Esekiel 22:1-31
22 Nina Jahwe ka man bangku,
2 “O anak manusia, enggo nge kam ersikap ngumumken penghakimen man* kota pembunuh* e+ ras mberitaken kerina perbahanen si erban ciga ate si lakokenna?+
3 Kataken, ‘Bagenda nina Jahwe Tuhan Si Meganjangna, “O kam kota si ngamburken dareh,+ enggo seh waktundu.+ Banndu berhala-berhala si erban ciga ate* si erban kam najis.+
4 Ersalah kam perban kam enggo munuh.+ Berhala-berhalandu si erban ciga ate enggo erban kam najis.+ Pegendekndu wari-warindu, enggo seh pendungi tahun-tahunndu. E me sebapna Kuban kam ihina bangsa-bangsa ras itokohi kerina negri.+
5 Terkenal kam la mehuli janah kacau kel. Emaka kerina negri si ndeher ras si ndauh nokohi kam pagi.+
6 Kerina peminpin Israel si lit i tengah-tengahndu nggunaken kuasana munuhi kalak.+
7 Kalak si lit i tengah-tengahndu hinana pagi bapakna ras mamakna.+ Tipuna penduduk asing, tindasna anak si la erbapa* bage pe janda.”’”+
8 “‘Segat atendu ingan-inganKu si badia, najis banndu SabatKu.+
9 I tengah-tengahndu lit tukang pitnah si atena munuh+ bage pe kalak si man persembahen i pegunungen, perbahanenna la meteh mela.+
10 I tengah-tengahndu lit kalak si erhubungen seks ras diberu bapakna,+ lit kalak si paksana diberu si sangana haid erhubungen seks ras ia.+
11 I tengah-tengahndu lit dilaki si ngelakoken perbahanen si erban ciga ate ras diberu kalak,+ lit si perkosana permenna,+ lakokenna perbahanen si la meteh mela, lit ka si perkosana turangna eme anak bapakna si diberu.+
12 I tengah-tengahndu, lit kalak si ngaloken upah guna munuh.+ Sanga pinjamkenndu sen, pindondu bungana janah daramindu untung.+ Tipundu seninandu guna ndatken untung.+ Tuhu-tuhu kel Aku lupakenndu,’ nina Jahwe Tuhan Si Meganjangna.
13 “‘Ertepuk Aku, ciga ateKu ngidah untung si datndu alu la jujur ras ngidah pemunuhen si lit i tengah-tengahndu.
14 Sanga Kulawan kam, pang denga nge kam, megegeh denga nge tanndu?+ Aku Jahwe si enggo ngerana, pasti Kulakoken kai si enggo Kukataken.
15 Kumerapken pagi kam ku tengah bangsa-bangsa bage pe ku erbage negri.+ Kupengadi pagi perbahanenndu si najis.+
16 Lanai pagi kam iergai i lebe bangsa-bangsa, tehndu pagi maka Aku kap Jahwe.’”+
17 Ngerana ka Jahwe man bangku, nina,
18 “O anak manusia, bangsa Israel enggo bagi sampah arah leburen logam si la lit gunana man bangKu. Kalak e bagi tembaga, timah putih, besi, ras timah hitam bas tungku. Kalak e enggo bagi sampah pirak.+
19 “Bagenda nina Jahwe Tuhan Si Meganjangna, ‘Kena enggo bagi sampah arah leburen logam,+ emaka Kupepulung pagi kena ku Jerusalem.
20 Bagi pirak, tembaga, besi, timah hitam, ras timah putih si ipepulung ku bas tungku jenari iembus api ku je janah cair banna kerina, bage pagi Kupepulung kena bas pernembeh ateKu ras rawaKu. Kuembus kena pagi janah Kuban kena cair.+
21 Kupepulung pagi kena, Kuembus kena alu api rawaKu,+ jenari cair kena i je.+
22 Bagi pirak si icairken bas tungku, cair ka pagi kena i kota e. Teh kena pagi maka Aku kap Jahwe, si enggo nehken rawaKu man kena.’”
23 Ngerana ka Jahwe man bangku, nina,
24 “O anak manusia, kataken man kota e, ‘Bas wari rawa e, kam lanai pagi ibersihken, lanai ndatken udan.
25 Ersekongkol pagi nabi-nabi kota e+ bagi singa si erngaung si ncabik-cabik mangsana.+ Pangani kalak e pagi jelma. Rampas kalak e pagi erta ras barang-barang si merga. Banna pagi enterem kalak jadi janda bas kota e.
26 Langgar imam-imamna undang-undangKu,+ lalap najis ban kalak e ingan-inganKu si badia.+ La bedaken kalak e apai si badia ras apai si biasa.+ La kataken kalak e apai si najis ras apai si la najis.+ La dalanken kalak e SabatKu, najis ban kalak e Aku.
27 Peminpin-peminpinna bagi srigala si ncabik-cabik mangsa. Siksana kalak, bunuhna guna ndatken untung alu la jujur.+
28 Nabi-nabina nutupi perbahanenna si jahat bagi nutupi tembok alu cet mbentar. Dat kalak e pengenehenen si palsu janah peseh kalak e ramalen si la tuhu,+ jenari nina kalak e, “Bagenda nina Jahwe Tuhan Si Meganjangna,” padahal la lit kai pe kataken Jahwe.
29 Penduduk negri e nipu ras ngerampok.+ Tindasna kalak si kekurangen ras si mesera. Tipuna penduduk asing, la adil perbahanenna man kalak e.’
30 “‘I tengah-tengah kalak e, Kudarami sekalak dilaki si banci mpehuli tembok batu e, ntah pe tedis i lebe-lebeKu bas bagin tembok si erlubang guna ngelindungi negri e, alu bage negri e la ihancurken.+ Tapi sekalak pe la lit Kudat.
31 Kusehken pagi rawaKu man kalak e janah Kukernepken kalak e alu api rawaKu. Kuban pagi nanami kalak e akibat perbahanenna,’ nina Jahwe Tuhan Si Meganjangna.”
Cataten i teruh
^ Ntah “kota si rutang dareh.”
^ As. “ersikap ngakimi.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “anak melumang.”
