duana dalan e tangtangna arah sada negri janah tujunna ku dua kota. Banlah papan penunjuk jalan bas persimpangen dalan e.
20 Banlah tanda bas dalan si arus ilewati pedang e guna nyerang Raba+ eme kota kalak Ammon. Ban ka tanda bas dalan si arus ilewati pedang e guna nyerang Jerusalem,+ eme kota si erbenteng i Juda.
21 Ngadi raja Babilon guna ngeramal bas persimpangen dalan, eme bas persimpangen dua dalan e. Ugur-ugurna panahna. Pindona petunjuk man berhala-berhalana.* Pereksana hati binatang.
22 Ramalen bas tan kananna nuduhken maka ia arus ku Jerusalem, arus mpesikap alat ngeruntuhken, ngumumken pembunuhen, nurakken surak-surak perang, masang alat ngeruntuhken i gerbang-gerbang, mbangun timbunen taneh, ras mbangun tembok pengepungen.+
23 Tapi e tempa-tempa bagi ramalen palsu akap penduduk Jerusalem si enggo ersumpah man kalak Babilon.+ Tapi inget raja Babilon kesalahen kalak e janah tangkapna pagi kalak e.+
24 “Emaka bagenda nina Jahwe Tuhan Si Meganjangna, ‘Enggo ban kena kesalahen kena iinget alu ncidahken pelanggaren kena, ban kena dosa-dosa kena teridah arah kerina perbahanen kena. Perban kena enggo iinget, ibaba pagi kena alu paksa.’
25 “O peminpin-peminpin Israel si jahat,+ si parah lukana, enggo seh waktundu, enggo seh penghukumen si terakhir man bandu.
26 Bagenda nina Jahwe Tuhan Si Meganjangna, ‘Tangtangilah penutup takalndu, aguilah mahkotandu.+ Labo bagenda lalap keadanna.+ Peganjanglah si meteruk,+ peteruklah si meganjang.+
27 Runtuh, runtuh, runtuh pagi Kuban mahkota e. Labo pagi jadi jang ise pe mahkota e seh asa reh kalak si lit hakna si sah,+ janah Kubereken pagi e man bana.’+
28 “O anak manusia, ernubuatlah, kataken, ‘Bagenda nina Jahwe Tuhan Si Meganjangna kerna kalak Ammon bage pe kerna hinan arah kalak e.’ Kataken, ‘Pedang! Pedang enggo ipedarat guna munuhi kalak. Pedang e iasah guna munuh, erndilap bagi cahaya.
29 Pengenehenen* ras ramalen si ikataken man bandu e palsu. Ipegun-gun pagi kam ras kalak si enggo ibunuh, eme kalak jahat si warina enggo reh, si enggo ngaloken penghukumen si terakhir.
30 Ulihkenlah pedang e ku inganna.* Kuhakimi pagi kam bas ingan kena ijadiken, eme bas negri asal kena.
31 Kusehken pagi rawaKu man bandu. Kusemburken api rawaKu man bandu. Kuserahken pagi kam ku kalak jahat, eme kalak si ahli engkernepken.+
32 Jadi bahan bakar api kam pagi.+ Iamburken pagi darehndu bas negri e, lanai pagi kam iinget mulihi, sebap Aku Jahwe si ngerana.’”
Cataten i teruh
^ Ntah “sembungna.”
^ Ntah “ate; hati.”
^ Maksudna, ndarat kencingna perban biarna.
^ Maksudna, pedang Jahwe.
^ Ntah “ate; hati.”
^ As. “terapimna.”
^ Eme kerna kai pe si cidahken Dibata ku bas pikiren sekalak jelma.
^ Ntah “sembungna.”
